Jesu Tondiba Tuona 16
16
Timote yegi leni Poli leni Silasi
1Poli den pundi Deba dogu nni ki suagi ki gedi Lisitri dogu nni. Lankani den pia ŋoadika yendo ke bi yi o Timote. O naa den tie Jufi ki tuo ki daani, o baa den tie Gireki. 2Ti kpiiba yaaba n ye Lisitri leni Ikoniyumi den tiendi Timote po yaa siedo n ŋani. 3Poli den bua ki taa Timote wan yegi leni o. Lani yaa po, o den kuani o ku koanciagu kelima yaa Jufinba n ye laa gaanilindima yaa po, kelima bikuli den bani ke Timote baa tie Gireki. 4Bi den goagoadi i dogi nni ki caagi Jesu tondiba leni Jerusalemi nitaanli nikpela n den juogi ki bili yaala ke ban kubi la. 5Lani, Kilisiti nitaana den se li dandanli nni ke li pa ke a coali mo pugidi daali kuli.
Poli laa li bonlekaala
6U Tienu Fuoma Yua naa den puni ba u sanu ban kua Asi diema nni ki waani U Tienu maama. Lani yaa po, bi den poandi Filiji diema leni Galati diema. 7Ban den nagini Misi diema banlu, bi den moandi ki baa kua Bitini diema nni, ama Jesu Fuoma den yie bi po. 8Lane bi den pendi Misi ki gedi Troasi dogu nni. 9Ku ñiagu, Poli den laa li bonlekaala nni ke Maseduani diema yua se o kani ki miadi o ki tua: «Ŋan duodi ki cua Maseduani po ne ki todi ti.» 10Poli n den laa li bonlekaala yeni, tontoni ti den lingi yaa ñinbiagu n baa gedini ti Maseduani, kelima ti den sua ke U Tienu yini ti tin ban yaa wangi o Laabaaliŋamo lankane.
Filipi dogu nni pua Lidi tuo ki daani
11Ti den kua ku ñinbiagu nni ki ñani Troasi ki duodi ki cubini ki pundi Samotasa kpendegili. Lan den fii ki faa, ti go den kua ku ñinbiagu nni ki duodi ki gedi Maseduani dogu Neyapolisi. 12Ti den fii lankani ki cuoni ki gedi Filipi dogu nni yuu n den tie Maseduani cagiyenli nni dogu ki tie Loma yaaba n den diedi naani. Ti den kali likani danaba.
13Mi fuodima daali, ti den ñani yaa bilinciamu n lindi u dogu yeni buliñoajabu kani ki gedi li kpenjaali po, kelima ti den tama ke Jufinba jaandi kaanu ye lanpo. Ti den kali ki maadi leni yaa puoba n taani likani. 14Bi siiga puoyendo den ye, yua n den fangi U Tienu, ke bi yi o Lidi. O den tie Tiatiri dogu yua, ki tie kpendo ki kuadi yaa caba n moani ke a dunga pa. O Diedo den luodi o pali ke o tuo ki gaa Poli n maadi yaa maama. 15Tin den batisi o, wani leni o deni yaaba kuli, o den mia ti ki yedi: «Yi yaa sua ke n dugi o Diedo po moamoani, yin kua mani ki yaa ye n diegu nni.» Wan den tigini ti maama po ti den tuo.
