2 Korenti 10
10
Poli fu leni yaaba n nua ke waa tie tondo
10—12
Poli maadi ki baa gaa o yuli
1Mini Poli n tundi yi, kelima Kilisiti yumiinli leni o dingima po, mini yua n dingi yi siiga, ama n yaa foagi leni yi n tie nipaalo yi po. 2N mia yi ke n yaa cua yi kani, yin da tieni yaala n baa teni min yaa pia yi po ki mabinga. N nua ke li fidi min mabini bi nitianba, yaaba n nua ke tin tiendi yaala yi siiga, ŋua bi nisaaliba n nua maama. 3Ba ke ti tie nisaaliba, tii tiendi bu toabu nani bi nisaaliba n tiendi maama. 4Tin togidi ti yibalinba leni yaa toatiadi naa tie bi nisaaliba yaadi, ti tie yaa toatiadi n pia U Tienu paalu, yuu n fidi ki bolini yibalinba kaanpaali. 5Ti guli yanmaalima buoli kuli leni ti yantia-japaadi yaala n fii ki yie U Tienu bandima po kuli. Ti go cuo ki dadi a yantiana kuli ke ŋan tuo ki yaa ŋua Kilisiti. 6Ti go bogini ki baa cuo yiema kuli, yi tuoma yaa dagidi cain yaa yogunu.
7Diidi mani lan tie maama moamoani. Niloba yaa nua ke o tie Kilisiti yua, wan yaa tiani ke tinba mo tie Kilisiti yaaba nani wani n tie Kilisiti yua maama. 8O Diedo den dini nni li bali, ke min todi yi yin suagi liiga o sanŋoadima nni, laa tie ke min guli yi ka. Ba ke n mangi n pali laa bali po ki pendi waamu, fe ki pia nni li po. 9Mii bua lan yaa tie nani n bua ki jieni yi leni n tila yeni. 10Bi nitianba maadi n maama ki yieni: «Poli tila pia li mabinli leni u paalu, ama o yaa ye ti siiga wani, o tie tadimo, o maama mo ki pia fuoma.» 11Yaaba n yieni yeni n faami line, tin foagi leni yi ki maadi maama ti tila nni, ti bontienkaala mo baa yaa tie yene, tin ye yi siiga yaa yogunu.
12Ti kan tuo ki biigi ti yula ki dagini leni bi nitianba, yaaba n pagi bi yula. Bi tie yanluodanba leni ban biigidi bi yula leni bani bi ba yaa bonbiigikaala. 13Tinba wani kan pagi ti yula leni yaa tuonli n pendi U Tienu n bili ti po yaa banlu. Ti baa pagi ti yula leni wan bili ti po yaa banlu, wani yua n puni ti u sanu, ke ti pundi hali yi kani. 14Ti yàá den pundi yi kani, tin pagi ti yula maama yeni bi baa pendi, ama laa tie yeni, kelima ti den pundi yi kani ki wangi Kilisiti Laabaaliŋamo. 15Tii pendi ti banlu, tii pagi ti yula leni nitoaba yaa tuona. Tin sugini yaala mo tie ke yi dandanli ti Diedo po n yaa pugidi, ke ti tuonli yi siiga moko baa pugini, ki ŋua U Tienu n bili ti po yaa banlu. 16Tin go sugini yaala tie ki pendi yi diema ki suagi liiga moko, ki ban yaa wangi o Laabaaliŋamo yaa diema n ye yi liiga, ki da mangi ti pala leni U Tienu n teni ke nitoaba kpa naankani.
17Lanwani, nani lan diani maama: «Yua n baa jigini o yuli, wan jigini o yuli, o Diedo nni.» #Jer 9.24. 18Laa tie yaa nilo n tieni o yuli siedi ka, baa baa o Diedo n saa o po i moamoani. Ama o Diedo n tieni yua yaa po siedi n baa baa wan saa o po i moamoani.
Currently Selected:
2 Korenti 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
