Jesu Tondiba Tuona 13

Poli tuonli leni o sancena

13.1—21.16

Poli sancenkpiali

(13—14)

Antiosi dogu nni Kilisiti Nitaanli soani Barnabasi leni Soli

1Kilisiti Nitaanli yaaba n ye Antiosi siiga den pia bi saawalipuaba leni bi bangikaaba. Bi yela den tie Barnabasi, Simeon ke bi go yi o Niseri, (lani n tie o niboano), Lusiwusi Sireni yua leni Manayeni yua n den taani ki fandi leni Herodi leni Soli. 2Ban den taani ki jaandi o Diedo yaa yogunu ki luo bu ñoabu U Tienu Fuoma Yua den yedi: «Gagidi mani n po Barnabasi leni Soli ke ban yaa tuuni min yini ba yaa tuonli po.» 3Lane, ban go den loli bu ñoabu ki jaandi ki mia U Tienu, bi den maani bi nii bi jaba yeni po ki cabi ba ke bi gedi.

Barnabasi leni Soli gedi Sipiri kpendegili po

4U Tienu Fuoma Yua den soani Barnabasi leni Soli yeni, ke bi gedi Selusi dogu nni, ki kua ku ñinbiagu nni ki duodi ki gedi Sipiri#13.4 Barnabasi den tie Sipiri kpendegili yua. Diidi Jesu Tondiba Tuona 4.36. kpendegili po. 5Ban den pundi Salamini dogu nni, bi den wangi U Tienu maama li bali maama bangima diena nni, Jufinba n den taagi naankani. Jan Marki den tie bi todika.

6Bi den goadi li kpendegili yeni nni kuli hali ki ban pundi Pafosi dogu nni. Lankani bi den laa o lingido, yua n tie Jufi ke bi yi o Bari-Jesu, yua n tie saawalipua-faadaano. 7O den ye guveneeri ban yi yua Sejiyusi Polusi kani. Guveneeri yeni den tie yanfuodaano. O den yini Barnabasi leni Soli kelima o bua ki gbadi U Tienu maama. 8O lingido yeni ban go yi yua Elimasi, (lani n tie o lingido), den yie bi po, ki moandi ke guveneeri n da tuo li dandanli. 9Lani, Soli, ban go yi yua Poli,#13.9 Moala laa yeli n ji baa yaa ye o Ŋantaadipaano kuli nni. yua n gbie leni U Tienu Fuoma Yua, den noanli o lingido yeni 10ki yedi o: «Fini yua n gbie leni bu nunfanbiadibu leni i janbi buoli kuli, ki tie Sutaani bijua, ki tie mi teginma kuli yibali, a kan cedi ki da go moandi ke a baa golini o Diedo jaga? 11Moala, o Diedo baa pua ŋa, ŋan tua juamo ki kan le u yienu hali danaba.» Lanyogunu liga, Elimasi nuni den biigi, ke o juani cain. O ji den baaliti ki lingi yaaba n baa dadi o. 12Guveneeri n den laa yaala n tieni, o den daani kelima o Diedo maama bangima n den cuo o pali maama po.

Poli leni Barnabasi gedi Pisidi yaa Antiosi

13Poli leni o lieba den ñani Pafosi ki kua ku ñinbiagu nni ki duodi ki gedi Panfili diema, ki pundi mi dogu Peja. Ama Jan Marki den paadi leni ba, ki guani Jerusalemi. 14Bi den fii Peja ki suagi ki pundi Pisidi yaa Antiosi. Mi fuodima daali, bi den kua U Tienu bali maama bangima dieli nni, ki kali. 15Bi yudanba n den cogi li bali maama leni bi saawalipuaba maama ki gbeni, bi den soani Poli leni o lieba kani ki yedi ba: «Ti kpiiba Jufinba, yi yaa pia tundiba bi niba po, yin maadi.» 16Poli den fii ki tia ba o nuu ke bi suo, ke o yedi ba: «Isidayeli yaaba leni yinba yaa nilanba n ŋoadi U Tienu ki fangi o kuli, cengi mani! 17Isidayeli Tienu den gandi ti yaajanba, ki teni ke bi yabidi ban den ye Ejipiti diema nni yaa yogunu. O den ñani ba mi niinni leni o paalu, #Ñam 1.7; 12.51. 18ki juuni leni ba mi fanpienma nni, ke li bua ki pundi bina piinaa. #Coa 14.34; Tia 1.31. 19Li yaa puoli, o den bolini nilanbuolilele Kanana diema nni, ki puni o buolu ke u diedi bi diema. #Tia 7.1; Jos 14.1. 20Laa bina kuli coali den bua ki yaa tie kobinaa n bina piimuu.

