Jesu Tondiba Tuona 25
25
Poli mia ke ban gedini o Sesari po
1Fesitusi n den cua, ke li pundi danataa, o den fii Sesare ki gedi Jerusalemi. 2Bi kopadicianba yudanba leni Jufinba niciama den cua o kani, ki waani o ban pia yaa maama leni Poli. 3Bi den miadi o ki tigini o wan ŋanbi bi po, ki soani ban yini Poli wan cua Jerusalemi. Ama bi den jagi li jagibiadili, ki baa kpa o u sanu po. 4Fesitusi den guani ki yedi ba ke bi guu Poli Sesare, ke wani o ba baa guani lipo li kan waagi. 5O go den yedi ba: «Yi siiga yaaba n tugi li yuli n yegi leni nni lipo, o joa yeni yaa pia tagiliba, ban maadi ban pia o po yaa maama.»
6Fesitusi naa den kali bi siiga ke li cie dananii bi dana piiga, ki jiidi ki guani Sesare. Lan den fii ki faa, o den kali li bujiali kaanu po, ki yedi ban cuani Poli. 7Poli n den cua, Jufinba, yaaba n ñani Jerusalemi, den cebi ki lindi o, ki maadi o po, ki kuliti o leni yaa maama n yabi, ki bia boncianla, ban kan fidi ki doagidi ke yaama n tie moamoani. 8Poli den maadi ki baa gaa o yuli ki yedi: «Mii tieni yaala n bia Jufinba bali maama po, U Tienu diegu po, bi Loma diema badiciamo Sesari po.»
9Fesitusi yua n den bua ki yaa mani leni Jufinba, den yedi Poli: «Naani a baa tuo ki do ki gedi Jerusalemi min ban jia ban pia leni a yaa maama lankani bi?» 10Poli den yedi: «N se o badiciamo Sesari bujiali kaanu kani, lan pundi ban jia n buudi naankani. Mii tieni tudimiba Jufinba po, nani amoko n bani hali bonŋanla maama. 11Li yaa tie ke n tieni yaala n bia ke li pundi kuuma, n kan yie ki kpe. Ama ban maadi n po yaa maama yaa tie faama, laa pundi oba kuli n teni nni bi nuu nni. N soagini n buudi Sesari po.»#25.11 Loma bulicino bebe n den pia li bali ki mia ke o buudi n gedi Sesari kani.
12Fesitusi leni o nijuoginkaaba n den juogi laa maama po, o den guani ki yedi Poli: «A yedi ke a bua ki soagini a buudi Sesari po. To, a baa gedi Sesari kani.»
Poli sedi Agilipa nintuali
13Danaba n den pendi, o bado Agilipa leni Belenisa#25.13 Belenisa: Belenisa den tie pua ki tie wani Agilipa waalo. Wani Agilipa mo den tie toa kaa taa leni diani 12 yua. den cua Sesare ki baa fuondi Fesitusi. 14Ban den tieni likani danaba, Fesitusi den waani o bado Agilipa Poli maama fuuli ki yedi: «O joa ye ne ki tie kpaadili, Felikisi n den fii ki ŋaa yua. 15Min den gedi Jerusalemi, bi kopadicianba yudanba leni Jufinba nikpela den waani nni ban pia o po yaa maama, ki mia nni ke min jia leni o ti buudi ki teni ban kpa o. 16N den waani ba ke laa tie Loma yaaba bogida, ki kpa nilo, kaa kpa cedi ke o taani ki sedi leni yaaba n kuliti o, ke wan maadi ki gaa o yuli. 17Lane bi den cua n kani. Mii den waagi ki bu bi maama, lan den fii ki faa n den gedi ki kali li bujiali kaanu kani ki teni ke bi cuani o joa yeni. 18Yaaba n den kuliti o n den sedi ki togidi, baa den maadi o po min tama ke bi baa maadi yaa tagili. 19Ban den nia leni o yaa maama po den tie bi yaa jaanma sanŋoadima maama fuuli leni yaa nilo n yi Jesu yaa maama fuuli, yua n den kpe ke Poli yedi ke o go fo. 20Min kaa den bani min baa jia laa maama maama, n den buali Poli o yaa bua ki gedi Jerusalemi, ban jia o maama lankani. 21Poli den soagini o buudi Sesari po ke wani o badiciamo n jia ti. Lanwani, n teni ke bi ji o li kpaadidieli nni hali min baa fidi ki gedini o Sesari po.»
22Agilipa den yedi Fesitusi: «N bua o joa yeni n maadi, nmo n gbadi.» Fesitusi den guani ki yedi o: «Saala o baa maadi ŋan gbadi.»
23Lan den fii ki faa, Agilipa leni Belenisa den bobi bi tiadi yaadi n pia ti kpiagidi boncianla ki kua u bujiakaanu kani. Bi toatieba yudanba leni u dogu nikpiaga den taani leni ba. Fesitusi den teni ke bi cuani Poli.
24Fesitusi den yedi: «O bado Agilipa leni yinba yaaba n taani ne kuli, yi nua o naa joa. Jufinba niligu kuli maadi n kani o maama Jerusalemi leni nekanba kuli, ki tangi ki tua ke laa pundi wan go yaa ye leni miali. 25Mini yaa po, mii den laa ke o tieni liba yaala n pundi ban kpa o. Wani o ba n den soagini o buudi Sesari kani, n den bili ke n baa gedini o. 26Mii laa min baa diani yaala o maama po ki soani ti badiciamo yeni po. Lani n teni ke n cuani o fini o bado Agilipa nintuali leni yikuli nintuali, ke ti yaa biigi o maama min baa min baa diani yaala. 27Kelima n sua ke li tie fanma fanma min soani li kpaadili kaa wani ban pia leni o yaa maama.»
Currently Selected:
Jesu Tondiba Tuona 25: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
