Jesu Tondiba Tuona 18
18
Poli gedi Korenti
1Li yaa puoli, Poli den fii Ateni ki gedi Korenti.#18.1 Korenti: Korenti den tie Giresi docianmoanu ki ye yaa dieboagidima n yi Akayi. 2Lankani, o den laa Jufi yendo ke bi yi o Akilasi. Bi den mali o Ponti diema nni, ama Poli n laa o yaa yogunu, li sua ke o ñani Itali diema nni, wani leni o pua Prisili. Bi den cua Korenti, kelima Loma badiciamo Kilodi den bili ke Jufinba kuli n ña Loma. Poli den gedi ki ye bi deni, 3ki taani leni ba ki tuuni. Bikuli den taa tuonyenli ki tie a gbandiena jabida. 4U Tienu fuodima daali kuli, Poli den caa li bali maama bangima dieli nni, ki maadi leni Jufinba leni Girekinba kuli, ki moandi ke ban tuo ke o Laabaaliŋamo tie moamoani.
5Ama Silasi leni Timote n den ñani Maseduani ki cua, Poli den cedi wan tuuni yaa tuonli kuli, ki taa o yogunu kuli ki wangi U Tienu maama, ki tiendi Jufinba po siedi, ke Jesu tie U Tienu n Gandi Yua. 6Ama Jufinba n den nia Poli maama ki sugidi o, o den yoagi o tiadi ki yedi ba: «Yi soama n guani ki wuli yi yula po. Mii pia lienni tagiliba kuli. Dinla liiga, n baa caa ki wangi bi nilanbe o Laabaaliŋamo.» 7O den ñani li bali maama bangima dieli nni, ki gedi ki kua ban yi yua Titiusi Jusitusi dieli nni, yaali n baali li bali maama bangima dieli. Jusitusi yeni den tie yua n fangi U Tienu. 8Li bali maama bangima dieli yudaano, ban yi yua Kilisipusi leni o deni yaaba kuli, den tuo ki daani o Diedo. Korenti yaaba boncianla moko den cengi Poli maama, ki tuo ki daani ke bi batisi ba.
9Ñiayengu o Diedo den yedi Poli ti dangidi nni: «Da jie liba, ŋan yaa maadi ki da ŋmini, 10kelima n ye leni a. Oba kan sii ŋa ki tieni a yaala n bia, kelima n pia bi niba boncianla yaa dogu n tie ne niinni.» 11Lani, Poli den tieni Korenti yaaba siiga binli leni ŋmaaliluoba, ki bangi bi niba U Tienu maama.
12Galiyon n den tie Akayi diema guveneeri yaa yogunu, Jufinba den taani ki tuu ñoabu ki yie Poli po, ki gedini o guveneeri yeni bujiali kaanu kani, ki yedi: 13«Yaa joa n tie ne bangi bi niba ki go tigini ba, ke ban lebidi ki ŋoadi U Tienu nani li bali maama n ki bili maama.» 14Poli n den bua ki yaadi ki maadi yaa yogunu, Galiyon den yedi Jufinba: «Li yaa bi tie ke yi cuo o tagiliba bi biicianliba po, ki cuani o n kani, n bi baa juuni ki cengi yi maama. 15Ama li yaa tie ke yi nia mi bangima, a yela leni yin ŋua yaa bali maama po, li ŋua yinba, mii bua ki bu ti buudi laa maama po.» 16Wan den yedi yeni o den deli ki ñani ba u bujiali kaanu kani. 17Lani, bikuli den cuo Sositeni, li bali maama bangima dieli yudaano, ki pua o li bujiali kaanu kani. Galiyon yama naa den yagini lipo.
Poli guani Antiosi
18Poli go den kali Korenti ke li waagi. Lani n pendi, o den cabi o kpiiba ki fii, wani leni Prisili leni Akilasi, ki kua ku ñinbiagu nni, ki caa Siiri diema. O den cedi ke bi kuo o Sankile dogu nni, kelima o den niani U Tienu u ñoanianu. #Coa 6.18. 19Bi den kpa pundi Efesi, Poli n den baa ŋaa Prisili leni Akilasi naani. O den kua li bali maama bangima dieli nni, ki maadi leni Jufinba. 20Bi den mia o wan sedi leni ba yogunuba, ama waa den tuo. 21O den cabi ba ki yedi: [«Mi jaanma yogunu bua ki pundi, ke li tie tiladi min yaa ye Jerusalemi, ki jaani yaa jaanma n kpendi na.] Li yaa tie ke U Tienu bua, n baa guani ki cua yi kani.» 22Lani, o go den kua ku ñinbiagu nni, ki ñani Efesi ki suagi ki duodi ki gedi Sesare.
Wan den pundi Sesare, o den ñani ku ñinbiagu nni, ki doni ki gedi#18.22 Laa yedi wan doni ki gedi naani, ama, nani lan yedi ke o fii Sesare ki doni ki gedi ki go jiidi ki gedi Antiosi yeni, li bua ki yedi ke Poli den gedi Jerusalemi. ki fuondi Kilisiti Nitaanli, ki jiidi ki gedi Antiosi.
Poli sancentaali
(18.23—21.16)
23Poli n den tieni likani yogunuba, o den fii ki goadi Galati leni Filiji diema nni, ki paagi bi ŋoadikaaba pala li dandanli nni.
Poli gedi Korenti leni Efesi
24Lanyogunu Jufi yendo yua n den tie Alekisandri dogu yua ke bi yi o Apolosi den cua Efesi. O den bani mi maama, ki go bani i Diani hali bonŋanla. 25Bi den bangi o o Diedo Jesu sanŋoadima, ke o maadi leni li yankuali ki bangi Jesu maama ke li tiegi. Leni lani kuli, waa den bani batisitoama maama, kali Jan yaama. 26Wan den cua Efesi yeni, o den cili ki maadi li bali maama bangima dieli nni leni li papaali. Akilasi leni Prisili n den gbadi o maama, bi den taa o ki gedini o bi denpo, ki doagidi o po U Tienu sanŋoadima maama, ke o bandi ma ki pugini. 27Wan den bua ki gedi Akayi diema nni, o kpiiba yaaba n ye Efesi den waani o ke wan moandi. Bi go den diani li tili bi ŋoadikaaba yaaba n ye Akayi po, ke ban gaa o cangu bonŋanla. Apolosi n den pundi Akayi, o den todi yaaba n tuo ki daani Jesu hali boncianla, kelima U Tienu ŋanbili po. 28O den nia leni Jufinba leni u paalu bi niba kuli nintuali, ki waani i Diani nni ke Jesu tie U Tienu n Gandi Yua.
Currently Selected:
Jesu Tondiba Tuona 18: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
