Jesu Tondiba Tuona 15
15
Jerusalemi Taancianli
(15.1-35)
Jesu tondiba leni a nikpela taanli Jerusalemi
1Bi nitianba den ñani Jude nni ki cua Siiri yaa Antiosi ki bangi ti kpiiba ki tua: «Yi yàá kua ku koanciagu nani Musa n bili maama, yi kan faabi.» #Lev 12.3. 2Poli leni Barnabasi den yie bi po, ki waagi ki nia leni ba leni u paalu. Lani yaa po, likani yaaba den jagi ki bili, ke Poli, Barnabasi leni bi siiga bi tianba baa gedini laa maama Jerusalemi, Jesu tondiba leni likani taanli nikpela po. 3Antiosi Kilisiti Nitaanli den todi ba li sancenli po. Bi den poandi Fenisi leni Samari diema kuli, ki togidi bi nilanba n den lebidi ki daani maama. Li den teni ke lanpo, bi kpiiba kuli pala den mangi boncianla laa maama po. 4Ban den pundi Jerusalemi, Kilisiti Nitaanli, bi tondiba leni a nikpela den biali ba. Bi den togidi U Tienu n den tuuni leni ba ki tieni yaala kuli. 5Li den pia Farisieninba cagili siiga, yaaba n daani. Bani n den fii ki yedi ke li tie tiladi bi nilanba n kua ku koanciagu. Bi go den waani ba ke li tie tiladi ban kubi Musa bali maama.
6Jesu tondiba leni a nikpela den taani ki baa juogi laa maama po. 7Ban den nia bi siiga yeni, Pieli den fii ki yedi ba: «N kpiiba, yi bani ke li waagi leni U Tienu n den gandi nni yi siiga, ke min yaa wangi bi nilanba o Laabaaliŋamo, ke ban tuo ki daani. #JTT 10.1-43. 8U Tienu, yua n bani bi niba pala kuli den tieni bi po siedi, wan den puni ba U Tienu Fuoma Yua nani wan den puni timoko maama. #JTT 2.4; 10.44. 9Waa den tieni gagidimiba tinba leni bani siiga. Ban den daani yeni po, o den ŋuudi ki ŋanbi bimoko yaa pala. 10Lanwani, be yaa po ke yi moandi ki baa biigi U Tienu, ki tuni bi ŋoadikaaba yaa tugili, ke tinba leni ti yaajanba kuli n kaa den fidi ki tugi yaali. 11Ama, ti daani ke ti faabi kelima ti Diedo Jesu ŋanbili po, nani bani moko yeni.»
12Li nitaanli yeni kuli den ŋmini suo, ki cengi Barnabasi leni Poli n bi togidi U Tienu n den teni ke bi tieni yaa bancianma leni yaa bonlidinkaala, bi nilanba siiga. 13Ban den maadi ki gbeni, Jaki den yedi: 14«N kpiiba, cengi mani nni. Simon#15.14 Jesu n den cili Simon yeli: «Pieli.» Diidi Jan 1.42. togidi U Tienu n den kpa noanli ki laa bi nilanba po maama, ki gandi bi siiga yaa niba n baa yaa tie o buolu. 15Laa maama taa leni bi saawalipuaba maama, nani lan diani i Diani nni maama ki yedi:
16‹Lani yaa pendi, n baa guani ki cua,
Ki sieni Davidi diegu yaagu n baa yeni.
N baa fiini ku diegbenbuona,
Ki maa ki sieni gu. #Amo 9.11-12.
17Lanwani, yaa niba n sieni kuli baa lingi o Diedo,
Bani, min yini yaaba ke ban tua n niba yeni.
18O Diedo, yua n tiendi wan jagi yaala
Hali yogu yeni, n yedi yeni.› »
19Jaki den pugini ki yedi: «Lani yaa po, min sua yaala tie ke tin da bili bi nilanba, yaaba n lebidi ki ŋoadi U Tienu yeni po, yaala n pa. 20Ama tin diani ki waani ba ke ban kubi bi yula, ki da biidi bi yula ki je i buli padijiedi, ki go kubi bi yula leni mi conconma buoli,#15.20 Yua n taani leni wan kaa loli li ñiigili leni yua, kuli conbi. ki da ŋmani ti yansoadikaadi leni mi soama. #Ñam 34.15-17; Lev 17.10-16; 18.6-23. 21Ki cili hali yogu, li den pia dogu nni kuli yaaba n wangi Musa bali maama, kelima bi den cogi ma mi fuodima daali kuli li bali maama bangima diena nni.»
