2 Timote 2
2
Jesu Kilisiti minteelidugika
1Lanwani, fini n biga, yaa paagidi a pali yaa ŋanbili n ye Jesu Kilisiti niinni. 2Ŋan den gbadi n kani yaala siedinba boncianla nintuali, amo n piani la bi nidugikaaba, yaaba mo n baa fidi ki yaa bangi nitoaba. 3Ŋan tuo ki gaa fala leni nni, nani Jesu Kilisiti minteeliŋanli yeni. 4Yua n tie minteeli, ki bua ki mangi o toagoli yudaano pali, kan pa o yuli mi yema bonbuakaala po. 5Yua n tiini mi nuama kan baa panpaani, se wan sani nani ban bili maama. 6O kpakpaalo yua n tuuni o tuonli leni fala, n tie yua n baa kpa baa o tuonli ñuadi. 7Ŋan gaa min yedi a yaala na, kelima o Diedo baa pa ŋa mi yanfuoma, ŋan fidi ki bandi likuli.
8Ŋan yaa tiani Jesu Kilisiti po, yua n den fii bi tinkpiba siiga, wani yua n tie Davidi puoliŋuanu, nani min wangi yaa Laabaaliŋamo n yedi maama. 9Laa Laabaaliŋamo yaa po yo, ke n laadi fala hali ke bi kpaa nni ti kpaadi, nani n tie o nibiado yeni. Ama baa kpaa U Tienu maama wani. 10Lani yaa po, n tuo likuli, kelima bi nigandikaaba po, ke bani moko n baa yaa tindima n ye Jesu Kilisiti nni leni yaa kpiagidi n kan gbeni. 11Mine n tie mi madugikaama:
Ti yaa kpe leni o,
Ti baa yaa ye ki fo leni o.
12Ti yaa juuni fala nni,
Ti baa diedi leni o.
Ti yaa nia o,
Omo baa nia ti. #Mat 10.33; Luk 12.9.
13Ti yàá tie wan baa fidi ki dugi yaaba yaa po,
Wani wani tie tin fidi ki dugi yua yaa po,
Kelima o kan tieni yaala n baa nia wan tie maama.
U Tienu n baa pagi yaa tuonsoanba
14Ŋan yaa tiadi ba laa maama kuli, ki tundi ba U Tienu nintuali ke ban da nia leni biyaba mi maama bundima po, kelima laa pia todima ba waamu. Ama li baa bolini yaaba n gbadi ma bebe. 15Ŋan moandi ki doagidi U Tienu nintuali ke a tie ban biigi ki pagi yaa nilo, nani yaa tuonsoanlo n kaa jie i fe o tuonli po, ama ki wangi i moamoani maama ke li tiegi. 16Ŋan sani ki foagidi leni mi mafanma, yaama n nia li dandanli. Yaaba n kubi ma baa suagi liiga U Tienu yiema nni yogunu kuli. 17Bi maama tie nani yaa nabiadili n lugi ti gbanandi yeni. Imene leni Fileti tie bi siiga yaaba. 18Bi den yaadi ki ŋaa i moamoani, ki yedi ke bi tinkpiba fiima pendi, ki guliti bi tianba dandanli. 19Ba yeni, U Tienu n puu yaa tanpuuli se bonŋanla, ki ñii mi naa maama po: «O Diedo bani o yaaba.» Li go yedi: «Yua n yedi ke o tie o Diedo yua kuli, n sani ki ŋaa mi biadima.» #Coa 16.5.
20Li diecianli nni, a kan le yaa tadimu n tie wula leni ŋanjilifa bebe ka, a go baa le yaamu n tie ti daadi leni ti tandi moko. Mu taditianmu ye yaa tuona n pia ti kpiagidi po, mu tianmu mo a tuonfana po. 21Lanwani, o nilo yaa ŋanbi o yuli ki paadi leni min maadi yaa biadima maama na kuli, o baa yaa tie nani yaa tadiga n tie a tuonkpiaga po yeni. O canbaa gagidi laa tadige o tuonli po. Laa tadiga pia mi fuoma, ki bogini ki dagidi yaa tuonli n ŋani kuli po.
22Ŋan sani ki ŋaa bi nipanba bonbuaka-biadila, ki yaa lingi mi teginma, li dandanli, mi buama, mi yanduanma, ki taani leni yaaba n jaandi o Diedo leni li papienli. 23Ŋan yie yaa niama n ŋua mi yanluoma, kelima a bani ke mi fiindi a koana. 24Laa ŋani o Diedo naacemo n yaa pia a koana, ama wan yaa tie yua yaa yama n dingi bi niba kuli po, ki yaa pia mi bangima paabu, ki go yaa pia li juunli. 25Wan go yaa tie yua n tundi yaaba n yiedi o po leni mi dingima, ki yaa sugini U Tienu n pa ba ban lebidi bi pala, ki fidi ki bandi i moamoani. 26Lani n tie ban go guani ki baa bi yama ki ña Sutaani jogidi nni, yii n den cuo ba ki teni ke bi tiendi o yanbuama.
Currently Selected:
2 Timote 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
