Jesu Tondiba Tuona 19
19
Poli kali Efesi
1Apolosi n den ye Korenti yaa yogunu, Poli den tagi ki poandi Asi diema yaama n pia a juana, ki ban pundi Efesi. O den laa bi ŋoadikaaba bi tianba likani, 2ki buali ba: «Yin den daani yaa yogunu, naani yi den baa U Tienu Fuoma Yua?» Bi den guani ki yedi o: «Ti daa gbadi ke U Tienu Fuoma Yua ye moko.» 3O den yedi ba: «Bi nan den batisi yi mi laa batisime?» Bi den guani ki yedi o: «Jan yaa batisime.» 4Poli den yedi: «Jan den batisi yaaba n lebidi bi pala, ki go yedi ban tuo ki daani yua n baa yuandi ki cua o puoli, lani n tie Jesu.» #Mat 3.11; Mrk 1.4,7-8; Luk 3.4,16; Jan 1.26-27. 5Ban den gbadi lani, bi den tuo ke bi batisi ba o Diedo Jesu yeli nni. 6Poli den maani bi po o nii, ke U Tienu Fuoma Yua jiidi bi po, ke bi maadi mi malanma ki pua saawali. 7Bikuli den bua ki pundi piiga n nibilie.
8Poli den caa li bali maama bangima dieli nni, ki maadi ba leni li papaali hali ŋmaalitaa, ki moandi ban tuo ki gaa U Tienu diema maama fuuli. 9Ama bi tianba pala den juagi, baa tuo ki gaa o maama ke mi tie moamoani. Bi go den sugidi o Diedo Jesu sanŋoadima bi niba kuli nintuali. Lani yaa po, Poli den ŋaa ba, ki taa bi ŋoadikaaba ki piadi ki maadi leni ba Tilanusi cogidieli nni. 10Poli den caa likani daali, kuli ki maadi leni bi niba hali binalie, ke yaaba n ye Asi nni kuli, Jufinba leni Girekinba kuli, den gbadi o Diedo maama.
Sefa bijaba maama fuuli
11U Tienu den teni ke Poli tiendi leni o nii bi niba siiga yaa bancianma n pia ki lidiga. 12Ba bi yaa den taa yaa tiayiekaadi, bi yaa cabimu n sii Poli, ki maani a yiama po, kali bi yiani n kagidi bi po. Mu cicibiadimu mo den ña ban ye yaaba yaa niinni.
13Jufinba bi tianba den ye ki goadi ki deli mu cicibiadimu bi niba kani. Bimoko den taagi o Diedo Jesu yeli, ki maadi mu cicibiadimu, ki tua: «Jesu, Poli n maadi yua yaa maama yeli po, n yedi yi yin ña bi naa niba niinni.» 14Yaaba n den tiendi yeni den tie bi kopadicianba yudanba siiga yendo, ke bi yi o Sefa bijaba. Bi den tie nibilele. 15Ki cicibiadiga den guani ki yedi ba: «N bani Jesu, n bani Poli mo n tie yua, ama yinba, yi tie ŋmenba?» 16Lani, ki cicibiadiga n ye yaa joa niinni den bibi ba, ki paadi bikuli leni u paalu, ki poagili ba, ke bi ñani li dieli nni, ki poagili poagili ki sani mubima. 17Jufinba leni Girekinba yaaba n ye Efesi kuli den gbadi li laabaalo, ke ti jawaandi cuo bikuli boncianla. O Diedo Jesu yeli den baa ti kpiagiciandi. 18Yaaba n den tuo ki daani siiga boncianla den kpendi ki togidi bi niba nintuali, ban den tieni yaala. 19Bi siiga, i ñoagibiadi danba boncianla den cuani bi tila ki juu ŋa u mu nni, bi niba kuli nintuali. Bi den coadi a tila yeni kuli dunga, ki sua ke li bua ki pundi kujapiena tuda piimuu (50 000). 20Yeni yaa po, o Diedo maama den yadi leni u paalu ki pugidi.
Efesi yaaba fiini mi janjanma
21Lani n den tieni ki pendi, Poli den jagi ki bili ke o baa tagi Maseduani leni Akayi po, ki gedi Jerusalemi. O den yedi: «N yaa gedi laa diema kuli, li tie tiladi min yuandi ki gedi Loma moko.» 22O den soani o todikaaba siiga nibilie, Timote leni Erasiti Maseduani po, wani o ba go den kali danaba Asi diema nni.