Li yaa puoli, U Tienu den teni ke bi bujiaba diedi ba, hali ki pundi o saawalipualo Samueli yogunu. #Buj 2.16; 1Sam 3.20. 21Lani, bi den mia o bado, ke U Tienu den dini bi po Kisi bijua Sayuli, Benjamen buolu yua, ke o tua bi bado ki die ba bina piinaa.#1Sam 8.5; 10.21. 22U Tienu den dindi o, ki gandi bi po Davidi ki dini o li bali, ki tieni o po yaa siedo n tie ne: ‹N laa ke Isayi bijua Davidi tie yaa joa n dagidi n pali po, ki baa yaa tiendi n yanbuama kuli.› #1Sam 13.14; 16.12; Ps 89.20.

23U Tienu den tieni wan den niani yaa ñoanianu, ki teni ke bi mali Jesu ke o tie Davidi puoliŋuanu, ki tie Candaano Isidayeli buolu po. 24Hali ke Jesu daa cua, Jan den wangi Isidayeli yaaba kuli, ban lebidi bi pala, wan batisi ba. #Mrk 1.4; Luk 3.3. 25Jan tuonli n den yoa mi gbenma, o den yedi: ‹Mii tie yin tama yua ka, diidi ki le mani, o baa cua n puoli. Mii pundi ba yua n baa lodi o cacaagbansiama.› #Mat 3.11; Mrk 1.7; Luk 3.16; Jan 1.20,27.

26N kpiiba, yinba Abalahama puoliŋuani leni yi siiga yaa nilanba n ŋoadi U Tienu ki fangi o kuli, li tie tinba yaa po yo, ke U Tienu soani o tondu, yuu n tie o tindima maama. 27Jerusalemi dotieba leni bi yudanba naa den bandi Jesu n tie yua, baa go den gaa bi saawalipuaba maama, ban maani ki cogi yaama mi fuodima daali kuli. Ban den jia Jesu buudi, bi den kuani laa maama n den yedi yaala ki dudi. 28Ba ke baa den laa ke Jesu tieni yaala n bia ki pundi mi kuuma, bi den mia Pilati wan teni ban kpa o. #Mat 27.22; Mrk 15.13-14; Luk 23.21-23; Jan 19.15. 29Ban den kuani i Diani n den maadi o po yaa maama kuli ki dudi, bi den joandi o ku daagu po, ki ban duani o li takuli nni. #Mat 27.57-61; Mrk 15.42-47; Luk 23.50-56; Jan 19.38-42. 30Ama U Tienu den fiini o bi tinkpiba siiga. 31O den doagidi o yuli dana boncianla, yaaba n den taani leni o ki ñani Galile ki yegi ki gedi Jerusalemi po. Moala bi tie o siedinba Isidayeli yaaba po.#JTT 1.3.

32-33Tinba ti ba wangi yi laa Laabaaliŋamo. U Tienu n den niani ti yaajanba yaa ñoanianu, o kuani u tinba yaaba n tie bi puoliŋuani yeni po, ki fiini Jesu bi tinkpiba siiga. Li diani Pisomi tili nni, dianilie kani yaa maama n tie ne:

‹A tie n Bijua,

Mini n mali a dinla.› #Ps 2.7.

