Jesu Tondiba Tuona 22
22
1«N kpiiba leni n baanba, cengi mani min pia yaa maama moala ne ki baa maadi yi, ki gaa n yuli.» 2Ban den gbadi ke o maadi Hebilu maama, bi den ŋmini suo. Lani, Poli den yedi ba:
3«N tie Jufi, ki mali Silisi diema Tarsi dogu nni. Ama n den fandi u naa dogu nne. N den kua Gamalieli cogidieli, ke o bangi nni ti yaajanba bali maama cap. N den pia li yankuali boncianla U Tienu po, nani yikuli n tie maama dinla. #JTT 5.34-39. 4N den waani yaaba n ŋua Jesu sanŋoadima na fala hali ki kpaani ba. N den loli bi jaba leni bi puoba kuli, ki kuani ba a kpaadidiena nni. #JTT 8.3; 26.9-11. 5Bi kopadicianba bado leni bi cancantieba taancianli kuli tie n siedinba, ke n maadi moamoani. Bi den teni nni a tila, min ban teni ti kpiiba Jufinba, yaaba n ye Damasi, min den caa naanpo, ki baa n loli yaaba n ye lipo ki ŋua mi naa sanŋoadima, ki cuani ba Jerusalemi na, ki teni ban waani ba fala.
Poli togidi wan daani maama
6Min den ye u sanu nni ki nagidi Damasi, ke li bua ki pundi u yensiinu, lanyogunu, yaa yencianma n ñuliti boncianla den ñani tanpoli po, ki jiidi ki lindi nni. 7N den baa tiipo ki gbadi u nialu ke u yedi nni: ‹Soli, Soli, be yaa po ke a faligidi nni?› 8N den guani ki yedi: ‹N Daano, a tie ŋme?› O den yedi nni: ‹N tie Jesu Nasareti yua, ŋan faligidi yua.› 9N yegininlieba den laa mi yenma yeni, ama baa den gbadi yua n maadi leni nni nialu. 10N den yedi o: ‹N Diedo, a bua min tieni be?› O Diedo den yedi nni: ‹Fii ki pundi Damasi. Lankani bi baa waani a ŋan baa tieni yaala kuli.› 11Mi yenma yeni n den ñuliti maama den teni ke n juani. N yegininlieba den cuo n nuu ki dadi nni ke n pundi Damasi.
12O joa den ye Damasi ki yi Ananiasi. O den ŋua U Tienu, ki fangi o, ki kubi o bali maama. Yaa Jufinba n ye Damasi kuli, den tiendi o po o siediŋamo. 13O den cua n kani ki yedi nni: ‹N kpiilo Soli, guani ki yaa nua.› Lanyogunu liga n den guani ki noadi ki laa o. 14O go den yedi nni: ‹Ti yaajanba Tienu tuodi ki gandi a, ki bili ke ŋan bandi o yanbuama, ki le o Niteginka#22.14 Jesu yeni n tie laa niteginka., ki gbadi o ñoabu nni maama. 15A baa yaa tie o siedo bi niba kuli po, ki waani ba ŋan laa ki go gbadi yaala. 16Moala a go guu be? Fii ki gaa mi batisima, a tuonbiadi n ŋuudi ki ña, kelima a jaandi o Diedo yeli po.›
Poli togidi U Tienu n soani o bi nilanba siiga maama
17Min den ti guani Jerusalemi ki ye U Tienu diegu nni ki jaandi U Tienu, n den laa li bonlekaala. 18N den laa o Diedo#22.18 Li tie Jesu yo ke o laa. ke o yedi nni: ‹Fii ki ña Jerusalemi na tontoni, kelima yaaba n ye ne kan gaa ŋan tieni n po yaa siedi.› 19N den yedi o: ‹N Diedo, bi bani bonŋanla ke n den caa li bali maama bangima diena nni, ki co bi siiga nni yaaba n tuo ki daani a, ki go kuandi ba a kpaadidiena nni, ki teni ke bi pua ba i baliji. 20N den taa leni yaaba n wuli a siedo Etienni soama ki kpa o. N den saa bi po i moamoani ke li pundi ban kpa o. Mini n den se ki guu yaaba n kpa o tiayiekaadi.› #JTT 7.58. 21Lani, o Diedo den yedi nni: ‹Fii ki gedi, kelima n baa soani a hali foagima, bi nilanba po.› »
Poli doagidi ke o tie Loma yua
22Jufinba den cengi Poli, ke o maadi ki pundi hali lankani. Lani, bi den tangi ki tua: «Kpa mani o! Laa pundi yaa nibuolu n tie ne n yaa ye leni miali.» 23Bi den tangi ki pugidi, ki yoagini bi tiadi ki yadi mi tama tanpoli.#22.23 Bi niba yaa den yadi mi tama tanpoli den tie ki doagidi ki bi pabienli. 24Bi toatieba yudanciamo den yedi ke ban kuani Poli u kaanpaalu nni, ki pua o i baliji ki buali o ki bandi yaala n teni ke ku niligu tangi yeni. 25Ban den luo o ki baa pua o yaa yogunu, Poli den yedi minteela kobiga yudaano yua n den se likani: «Naani yi pia u sanu ki pua Loma yua i baliji ki daa jia o buudi?» 26Minteela kobiga yudaano yeni n den gbadi laa maama, o den gedi ki ban waani bi toatieba yudanciamo ki yedi: «A baa tieni be n yeni? O joa yeni tie Loma yua yo.» 27Bi toatieba yudanciamo den cua Poli kani, ki yedi o: «Waani nni! A tie Loma yua yo?» O den guani ki yedi o: «Yeni de!» 28Bi toatieba yudanciamo den yedi o: «N den pani ligiciame ki tua Loma yua.» Poli den guani ki yedi o: «Mini wani n mali ki tie yene.» 29Lanyogunu, yaaba n den baa pua o wan maadi yeni den fuadi o kani. Bi toatieba yudanciamo mo den jie boncianla, kelima o teni ke bi loli Loma bulicino i kuseseli.
Poli maadi bi cancantieba taancianli kani
30Bi toatieba yudanciamo den li bua ki bandi Jufinba n kuliti Poli yaala yaa po yo. Lani n den teni ke lan fii ki faa, o den teni ke bi lodi Poli, ki go teni ke bi kopadicianba yudanba leni bi cancantieba taancianli kuli taani. Lani, o den gedini Poli, ki sieni o bi nintuali.
Currently Selected:
Jesu Tondiba Tuona 22: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
