Jesu Tondiba Tuona 21
21
Poli gedi Jerusalemi
1Ti den paadi leni ba ki kua ku ñinbiagu nni, ki teli Kosi. Lan den fii ki faa, ti den suagi liiga ki pundi Lodi. Ti go den fii likani ki gedi Patara. 2Laa dogu nne ke ti den laa yaa ñinbiagu n baa duodi ki gedi Fenisi diema. Ti den kua ku niinni, ki duodi ki gedi. 3Tin den laa Sipiri diema, ti den bali ki ŋaa ma ti ganu po, ki teli Siiri ñinkunu, ki pundi ki sedi Tiiri dogu nni. Tin den ye yaa ñinbiagu nni den baa jiini ku tuga lankane. 4Ti den lingi ki laa bi ŋoadikaaba likani, ki kali leni ba danalele. U Tienu Fuoma Yua den doagidi bi po, ke ban waani Poli ke wan da gedi Jerusalemi. 5Ti fiima daali n den pundi, ti den fii. Bani, bi puoba leni bi bila kuli den piadi ti, hali ki ñani ti u dogu nni. Ti den gbaani u ñinkunu ki jaandi. 6Tin den cabi tiyaba, ti den kua ku ñinbiagu nni, ke bi mo lebidi ki kuni.
7Ti den fii Tiiri yeni, ki suagi ki gedi Pitoleme. Lankani ke ti sancenli mi ñincianma nni den sedi. Ti den fuondi ti kpiiba yaaba n ye likani, ki sedi leni ba dayenli. 8Lan den fii ki faa, ti go den fii ki gedi Sesare. Lankani, ti den cani Filipi, o Laabaaliŋamo wangika, ban den gandi yaa nileleediba siiga yendo. #JTT 6.5; 8.5. 9O den pia bisiabinaa, ke bi tie puowandiana, ki pua saawali. 10Tin den ye likani danaba, o saawalipualo, ban yi yua Agabusi, den ñani Jude, ki cua ti kani. #JTT 11.28. 11O den taa Poli gbanñagidigu ki loli wani o ba yaa taana leni o nii kuli, ki yedi: «U Tienu Fuoma Yua yedi ke Jufinba baa loli ku gbanñagidigu na daano nanda yo Jerusalemi, ki teni o bi nilanba.» 12Tin den gbadi laa maama, tinba leni likani yaaba kuli den mia Poli ke wan da gedi Jerusalemi. 13O den guani ki yedi: «Be yaa po ke yi buudi, ki bua ki biidi n pali? N baa tuo ban loli nni Jerusalemi, ba ki kpa nni moko, o Diedo Jesu yeli nni.» 14Wan kaa den tuo ti tundi kaa lebidi o yama yeni, ti den cedi ki yedi: «Ti Diedo yanbuama n tieni.»
15Laa dana n den pendi, ti den bogini ti tiadi ki baa ña Sesare, ki gedi Jerusalemi. 16Bi ŋoadikaaba siiga bi tianba den ciani ti ki gedini ti Minason denpo, tin den baa caani yua. Minason yeni den tie Sipiri diema yua, ki tie bi ŋoadikakpiaba siiga yendo.
Bi ñani Poli Jerusalemi ki gedini o Loma
21.17—28.31
Poli gedi ki fuondi Jaki
17Tin den pundi Jerusalemi, ti kpiiba den biali ti leni li pamanli. 18Lan den fii ki faa, ti den yegi leni Poli ki gedi ki ban fuondi Jaki. Kilisiti Nitaanli nikpela kuli moko den cua ki taani likani. 19Poli den fuondi ba, ki togidi U Tienu n den tieni bi nilanba siiga yaala kuli, kelima o tuonli po. 20Ban den gbadi o maama, bi den kpiagi U Tienu. Lani, bi den yedi o: «Ti kpiilo, a bani ke Jufinba siiga yaaba n tuo ki daani pundi niba tuda tuda, ama bikuli nan baa ki pia li yankuali li bali maama kubima po. 21Bi gbadi ke a bangi yaa Jufinba n ye bi nilanba dogi nni kuli, ke ban cedi ki da go yaa ŋua Musa bali maama, ki da go kuani bi bila koanciagu, ki da go yaa ŋua Jufinba bogida mo. 22To, ti baa tieni lede? Laa pia tama ke [ku niligu baa taani kelima] bi baa gbadi ke a cua. 23Lanwani, ŋan tieni tin baa waani a yaala. Ti siiga nibinaa ye, yaaba n niani U Tienu u ñoanianu. #Coa 6.13-21. 24Ŋan taa ba, ki taani leni ba ki ŋanbi aba ki ñani li kuali, ki pa ban bili yaa panpaani ban baa ki kuo. Lani, bi niba kuli baa bandi ke ban den gbadi a po yaala yeni tie faama, ki go bandi ke amoko baa ki ŋua li bali maama. 25Bi nilanba siiga yaaba n tuo ki daani yaa po, ti den diani bi po li tili, ki yedi ke ti jagi ki bili ke ban kubi bi yula ki da je i buli padijiedi kuli, ki da ŋmani mi soama leni ti yansoadikaadi, ki go kubi bi yula leni mi conconma buoli kuli.» #JTT 15.29.
