Jesu Tondiba Tuona 17
17
Poli leni Silasi gedi Tesaloniki
1Bi den tagini ki ñani Amifipolisi leni Apoloni dogi nni, ki ban pundi Tesaloniki.#17.1 Tesaloniki: Tesaloniki den tie Giresi diema dogu, ki tie Maseduani dociamu. Jufinba den pia li bali maama bangima dieli likani. 2Poli den kua lienni ki taani leni ba nani wan den maani ki tiendi maama. Mi fuodima dana, danataa o den boe leni ba yaala n diani i Diani nni. 3O den bundi ki doagidi ke li tie tiladi ke U Tienu n Gandi Yua n le fala, ki kpe ki go fii bi tinkpiba siiga. O den yedi ba: «Min wangi yi Jesu yua yaa maama na, wani n tie U Tienu n Gandi Yua yeni.» 4Bi siiga bi tianba den tuo ki gaa laa maama, ki taani Poli leni Silasi po. Gireki yaaba siiga moko yaaba n fangi U Tienu leni yaa puoba n den pia ti kpiagidi siiga, niba boncianla den tuo ki gaa laa maama.
5Ama li nunponli den cuo Jufinba, ke bi taani bi nibiadiba yaaba n puagi kaa pia fuoma, ke bi fiini ku niligu pali, ki fiini ku fuugu u dogu nni. Bi den gedi Jason denpo, ki baa lingi Poli leni Silasi. Bi den bua ki ñani ba ki sieni ku niligu nintuali. 6Ban kaa den laa ba, bi den cuo Jason leni ti kpiiba bi tianba, ki fuli ki gedini ba u dogu yudanba po, ki tiani ki yedi: «Bi jaba yaaba n yagini ŋanduna kuli yama cua ne, ke Jason gaa bi cangu. 7Bikuli yie Sesari bali maama, ki yedi ke baditoa ye ke bi yi o Jesu.» 8Laa maama den yagi ku niligu leni u dogu yudanba kuli yama. 9U dogu yudanba den teni ke Jason leni o lieba pani i ligi ke bi ŋaa ba.
Poli leni Silasi gedi Bere
10Ku ñiagu n den bii yaa yogunu, ti kpiiba den gedini Poli leni Silasi Bere dogu po. Ban den pundi likani, bi den gedi Jufinba n taagi yaa bali maama bangima dieli kani. 11Yaa Jufinba n ye laa dogu nni den tie nimoanba ki cie Tesaloniki yaaba. Bi den kuani bi yama ki gaa U Tienu maama, ki lingi daali kuli i Diani nni, ki baa le ban wangi ba yaala yaa tie moamoani. 12Bi siiga niba boncianla leni Gireki yaaba siiga yaa puoba n pia ti kpiagidi leni bi jaba boncianla den tuo ki daani.
13Ama Tesaloniki yaa Jufinba n den gbadi ke Poli wangi Bere yaaba U Tienu maama, bi den cua likani ki yagi ku niligu yama, ki fiini bi pala. 14Lanwani, ti kpiiba den gedini Poli lanyogunu mi ñincianma po. Ama Silasi leni Timote den sedi Bere. 15Yaaba n piadi Poli den pundi o Ateni#17.15 Ateni: Ateni den tie Giresi diema dogu, ki tie yaa dieboagidima n yi Atika dociamu. dogu nni, ki lebidi ki guani Bere ki ban waani Silasi leni Timote, ke Poli yedi ban ŋoadi o tontoni.