34O den fiini Jesu bi tinkpiba siiga ke o kan bedi abada. O den maadi lani yaa po yo wan den yedi:

‹N baa pa yi min den niani Davidi yaa seli,

Yaali n gagidi ki ŋani, ki baa kua.› #Esa 55.3.

35Lani yaa po, o go yedi kaanto:

‹A kan tuo ke a Nigagidiŋamo n bedi.› #Ps 16.10.

36Davidi n tieni U Tienu n den jagi ki bili o po yaala o nifiima siiga, o den guani ke bi piini o, ke o taani leni o baanba ki bedi. 37Ama U Tienu n den fiini yua bi tinkpiba siiga yeni, waa bedi.

38-39Lanwani, n kpiiba, yin bandi cain ke li tie wani Jesu yaa po yo, ke bi wangi yi ti tuonbiadi sugili maama. Musa bali maama naa den fidi ki teni ke yi baa ke bi saa yi po i moamoani. Ama kelima Jesu yaa po, yua n tuo ki daani kuli tiegi. 40Lani yaa po, fangi mani yi yula ke bi saawalipuaba n den yedi yaama n da baa yi po:

41‹Diidi mani, yinba li ñuali danba,

Ti jawaandi n cuo yi, yin bodi,

Kelima n baa tieni li bonla yi dana nni,

Yaa bonla ke yi kan bi tuo ki gaa ke li tie moamoani,

Ba bi yaa togidi yi la.› » #Hab 1.5.

42Poli leni Barnabasi n den ñani, bi niba den mia ba ke ban guani ki maadi bi po laa maama buolu mi fuodima daali yaali n ŋua. 43Li nitaanli yeni n den yadi, Jufinba boncianla leni yaa nilanba n den lebidi ki ŋoadi U Tienu nani Jufinba yeni, den ŋoadi Poli leni Barnabasi. Bi go den maadi leni ba ki tundi ba ke ban yaa se U Tienu ŋanbili nni.

44U Tienu fuodima daali yaali n ŋua, li den bua ki tua u dogu yaaba kuli, yaaba n den taani ki baa gbadi o Diedo maama. 45Jufinba n den laa ku niligu yeni, li nunponli den cuo ba boncianla, ke bi sugidi Poli, ki nia wan yedi yaala. 46Poli leni Barnabasi den paagi bi pala ki yedi ba: «Li den tie tiladi ke U Tienu maama n kpa pundi yinba yaa kani, ama kelima yi yie yii gaa ma, yi nua yi yula ke yii pundi ki baa yaa miali n kan gbeni. Lani yaa po, ti baa lebidi ki gedi bi nilanba po. 47O Diedo puogi ti ki yedi yaa maama n tie ne:

‹N gandi a ke ŋan tua mi yenma i nibuoli po,

Ke ŋan yaa caani mi faabima yaaba n ye hali ŋanduna banlu kuli po.› » #Esa 42.6; 49.6.

48Bi nilanba n den gbadi mi naa maama, bi pala den mangi ke bi pagi o Diedo maama. U Tienu n den gandi yaaba ke ban baa yaa miali n kan gbeni kuli den tuo ki daani.

49O Diedo maama den yadi laa diema nni kuli. 50Ama Jufinba den moandi ki fiini yaa puoba n tie nilanba ki pia ti kpiagidi pala, bani yaaba n lebidi ki ŋoadi U Tienu nani Jufinba yeni leni u dogu nikpiaga kuli pala. Bi den fiini bi niba ke bi faligi Poli leni Barnabasi, ki deli ki ñani ba bi diema nni. 51Poli leni Barnabasi den kpia bi po bi taatama, lan tua siedi bi tudima po, ki fii ki gedi Ikoniyumi dogu nni. #Mat 10.14; Mrk 6.11; Luk 9.5; 10.11. 52Yaa ŋoadikaaba n den ye Antiosi po den ye leni li pamancianli ki go gbie leni U Tienu Fuoma Yua.

Currently Selected:

Jesu Tondiba Tuona 13: BGP

Highlight

Compare

Copy