Jesu Tondiba Tuona 20
20
Poli leni o lieba guani ki tagini Maseduani leni Giresi diema nni
1Laa fuugu n den suo, Poli go den yini bi ŋoadikaaba ki paagi bi pala ki cabi ba, ki fii ki gedi Maseduani. 2O den tagini mi diema yeni niinni, ki maadi ki paagidi bi niba pala boncianla, ki suagi ki gedi Giresi diema nni. 3O den tieni likani ŋmaalitaa. Wan den bogini ki baa kua ku ñinbiagu nni ki gedi Siiri diema, o den bandi ke Jufinba luni o i janbi, ki bua ki cuo o. Lani yaa po, o den jagi ke o baa lebidi ki tagi Maseduani. 4Yaaba n yegi leni o den tie Bere yua, Pilusa bijua Sopate, Tesaloniki yaaba Arisitarki, Segondusi, Deba yua Gayusi, Timote, Asi yaaba Tikika leni Tirofimi. 5Bi den gaa ti liiga ki gedi Troasi, ki guudi ti likani. 6Yaa dupen n ki pia dabinli jaanma dana n den pendi, ti den kua ku ñinbiagu Filipi dogu nni, ki tieni danamuu ki nandi ti lieba yeni Troasi. Ti den tieni likani danalele.
Poli cabi Troasi yaaba
7A daleleeda cilima daali, ti den taani ki baa cabidi dupen, kelima Poli den jagi ke o baa faa ki fii. Lani yaa po, o den maadi ki waagi ki pundi hali ku yoagisiigu.#20.7 Danalele cilima daali den tie aŋada daali Jufinba leni Girekinba po. Ama Jufinba yaa po, li den ciliti asibidi yenjuagu. 8Mu fidisanmu den yabi boncianla, tin den taani yaa dietuadili nni. 9O jawaalo den ye likani ki yi Yutikusi, ki kaa li bonla po. Poli n den waagi ki maadi yeni, mi guama den gbadi o jawaalo yeni, ke o ñani li dietuaditaali po ki baa tiipo. Bi den yua o ki sua ke o kpe. 10Poli den jiidi ki buani o po ki tandi o buadi, ki soagi o ki yedi: «Da jie mani, o fo!» 11Lani, Poli den guani ki doni li dietuadili po, ki cabidi dupen ki ŋmani. O go den waagi ki maadi leni ba, hali ke li fandi. Lanwani, o den cabi ba, ki gedi. 12Bi den kuninni o jawaalo yeni o denpo ke o fo. Li den baagi ba boncianla.
Poli ñani Troasi ki gedi Mile
13Ama tinba, ti den gaa Poli liiga ki kua ku ñinbiagu nni ki gedi Asosi, tin den baa guudi Poli naankani, kelima o den baa cuoni o taana. 14Poli n den nandi ti Asosi, o den kua tin ye yaa ñinbiagu nni ke ti yegi ki gedi Mitileni. 15Ti den suagi liiga, ki duodi ki gedi. Lan den fii ki faa, ti den bali Kiyosa ki pendi. Li dalieli ti go den bali Samosi. Li dataali, ti den pundi Mile. 16Tin den pendi Efesi, tii sedi, kelima Poli den jagi ke o kan go waagi Asi diema nni. O den jaligi yeni kelima o den bua ki pundi Jerusalemi, Pantekoti jaanma yogunu, li yaa baa tuo.
Poli cabi Efesi Kilisiti Nitaanli nikpela
17Poli n den ye Mile yeni, o den soani Efesi, ban yini Kilisiti Nitaanli nikpela. 18Ban den cua o kani o den yedi ba: «Yi bani n tagu n den tie maama kuli yi siiga, hali min den kpa kua Asi diema nni yaa yogunu. 19Yi bani ke n den tuuni o Diedo po leni li yumiinli leni ti nunsiidi, ki go laadi fala, kelima Jufinba n den lu yaa janbi ki bua ki cuo nni yaa po. 20Yi go bani ke min wangi yi o Laabaaliŋamo, ki go bangi yi asala nni leni yi diedi nni kuli, mii den wuoni yi yaala n baa yaa ŋani yi po kuli. 21N den wangi Jufinba leni Girekinba kuli, ke ban lebidi bi pala U Tienu po, ki tuo ki daani ti Diedo Jesu. 22Moala, n tuo U Tienu Fuoma Yua tigini, ki caa Jerusalemi, ki naa bani yaala n baa n tieni nni lipo. 23Ama bonyenla, min gedi yaa dogi kuli, U Tienu Fuoma Yua yen wangi nni, ke ti kpaadi leni fala bili ki guu nni. 24Ama mii nua n miali ke li tie bonmoanla, yaala n pia n po mayuli tie, ke min fidi ki pundi n nuama bianu, ki dudi o Diedo Jesu n puogi nni yaa tuonli. Lani n tie, ki yaa wangi U Tienu ŋanbili Laabaaliŋamo. #2Tim 4.7.
25Ama moala, yinba min den lindi ki wangi yinba yaaba U Tienu diema maama yeni, n bani ke yi kan go le n nunga. 26Li tie lani yaa po, ke n kadi ki waani yi dinla, ke yi siiga oba kuli soama ki go maa n yuli po. 27N den waani yi U Tienu yanjagili kuli, kaa wuoni liba. 28Fangi mani yi yula, ki go yaa guu u yankulu kuli, yuu n tie Kilisiti Nitaanli, U Tienu Fuoma Yua n kaani yi yaaba siiga, ke yin yaa tie bi gobidikaaba. Yin yaa tie nani bi yankpaaba, ki kpaa U Tienu nitaanli yaaba, wan daa yaaba leni o soaceli. 29N bani ke n yaa fii, yaaba n tie nani i fuasangbanbiadi yeni, baa kua yi siiga. Bi kan cedi u yankulu. 30Ba yi siiga, bi nitianba baa ti fii ki golini mi mamoanma, ki bua ki dadi bi ŋoadikaaba bi yula po. 31Lani yaa po, yin yaa guu mani, ki yaa tiani ke hali binataa banlu, n tuodi ki tundi yi siiga yuakuli leni ti nunsiidi ku ñiagu leni u yensiinu kuli, mii cedi.
32Moala, n taa yi ki piani U Tienu leni o ŋanbili maama, yaama n baa fidi ki teni yin yaa kpedi ki paagidi o sanŋoadima nni, ki go teni yin baa u biinu wan bili yaa ŋalimano o nigagidiŋanba kuli po. 33Mii den kuani n yama oba kuli ligi nni, o wula nni, yaa ka o tiadi nni. 34Yinba yi ba bani ke n den tuuni leni n nii na, ki baadi min luo yaala kuli, ki go baadi n yieninlieba n luo yaala. 35N den waani li bonla kuli nni, ke yi baa yaa tuuni yene, ki todi a tadima. Yin tiadi o Diedo Jesu n den maadi yaa maama: ‹Yua n puni bu paabu pia li pamanli ki cie yua n gaa bu.› »
36Poli n den yedi yeni, o den gbaani ki taani leni bikuli, ki jaandi. 37Bikuli den buudi boncianla, ki gobini Poli leni mi buama. 38Yaala n den biidi bi pala ki cie tie, ke o yedi ke bi kan go le o nunga. Bi den piadi o hali ku ñinbiagu kani.
Currently Selected:
Jesu Tondiba Tuona 20: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