Bi kuani Poli leni Silasi li kpaadidieli nni
16Dayenli ke ti go den caa i jaandi kaanu yeni, o puotuado den tuogi ti ke yaa cicibiadiga#16.16 Gireki maama nni li yedi o Pitona lani n tie o boalo yaa cicibiadiga. n teni ke o bu ku baagu den ye o niinni ki teni ke o canbaanba baadi i ligi boncianla kelima o den bu ku baagu bi niba po. 17O den cili ki ŋua Poli leni tikuli ki tangi: «Yaa jaba n tie ne tie U Tienu yua n ye hali tanpolijoma naacenba. Bi wangi yi U Tienu tindima sanu maama.» 18O den tiendi yeni dana boncianla ke li yagi Poli yama boncianla hali ke o den ti jigidi ki maadi leni ki cicibiadiga ki yedi: «Jesu Kilisiti yeli nni, n yedi a, ŋan ña o niinni ki ŋaa o.» Lanyogunu liga ki den ñani ki ŋaa o. 19O puotuado danba n den laa ke yaala n baa kpendinni bi po i ligi yeni gbeni, bi den cuo Poli leni Silasi ki fuli ki gedini ba ki daaga po u dogu bujiaba kani. 20Bani mo den gedini ba u dogu yudancianba kani ki yedi: «Bi naa jaba yagi ti dogu yaaba yama. 21Bi tie Jufinba ki wangi ti yaa bogida n kua ti po, tinba Loma yaaba n kan tuo ya, ki kan tieni a mo.» 22Ku niligu moko den taani leni ba ki tuogi leni Poli leni Silasi. Lane bi yudancianba den teni ke bi landi bi tiadi ki pua ba i baliji. 23Ban den pua pua ba boncianla, bi den kuani ba li kpaadidieli nni ki puogi li kpaadidieli jiidika wan yaa guu ba bonŋanla. 24O jiidika yeni n den gbadi laa maama, o den kuani ba li kpaadidieli tugu nni ki kpaa bi taana ti kpaadi.
25Lan den bua ki pundi ku yoagisiigu, Poli leni Silasi den jaandi ki go yiini i yani ki pagi U Tienu, ke a kpaada cengi. 26Lanyogunu lanyogunu mi tindigibicianma den tieni hali ke li kpaadidieli tanpuuna kuli begibi. Lanyogunu liga a buliñoana kuli den luodi. Yaa kuseseli n luo a kpaada kuli den lodi. 27Li kpaadidieli jiidika den fundi. Wan den laa ke li kpaadidieli buliñoana kuli ya, o den tama ke a kpaada sani, ke o noadi o jugisiega ki baa kpa o yuli. 28Ama Poli den tiani: «Da tieni a yuli liba kelima tikuli ye ne.» 29O jiidika yeni den teni ke bi cuani o po ki fidisanga, ke o sani ki kua Poli leni Silasi n ye naankani ki jie hali ki digibi, ki gbaani bi nintuali. 30O den ñani ba niinpo ki yedi ba: «N danba, n baa tieni be ki tindi nni?»
31Bi den yedi o: «Daani o Diedo Jesu a baa tindi, fini leni a diegu yaaba kuli.» 32Lani, bi den waani o o Diedo Laabaaliŋamo, wani leni yaaba n den ye o deni kuli. 33Lanyogunu, ku ñiagu yeni liga, o den gedini ba ki ŋuudi bi nala. Lanyogunu bi den batisi o, wani leni o diegu yaaba kuli. 34O den kuani ba o dieli nni ki puni ba mi jiema. Wani leni o deni yaaba kuli pala den mangi hali boncianla kelima bi den tuo ki daani U Tienu.
35Lan den fii ki faa, bi yudancianba den soani bi toatieba yudanba li kpaadidieli jiidika kani ki yedi o: «Faabi bi jaba yeni.» 36O den togidi Poli laa maama ki yedi o: «Bi yudancianba soani ke min faabi yi. Lanwani, yin fii ki ña ki gedi leni mi yanduanma.» 37Ama Poli den yedi bi toatieba: «Bi den pua tinba Loma yaaba i gbiami bi niba nintuali ki naa kpa jia leni ti ti buudi ka no, ki go kuani ti li kpaadidieli nni. Moala bi bua ki ñani ti ŋasiili nni. Li kan tuo ki tieni yeni, se ban cua bi baa ki faabi ti.» 38Bi toatieba yudanba den ban togidi bi yudancianba laa maama. Ban den gbadi ke bi tie Loma yaaba, ti jawaandi den cuo ba. 39Bi den cua ki mia ba sugili ki ciani ki ñani ba li kpaadidieli nni ki mia ba ban ña u dogu nni. 40Poli leni Silasi n ñani li kpaadidieli nni, bi den guani Lidi denpo. Bi den laa ti kpiiba likani ki paagi bi pala, ki ñani likani ki suagi liiga.
Currently Selected:
Jesu Tondiba Tuona 16: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
