Jesu Tondiba Tuona 14
14
Poli leni Barnabasi ye Ikoniyumi
1Ikoniyumi po moko, Poli leni Barnabasi den kua Jufinba bali maama bangima dieli nni. Ban maadi maama den teni ke Jufinba leni bi nilanba boncianla tuo ki daani. 2Ama Jufinba siiga yaaba n den yie kaa tuo ki daani, den fiini bi nilanba pala ki teni ke baa go mani leni li dandanli yaaba. 3Poli leni Barnabasi den kali ki waagi Ikoniyumi, ki maadi leni li papaali, ki dugi o Diedo po. Wani o Diedo den saagi o ŋanbili maama yeni po i moamoani, ki teni ke bi tiendi li bonlidinkaala leni mi bancianma. 4U dogu yeni niba den paadi leni biyaba, bine den taa Jufinba po, bine mo n yaa taa Jesu tondiba po. 5Bi nilanba leni Jufinba den juogi leni bi yudanba, ki baa faligi Poli leni Barnabasi, ki lugidi ba a tana ki kpa ba. 6Poli leni Barnabasi n den bandi laa bonla, bi den sani ki gedi Likaoni, Lisitri leni Deba yaa dobila po ki cia. 7Bi den ban wangi o Laabaaliŋamo i dogi yeni nni.
Poli leni Barnabasi yema Lisitri dogu nni
8O joa den ye Lisitri dogu nni ki tie wabo. Hali ban mali o, waa fidi ki cuoni. 9O den cengi Poli n maadi yaala. Poli den nuali o ki laa ke o pia yaa dandanli n baa teni wan paagi. 10O den kpaani ki yedi o: «Fii ki sedi a taana po.» O joa yeni den fii yenma ki cuoni.
11Ku niligu n den laa Poli n tieni yaala, bi den maadi bi mabuolu, lani n tie Likaoni yaaba maama, ki kpaani: «Tin ŋua ki kpiagidi yaa tieni kpandi ki tua nani bi nisaaliba yeni, ki jiidi ki cua ti kani.» 12Bi den yini Barnabasi “Seyusi,” ki cili Poli mo yaa yeli “Hermesi#14.12 Tie ŋmabila ke bi den nua ba nani i buli yeni.,” kelima Poli n den yabi ki maadi. 13Seyusi jaandieli den ye u dogu buliñoajabu kani. Seyusi kopadiciamo den lani a naatona mi puuma, ki cuani a bu buliñoajabu kani, ki bua ki taani leni ku niligu ki padi a bi po. 14Bani Barnabasi leni Poli n den gbadi lani, bi den cuo bani bi ba tiadi ki padi, ki doagidi bi pabiidili, ki sani ki kua ku niligu siiga, ki kpaani ki yedi: 15«Be yaa po ke yi tiendi yeni? Timoko tie nisaaliba nani yinba yeni. Ti wangi yi o Laabaaliŋamo ke yin lebidi ki ŋaa yaa jaanma n tie fanma fanma na, ki ŋoadi U Tienu yua n fo, wani yua n den tagi tanpoli leni ki tinga, mi ñincianma leni yaala n ye lienni kuli. #Ñam 20.11; Ps 146.6. 16Hali u yogunkpelu, o cedi ke i nibuoli kuli ŋua bi yuceli jaanbuolu. 17Ba yeni, o naa cedi kaa ŋanbidi bi po, kelima o puuni yi ki taaga leni ku kpaangu li yogunu yaa pundi. O go puuni yi mi jiema leni li pamanli ke li kandi.» 18Ba ke bi den maadi yeni, li den sieni waamu ke ku niligu n padi li padili ki kpiagi ba.
19Li yaa puoli, Jufinba bi tianba den ñani Pisidi yaa Antiosi, ki taani leni Ikoniyumi yaaba ki maadi leni ku niligu, ki dadi bi yama, hali ke bi taani leni ba ki lugidi Poli a tana, ki fuli ki ñani o u dogu nni ki tama ke o kpe. 20Jesu ŋoadikaaba n den sedi ki lindi o, o den fii ki go kua u dogu nni. Lan den fii ki faa, o den yegi leni Barnabasi ki gedi Deba dogu nni.
Poli leni Barnabasi guani Siiri yaa Antiosi
21Ban den wangi U Tienu Laabaaliŋamo Deba ki baa bi ŋoadikaaba boncianla, bi den guani Lisitri, Ikoniyumi leni Pisidi yaa Antiosi. 22I kaani kuli, bi den paagidi yaaba n daani pala, ki tundi ba ke ban yaa se bonŋanla li dandanli nni, ki tua ba: «Li tie tiladi tin kpa le fala boncianla, ki baa ki kua U Tienu diema nni.» 23Kilisiti Nitaana yenli yenli kuli nni, Poli leni Barnabasi den gandi ki puogi yaaba n baa yaa tie taanli kuli nikpela. Ban den loli bu ñoabu, ki jaandi ki mia U Tienu, bi den taa bikuli ki piani o Diedo ban den daani yua, ke wan yaa kubi ba. 24Li yaa puoli, bi den poandi Pisidi diema nni, ki pundi Panfili diema nni. 25Ban den waani Peja dogu yaaba U Tienu maama, bi den suagi liiga ki jigidi ki gedi Atali dogu nni. 26Lankani bi den kua ku ñinbiagu nni, ki duodi ki baa guani Siiri yaa Antiosi, ban den kpa ñani naankani. Lankane yaaba n den daani den mia ke U Tienu n yaa ŋanbidi bi po, kelima ban soani ki dudi o tuonli yaali moala yeni po. 27Ban den guani ki pundi likani, bi den taani Kilisiti Nitaanli, ki togidi ba U Tienu n den tuuni leni ba ki go tieni yaala kuli leni wan den luodi li dandanli buliñoabu bi nilanba mo yaa po maama. 28Bi den waagi ki ye likani leni bi ŋoadikaaba.
Currently Selected:
Jesu Tondiba Tuona 14: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