Poli waani Ateni dogu yaaba o Laabaaliŋamo
16Poli n den guu o lieba Ateni, o den laa ke laa dogu gbie i buli nannana ke o yama den yagi boncianla. 17Lani yaa po, o yen kua li bali maama bangima dieli nni, ki boe leni Jufinba leni yaa nilanba n fangi U Tienu. Daali kuli o go den boe ki daaga nni mo leni wan laadi yaaba likani kuli. 18Ban den yi yaa yanfuodanba Epikuriyenba leni Sitoyisieninba siiga, bi tianba den boe leni Poli. Bine den tua: «O maciandaano na bua ki yedi be?» Bine mo n yaa tua: «Li naani ke o bua ki maadi bucaaniba yaa maame.» Bi den yedi yeni, kelima Poli den wangi ba Jesu Laabaaliŋamo leni bi tinkpiba fiima maama. 19Lani, bi den taa Poli ki gedini o u dogu nikpela taanli kaanu kani. Bi den yedi o: «Naani ti baa fidi ki bandi ŋan maadi yaa bangipanma yeni? 20A teni ke ti gbadi li boncanla. Lanwani, ti bua ki bandi laa maama n bua ki yedi yaala.»
21Li den sua ke Ateni dotieba leni yaa canba n ye likani kuli, naa den tiendi bontoala, kali ki maadi, yaa ka ki cengi li boncanla bi lieba kani.
22Poli den fii ki sedi u dogu nikpela taanli kaanu yeni siiga, ki yedi: «Ateni yaaba, n laa ke yi kuani yi yama mi jaanma nni hali boncianla. 23Min goadi u naa dogu nni, n laa yin pia yaa buli kuli, ki padi a pada ki kpiagidi yi. N go laa ba padibinbinyenli po, yaa diani n tie ne: ‹Line n tie tin kaa bani yaa Tienu po.› To, yin kpiagi yua n kaa bani o yeni, n wangi yi o yaa maame. 24U Tienu yua n den tagi tanpoli, ŋanduna leni yaala n ye lienni kuli, wani yua n die tanpoli po leni ki tinga nni kuli, o yekaanu naa tie bi nisaaliba n maa yaa jaandiena ka. #1Bad 8.27; Esa 42.5. 25Waa pia yaaba n tuuni o po nani o luo bonliba ka, kelima wani n puuni bi niba ke bi ye ki fo, ki pia ban pia yaala kuli. 26O den tagi jayendo ki teni ke ŋanduna nibuoli kuli ñani o kani. O go teni ke bi yadi yadi ki ye ki tinga nni kuli. Hali ban daa den ye, o den tuodi ki bili ban baa yaa ye yaa yogunu leni ban baa ye naankani. 27O den tieni, yeni kelima o bua ban lingi wani o Diedo, ke daalinba bi yaa baaliti ki lingi o, bi baa le o. Moamoani, waa foagi leni ti siiga oba kuli. 28‹Ti fuoma, ti cenli leni ti yema kuli ye, kelima wani U Tienu yaa po.› Yi yaa baantiadi moko bi tianba yedi line: ‹Timoko tie o bila.› 29Lani yaa po, kelima ti tie U Tienu bila, laa pundi tin yaa tama, ke wani U Tienu naani leni bi nisaaliba n fidi ki taa wula, ŋanjilifa, yaa ka li tanli ki tagi yaa nannanli, bi banma leni bi yanfuoma po. 30U Tienu ki faami bi niba n den ye yaa yanpiima nni. Ama moala o wangi bi niba kuli leni i kaani kuli, ke ban lebidi bi pala. 31Wani U Tienu bili ti buudi daali, wan baa jia ŋanduna yaaba kuli buudi yaa daali leni mi teginma. O gandi o nilo, ki bili ke o baa jia laa buudi. O saa i moamoani ke li baa tieni yeni leni wan fiini yaa nilo bi tinkpiba siiga.»
32Ateni yaaba n den gbadi ke Poli maadi bi tinkpiba fiima maama, bine den ñuadi o, bine mo n yedi: «Ti go baa cengi a maama datoali.» 33Lani, Poli den ñani bi nitaanli siiga. 34Bi nitianba den taani Poli po, ki tuo ki daani. Bi siiga yendo den tie li nitaanli yua ki yi Deniisi, yendo mo den tie pua, ki yi Damarisi. Nitoaba moko den ye.
Currently Selected:
Jesu Tondiba Tuona 17: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