26Lan den fii ki faa, Poli den taa bi jaba yeni, ki taani leni ba ki wali ki ñani li kuali ki ŋanbi oba. Lani, o den kua U Tienu diegu nni, ki waani bi ŋanbima dana n baa gbeni yaa daali, ban baa padi yuakuli po yaa padili.
Bi cuo Poli U Tienu diegu nni
27A daleleeda n den bua ki pundi, yaa Jufinba n den ñani Asi diema nni ki cua Jerusalemi, den laa Poli U Tienu diegu nni. Bi den maadi ki fiini ku niligu pali ki cuo Poli, 28ki tangi ki tua: «Isidayeli yaaba, cua mani ki todi ti. Yaa joa n tie ne, caa i kaani kuli ki bangi bi niba, ke tinba Jufinba, li bali maama leni u naa kaanu kuli ki pia mayuli. O kuani ba Girekinba U Tienu diegu nni, ki joagini u naa kaangagidiŋamu.» 29Bi den yedi yeni kelima bi den kpa laa ke Poli yegi leni Efesi yua Tirofimi, yua n tie nilamo, Jerusalemi nni. Bi den tama ke Poli kuani o U Tienu diegu nni. #JTT 20.4.
30U dogu nni yaaba kuli yama den lengidi, ke bi ñani i kaani kuli ki sani ki taani. Bi den cuo Poli ki fuli ki ñani o U Tienu diegu nni. Lanyogunu, bi den luoni ku buliñoana. 31Ban den moandi ki bua ki kpa Poli, li laabaalo den pundi Loma toatieba yudanciamo kani, ke Jerusalemi kuli digi. 32Lanyogunu, o den taa bi toatieba leni bi yudanba tianba ki sani ki gedi ku niligu kani. Ban den laa bi toatieba yudanciamo leni bi toatieba, bi den cedi kaa go pua Poli. 33O yudanciamo den nagini ki cuo Poli ki teni ke bi loli o kuseselilie. Lani, o den buali wan tie yua leni wan tieni yaala. 34Ku niligu siiga, bine den tangi ki tua mine, bine mo n yaa tangi ki tua mine. Wan kaa den fidi ki bandi i moamoani kelima ku niligu fuugu po yeni, o den yedi bi toatieba ban kuani Poli bi kaanpaalu nni. 35Poli n den pundi u ŋmaadokaanu kani, li den tie tiladi bi toatieba n yugidi o tanpoli, kelima ku niligu pabiencianli po. 36Ku niligu den ŋua o ki tangi ki tua: «Kpa mani o!»
Poli maadi ki bua ki gaa o yuli
37Ban den bua ki kuani Poli u kaanpaalu nni yaa yogunu, o den buali bi toatieba yudanciamo: «A baa tuo ki pa nni u sanu min waani a bonla bi?» O den guani ki yedi o: «Naani a bani Gireki maama? 38Lanwani, ŋaa tie Ejipiti yua, yua n den fiini mi yiema ke laa waagi, ki den gedini niba tudanaa (4 000) mi fanpienma po ka?» 39Poli den guani ki yedi o: «N tie Jufi, ki tie Silisi diema Tarsi dogu yua, yaa dogu n pia mi yulolima yua. N mia ŋa ŋan cedi min maadi leni ku niligu na.» 40O yudanciamo n den tuo, Poli den se u ŋmaadokaanu po, ki tia ba o nuu ban suo. Ban den suo, o den maadi Hebilu maama#21.40 Hebilu maama: Li baa yaa tie Arameyen maama, Jufinba kuli n maadi yaa mabuolu Jesu yogunu. ki yedi ba:
Currently Selected:
Jesu Tondiba Tuona 21: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
