Jesu Tondiba Tuona 24
24
Jufinba buni leni Poli guveneeri Felikisi nintuali
1Danamuu n den pendi, bi kopadicianba bado Ananiasi den yegi leni a nikpela leni maliiga daano yendo, ke bi yi o Tertulusi ki jiidi ki cua Sesare. Bi den maadi guveneeri ban pia yaa maama leni Poli. 2O den yini Poli, ke Tertulusi cili ki maadi ki kuliti o ki yedi:
3«Fini ti yudaano Felikisi, tikuli ye leni mi yanduanma cain kelima a yaa po. Fini n teni ke ti diema lebidi ki ŋanbi. I kaani kuli leni i yogini kuli, ti pala mani leni ŋan tieni yaala yeni, ke ti jaandi a likuli po hali boncianla. 4Mii go bua ki pugini mi maama ki coagi a. N mia ŋa ŋan cengi ti u yogunu waamu bebe. 5Ti sua ke o naa joa tie nani u yianu yeni, ki fiindi mi janjanma Jufinba siiga ban ye naankani kuli ŋanduna nni. O tie Nasareti yaaba jaanbuolu yudanba siiga yendo. 6O den moandi ki baa joagini U Tienu diegu, ke ti cuo o. [Ti den bua ki bu leni o nani ti yaa bali maama n bili maama. 7Ama bi toatieba yudanciamo Lisiasi den tieni u paalu ki fie o ti nuu nni, ki yedi ke yaaba n pia mi maama leni o, n cua a yaa kani.] 8Fini a ba baa fidi ki buali o ki bandi tin pia leni o yaa maama kuli yaa tie moamoani.» 9Yaa Jufinba n den ye likani den saa Tertulusi maama po i moamoani, ki yedi ke wan maadi Poli po yaala kuli tie yene.
Poli maadi Felikisi nintuali ki baa gaa o yuli
10Guveneeri den yugidi o nuu ki puni Poli u sanu ke wan maadi, ke o den yedi:
«N bani ke a tie ti buolu bujialo yaa bina n yabi. Lani, n pali mani ke n ye a nintuali ki baa maadi ki gaa n yuli. 11Laa cie piiga n danalie ke n den gedi Jerusalemi, ki baa n kpiagi U Tienu. A yaa bua a baa fidi ki buali ki bandi. 12Baa den laa ke n nia leni niloba U Tienu diegu nni, bi ke n fiini ku niligu pali li bali maama bangima diena nni leni u dogu nni kaanuba kuli. 13Bi kan fidi ki baa yaa siedi n baa doagidi ke ban maadi n po yaa maama a kani moala tie moamoani. 14Ama ban yini yaa jaanma jaanbuocaanu yeni, n tuo a nintuali ke n ŋua ma, ki jaandi ti yaajanba Tienu, ki dugi yaala n diani li bali maama nni leni bi saawalipuaba tila nni po. 15N daani nani bani yaaba n ye ne n daani maama, ke bi tinkpiba fiima ye, yaaba n tiegi leni yaaba n ki tiegi kuli po. 16Lani n teni ke n moandi yogunu kuli, ke n pali siedi n da bu leni nni, kelima tagiliba po U Tienu kani leni bi niba kani kuli.
17Mii den ye Jerusalemi binaba, ama n den guani likani, ki baa cuani mi todima n buolu po, ki go pa U Tienu bu paabu. #JTT 21.17-28. 18Min den tiendi lani, yaa Jufinba n ñani Asi diema nni den laa nni U Tienu diegu nni. N den wali ki ŋanbi nba.#24.18 Ki batisi ki ŋanbi oba nekanba naa tie tin bani yaa batisima buolu ka. Ama li den tie yaa batisima n yegi leni yaa bogida n den tie laa bonla po. 19Mii den taani niligu, kaa tiendi fuugu mo. Jufinba yeni yaa pia n po liba, li pundi bani bi ba n yaa ye ne ki maadi laa maama a nintuali. 20Lani yaa ka, li pundi yaaba n ye ne n waani ban den laa ke n pia yaa tagili, min den sedi bi cancantieba taancianli kani yaa yogunu. 21Li yàá tie min den kpaani bi siiga ki yedi: ‹Yi ja n buudi dinla, kelima bi tinkpiba fiima po.› » #JTT 23.6.
22Lani, Felikisi, yua n bani Jesu sanŋoadima maama bonŋanla, den sieni mi maama yeni hali datoali, ki yedi Poli: «Bi toatieba yudanciamo Lisiasi yaa cua, n baa jia a maama.» 23O den puogi minteela kobiga yudaano, wan yaa guu Poli ki dingi o po, ki cedi o danlinba n yaa kpendi o kani ki todi o.
Poli go maadi Felikisi leni o pua nintuali
24Danaba n den pendi, Felikisi den cua leni o pua Dusili, yua n tie Jufi. O den teni ke bi cuani Poli o kani. O den teni ke Poli waani o po li dandanli Jesu Kilisiti nni n tie yaala. 25Ama Poli n den maadi mi teginma, li yukubili leni U Tienu buudi yaadi n baa ti cua yaa maama yeni, ti jawaandi den cuo Felikisi ke o yedi o: «Moala po, a baa fidi ki ña. N yaa go ti baa li lenli, n baa yini a.» 26O go den tama ke Poli baa pa o i lige. Lani yaa po, o den tuuni ke bi yi o yogunu kuli, ki maadi leni o.
27Binalie n den pendi, Felikisi den baa o lebidu ke bi yi o Porsiyusi Fesitusi. Nani Felikisi n den bua ki mangi Jufinba pala yeni, o den ŋaa Poli ke o baa ki ye li kpaadidieli nni.
Currently Selected:
Jesu Tondiba Tuona 24: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