Ban den diani yaa tili bi nilanba po
22Lani, Jesu tondiba, a nikpela leni Kilisiti Nitaanli kuli den sua ke li pundi ban gandi bi siiga bi nitianba, ki soani ba ban yegi leni Poli leni Barnabasi ki gedi Antiosi. Bi den gandi Jude ke bi yi o Basabasi leni Silasi, bani bi kpiiba n den jigindi yaaba. 23Bi den soani ba leni li tili ke li yedi:
«Tinba yi kpiiba, Jesu tondiba leni a nikpela, ti fuondi yinba bi nilanba, yaaba n tie ti kpiiba ki ye Antiosi, Siiri leni Silisi diema nni kuli. 24Ti gbadi ke ti siiga bi tianba den gedi yi po, tin ki den teni yaaba ñoamabonliba kuli, ke bi ban maadi yi yaa maama n yagi yi yama ki jieni yi. 25Li tie lani yaa po, ke tikuli taani yanyenma ki sua ke li ŋani tin gandi bi niba ki soani ba ban yegi leni ti buakaaba Barnabasi leni Poli, 26yaaba n den luni bi miana ti Diedo Jesu Kilisiti yeli po. 27Lani yaa po, ti soani yi kani Jude leni Silasi, ke ban yaadi ki maadi yi tin diani yaala li naa tili nni. 28U Tienu Fuoma Yua leni tinba kuli taani yanyenma ki sua ke li ŋani tin da tuni yi tugitoali, kali yaali n tie tiladi na: 29‹Yin kubi yi yula ki da je i buli padijiedi, ki da ŋmani mi soama leni ti yansoadikaadi, ki go kubi yi yula leni conconbuolu kuli. Li baa yaa ŋani yi po yin yaa kubi yi yula, ki da tieni lani kuli.
U Tienu n waani ti tiyaba!› »
30Lani, Kilisiti Nitaanli den cabi bi tondiba yeni ke bi guani Antiosi. Ban den pundi, bi den waani likani nitaanli kuli, li tili yeni maama. 31Bi den cogi li ke li mangi ba ki go paagi bi pala. 32Jude leni Silasi, yaaba n tie bani bi ba saawalipuaba, den tundi bi kpiiba ki paagi bi pala, ke ban yaa se ke li pa li dandanli nni. 33Ban den tieni likani danaba, bi kpiiba den cabi ba leni mi yanduanma, ke ban lebidi ki guani yaaba n den soani bi po. 34[Ama Silasi den sua ke li ŋani wan go sedi likani waamu.] 35Poli leni Barnabasi den waagi Antiosi, bani leni nitoaba boncianla, ki bangi, ki go wangi o Diedo maama.
Poli sancenlieli
(15.36—18.22)
Poli leni Barnabasi paadi leni biyaba
36Danaba n den pendi, Poli den yedi Barnabasi: «Tin guani tin den wangi o Diedo Laabaaliŋamo yaa dogi nni kuli, ki ban le lan tie ti kpiiba po maama.» 37Barnabasi den bua ki taa Jan ban yi yua Marki, wan yegi leni ba. 38Ama Poli den sua ke laa pundi ban go taa yua n den paadi leni ba Panfili diema nni, kaa ciani ba bi tuonli nni. #JTT 13.13. 39Mi niama den tieni bi siiga, hali ke bi paadi leni biyaba. Barnabasi den taa Marki ki kua ku ñinbiagu ki duodi ki gedi Sipiri kpendegili po. 40Poli den gandi Silasi wan yegi leni o. Bi kpiiba den mia o Diedo wan yaa ŋanbidi o po, ke o fii ki gedi. 41O den goadi Siiri leni Silisi diema nni kuli, ki pugindi Kilisiti nitaana li papaali.
Currently Selected:
Jesu Tondiba Tuona 15: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