23Lanyogunu, mi janjancianma den fii Efesi po, kelima o Diedo sanŋoadima po. 24O maano den ye ki yi Demetriwusi, ki duadi Artemisi#19.24 Artemisi: Yeni de! Li tie Efesi yaaba bulo, ban go yi yua Diana. O den tie bupua, ban den nua ke yaa bulo n puuni ti miadi. jaandieli nannana leni ŋanjilifa, ki kuadi, ki teni ke o tuonsoanba den baa li baali boncianla ku maagu yeni po. 25O den yini o tuonsoanba leni yaaba n tuuni ku maagu tuonli kuli, ki yedi ba: «Yikuli bani ke ti baali ña ku maagu na niinne. 26Yi nan laa ki go gbadi Poli yeni n tiendi yaala. O yedi ke bi niba n tagi yaa buli leni bi nii, naa tie bonmoanla. O teni ke bi niba boncianla gaa o maama ki yaadi, baa go ŋua i buli, laa tie nekanba Efesi niinni bebe ka, li bua ki yaa tie yene Asi diema nni kuli. 27Li fidi ke bi niba baa fali ti tuonli na, yaali n tie ti loagu. Laa tie lani bebe ka, li go baa fidi ke ti bupua Artemisi yua n pia ti kpiagiciandi yaa dieli kpiagidi n bodi. Li go baa teni Asi yaaba leni ŋanduna yaaba kuli n jigindi wani yua, yaa jigidi kuli n bodi.» 28Ban den gbadi laa maama, bi pala den beni ke bi cili ki tangi ki tua: «Efesi yaaba bupua Artemisi pia ti kpiagidi!»
29U dogu yaaba kuli yama den lengidi. Bi den cuo Gayusi leni Arisitarki, Poli yegininlieba, Maseduani yaaba yeni, ki fuli ba ki jaligi ki gedini ba u taankaanu kani. 30Poli den bua ki gedi likani ki maadi li nitaanli yeni, ama bi ŋoadikaaba den yie o po. 31Ba Asi bali danba siiga, bi tianba yaaba n tie Poli danlinba den soani o kani, ki tundi o ke wan da gedi li nitaanli yeni po. 32Li nitaanli yeni den tiendi ku fuugu, bine den pia bi yaa fuugu, ke bine mo pia bi yaagu. Bi yama kuli den lengidi, ke niba boncianla naa bani ban taani yaala yaa po. 33Bi den ñani Alekisandri ku niligu siiga. Jufinba den tudi o ke wan sedi bikuli nintuali. O den tia ba o nuu, ke ban cengi wan baa maadi yaala, ki gaa o yuli. 34Ban den bandi ke o tie Jufi, bikuli den taani mayenma, ki tangi ki tua: «Efesi yaaba bupua Artemisi n pia ti kpiagidi.» Bi den waagi ki tangi yeni hali leedolie.
35Lanwani, Efesi dogu yudaano ñoaliebu den teni ke li nitaanli suo, ke o yedi ba: «Efesi yaaba, ŋme ye kaa bani ke u dociamu Efesi na kubi Artemisi, yaa bupua n pia ti kpiagiciandi yaa dieli leni o nannanli, yaali den ñani tanpoli ki baa? 36Lan ki pia niama yeni, li ŋani yin jiini yi yama ki da tieni liba leni mi yanjegibima. 37Yi cuani yaa jaba n tie ne, yaaba n kaa suni liba yi budiena nni, baa sugi yi bupua mo. 38Lanwani, li yaa tie ke Demetriwusi leni o tuonsoanlieba pia mi maama leni niloba, ti buudi dana ye, bi bujiaba mo ye. Ban maadi ban pia yaa maama leni biyaba bi nintuali. 39Yi yaa go pia matoama, mi baa jia yaa nitaanli n pia li sanu kani. 40Li baa fidi ban ti jaligi ti, ki yedi ke dinla fuugu na tie bali yiema, kelima ti kan fidi ki waani yin taani yaala yaa po.» Wan den yedi yeni, o den cabi li nitaanli.
Currently Selected:
Jesu Tondiba Tuona 19: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
