2 Timote 3
3
Mi juodima yogunu bi niyiekaaba baa yabidi
1N bua ŋan bandi ke a juodidana yaa nagidi, yaa yogini n pa baa cua. 2Bi niba baa yaa bua bi yula ŋamu bebe, ki tua i ligi buakaaba. Bi baa yaa tie ñoakpalidanba leni japaadanba, nisugida, danyiekaaba leni ŋanwaadanba, ki go tie yaaba n kaa fangi U Tienu. 3Bi go baa yaa tie yaaba n bia ki naa gba ninñima, ki tie tuotabigu danba, yaaba n kaa kubi bi yula leni tugutongu danba, ki tie bi niŋanba kuli yibalinba, 4janbi danba, yanjegibidanba leni bi yusiedanba, ki bua yaala n mani bi po ki cie U Tienu. 5Bi baa yaa pia U Tienu tuoma nannanli, ama bi nia yaala n tie li paalu. Ŋan foagidi leni laa nibuolu. 6Bi siiga bi jatianba wuondi ki caa ti diedi nni, ki boandi yaa puoba n tadi, ki tugi ti tuonbiadi ke li bonbuaka-biadila buoli kuli die ba. 7Bi ŋua mi bangima yogunu kuli, ki naa fidi ki pundi i moamoani yaa bandima. 8Nani Janesi leni Jamibilesi n den yie Musa maama, laa niba moko yie i moamoani yene. Bi tie yaa niba yaa yantiana n joagini ki biidi, bi dandanli mo ki fidi ki sedi mi biigima nni. #Ñam 7.11. 9Ama bi kan suagi liiga bi boandi bangima nni, kelima bi yanluoma baa doagidi bi niba kuli po, nani laa niliediba yaama n den doagidi maama.
Poli tundijuodike Timote po
10Ama fini, a den ŋoadi n bangima, n tagu, n jaga, n dandanli, n dingima, n buama, n juunli, 11ban den wangi nni yaa fala leni min den ye yaa yepaama nni kuli. Be yaa fala yo ke mii den laa Antiosi, Ikoniyumi leni Lisitri dogi nni? Baa den waani nni o laa fala yo? Ama o Diedo den faabi ki ñani nni likuli nni. #JTT 13.14-52; 14.1-20. 12Moamoani yaaba n bua ki yaa cuoni ke li tiegi Jesu Kilisiti nni kuli, bi baa yaa wangi ba fala. 13Ama bi nibiadiba leni i boandi danba baa suagi liiga mi biadima nni, ki yaadi biba ki go yaa yaandi nitoaba.
14Ama fini wani, ŋan yaa se ke li pa ŋan den bandi yaala, ki go daani la nni. A bani ŋan den bandi la yua yaa kani. 15Hali a biwaama nni a bani i Diani. I baa fidi ki pa ŋa mi yanfuoma, yaama n baa ciani a mi tindima nni, kelima a daani Jesu Kilisiti. 16I Diani kuli den diani U Tienu gobidima yaa niinni. I pia mi fuoma mi bangima po, ki maadi ki co bi niba, ki tundi ba mi tudima nni, ki go bangi ba mi teginma nni. 17Lani n tie U Tienu nilo n ŋanbi cain, ki bogini ki fidi ki yaa tiendi a tuonŋama kuli.
Currently Selected:
2 Timote 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
