2 Korenti 9
9
Mi todima ti kpiiba po
1Yaala n tie bi nigagidiŋanba todima po, mii go nua ke li tie tiladi min diani yi po. 2N bani yin pia yaa yankuali laa todima po. N pagi n yuli lipo Maseduani yaaba kani. N wangi ba ke Akayi diema yaaba bogini laa todima po, hali yaa binli n pendi. Yi yankuali yeni den tigini bi siiga bi niba boncianla. 3N soani ti kpiiba yi kani, kelima mii bua min pagi yi maama laa bonla nni, n tua fanma fanma. N bua ke yin bogini ki gbeni, nani min yedi maama. 4Maseduani yaaba yaa yegi leni nni, ki sua ke yii bogini ki gbeni, ti baa le i fe leni tin den pia yi po yaa dugidi yeni, mii go maadi yi yaa fe maama wani. 5Lani yaa po, n den sua ke li tie tiladi min mia ti kpiiba, ban gaa n liiga ki gedi yi kani, ki taani yin den niani ke yi baa pa yaa todima. Lanwani, laa todima baa bogini min cua yaa yogunu, ki tie yin puni yaama leni ti bulicindi, ki naa tie mundibu.
6Yin bandi ke yua n buli waamu baa yendi waamu, yua n buli boncianla mo baa yendi boncianla. 7Nilo kuli n pa nani wan den jagi ki bili o pali nni maama, ki da pa leni pabiidili, yaa ka kelima paalu po. U Tienu bua yua n puuni leni li pamanli. 8U Tienu baa fidi ki teni o ŋanbili n yaa wuli yi po li bonla kuli nni, ke yogunu kuli yin yaa pia ke li kandi, ki fidi ki soani tuonŋanli kuli, 9nani lan diani maama:
«O yadi o seli a luoda po,
O teginma ye hali yaa yogunu kuli.» #Ps 112.9.
10Wani yua n puuni o kpakpaalo i bonbuoli, ki go puuni o o bonjekaala, baa pa yi yin fidi ki buli yi bonbuoli ki pugini, ki go teni yi bulicindi yeni bonluonkaala n yabidi. #Esa 55.10. 11Yeni yi baa yaa pia ke li dagidi li bonla kuli nni, ki yaa puuni leni ti bulicindi yogunu kuli, ke yin soani ti tin teni yaaba yi todima yeni, baa yaa tuondi U Tienu. 12Yin tieni yaa todima yeni baa todi bi nigagidiŋanba, ki go teni i tuondi n yabidi boncianla U Tienu po. 13Laa tuonli n pia yaa ñuadi po teni, ke bi pagi yi leni yin tuo ki go ŋua Kilisiti Laabaaliŋamo leni yin puni bu paabu leni ti bulicindi maama, bani yaa po leni bi niba kuli po. 14Bi go jaandi U Tienu ki miadi o yi po leni mi buama boncianla, kelima wan puni yi yaa ŋanbicianli po. 15U Tienu n baa i tuondi o paabu yaabu n ki pia maama yeni po.
Currently Selected:
2 Korenti 9: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
