Jesu Tondiba Tuona 23
23
1Poli den noanli bi cancantieba taancianli ki yedi ba: «N kpiiba, n ye U Tienu nintuali leni yaa pali siedi n ŋani hali dinla.» 2Bi kopadicianba bado Ananiasi den yedi yaaba n nagi Poli n pua o ñoabu. 3Poli den yedi o: «U Tienu baa pua ŋa, fini u bilinpienu na. A kaa u bujiakaanu po, ki baa jia n buudi nani li bali maama n bili maama. Ama, a nan miidi li bali maama, kelima a teni ke bi pua nni.» #Mat 23.27-28. 4Yaaba n se likani den yedi Poli: «A sugidi bi kopadicianba bado yo?» 5Poli den yedi: «N kpiiba, mii bi bani ke o tie bi kopadicianba bado. Li diani i Diani nni ki yedi: ‹Ŋan da maadi a buolu yudaano po yaala n bia.› » #Ñam 22.28.
6Poli den bandi ke bi cancantieba taancianli yeni siiga bine tie Sadusieninba, bine mo Farisieninba. Lane ke o den kpaani li taanli yeni niinni ki yedi: «N kpiiba, n tie Farisieni, n yaajanba mo den tie Farisieninba. Bi cuo nni ki baa bu n buudi kelima n daani ke bi tinkpiba baa fii.» #JTT 26.5; Flp 3.5. 7Wan den yedi yeni, Farisieninba leni Sadusieninba den cili ki nia leni biyaba, ke mi paadima tieni li taancianli siiga. 8Sadusieninba ki daani ke bi tinkpiba fiima ye, baa go daani ke malekinba leni a cicila mo ye. Ama Farisieninba wani daani ke lani kuli ye. #Mat 22.23; Mrk 12.18; Luk 20.27. 9Ku fuugu den tieni boncianla. Li bali maama banda bi tianba yaaba n tie Farisieninba den fii ki nia leni u paalu ki yedi: «Tii sua ke o joa na pia tagiliba. Daalinba ciciligiba, yaa ka malekoba n maadi leni o.» 10Mi niama yeni den biagidi ki pugidi hali ke bi toatieba yudanciamo den jie, ke bi baa ti padi padi Poli. Lani yaa po, o den waani bi toatieba ban jiidi ki kua li nitaanli siiga, ki cuo Poli ki ñani o ki kuani o u kaanpaalu nni.
11Yaa ñiagu n ŋua, o Diedo den cua ki sedi Poli kani ki yedi o: «Paagi a pali! Nani ŋan tieni n po siedi Jerusalemi na maama, a go baa tieni n po yeni Loma po moko.»
Bi luni Poli i janbi ki bua ki kpa o
12Lan den fii ki faa, Jufinba den taani ki juogi, ki poli ki yedi ke bi kan je, bi kan ño bi yàá kpa Poli. 13Yaaba n den taani ki jagi ki bili yeni den cie niba piinaa. 14Bi den gedi bi kopadicianba yudanba leni a nikpela kani, ki yedi: «Ti taani ki poli ke jiema kan kua ti ñoana nni, kali ti kpa Poli. 15Lanwani, yin taani mani leni bi cancantieba taancianli, ki soani bi toatieba yudanciamo kani, ki mia o ke wan cuani Poli yi kani, nani yi bua ki bandi o maama fuuli ki pugini yeni. Tinba mo, ti bogini ki baa kpa o hali ke o daa pundi yi kani.»
16Ama Poli naataanpuoga bijua den gbadi ban jagi yaa jagibiadili, ki gedi ki kua u kaanpaalu nni ki waani Poli. 17Poli den yini minteela kobiga yudanba siiga yendo, ki yedi o: «Ciani o jawaalo na yi yudanciamo kani, kelima o pia mi maama ki baa waani o.» 18Minteela kobiga yudaano den ciani o jawaalo yeni bi toatieba yudanciamo kani, ki yedi o: «Yaa kpaadili n yi Poli yini nni, ki mia nni min ciani o jawaalo na a kani, kelima o pia mi maama ki baa waani a.»
19Bi toatieba yudanciamo den cuo o jawaalo nuu, ki piadi o ki buali o: «A pia be maame ki baa waani nni?» 20O den yedi o: «Jufinba juogi ki bili ke bi baa mia ŋa ŋan cuani Poli saala bi cancantieba taancianli kani, nani bi bua ki buali o o maama fuuli ki pugini yeni. 21Ŋan da tuo bi miabu, kelima yaa niba n cie piinaa wuoni ki bua ki bibi o. Bi poli ke jiema bi bonñokaala kan kua bi ñoana nni, kali bi kpani o. Bi bogini ki ji guu ŋan tuo bi po bi miabu bebe.» 22O yudanciamo den tundi o jawaalo ke wan da maadi oba kuli wan cua ki waani o yaala, ki cabi o.
Bi gedini Poli guveneeri Felikisi po
23Lani, o den yini minteela kobiga kobiga yudanba bilie, ki yedi ba: «Teni mani toatieba kobilie, tandanba piilele leni kpandanba kobilie n bogini, ke dinla u duanyogu yaa pendi waamu, yi baa gedi Sesare. 24Yin bogini mani i taami Poli moko yaa po, ki gedini o guveneeri Felikisi po leni laafia.» 25O den diani yaa tili n tie ne:
26«Mini Kilodi Lisiasi n fuondi a, fini ti yudaano guveneeri Felikisi.
27Jufinba den cuo o naa joa ki bua ki kpa o. N den cua leni bi toatieba ki gaa o bi nuu nni, kelima n den bandi ke o tie Loma yua. 28N den bua ki bandi bonŋanla ban den kuliti o yaala yaa po, ki gedini o bi cancantieba taancianli kani. 29N den sua ke ban kuli o yaala po ŋua bi bali maame. Ama waa tieni yaala n pundi ban kuani o kpaadidieli nni, ki buali ban kpa o. 30Min den bandi ke Jufinba jagi o po li jagibiadili, n den jaligi ki soani o a kani, ki go waani yaaba n kuliti o, ban cuani ban kuliti o yaala po a kani. [U Tienu n waani ti tiyaba.]»
31Bi toatieba den tieni wan puogi ba yaala. Ku ñiagu yeni bi den taa Poli ki gedini o Antipatirisi#23.31 Antipatirisi: Den ye Sesare leni Jerusalemi siiga, Jude bianu kani. dogu nni. 32Lan den fii ki faa, a taacenda den lebidi ki guani Jerusalemi u kaanpaalu po, ke bi tandanba soagini Poli liiga. 33Bi den pundi Sesare ki teni guveneeri li tili yeni, ki go teni o Poli moko. 34Guveneeri n den cogi li tili, o den buali Poli n tie yaa diema yua. Wan den bandi ke o tie Silisi diema yua, 35o den yedi o: «Yaaba n kuliti a yaa cua, n baa cengi a maama.» O den puogi bi toatieba ban yaa guu Poli Herodi badidiegu nni.
Currently Selected:
Jesu Tondiba Tuona 23: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
