2 Korenti 8
8
Mi todima li dandanli yaaba, yaaba n ye Jude po
8—9
Mi ligitaanma bi nigagidiŋanba todima po
1Ti kpiiba, ti bua yin bandi U Tienu ŋanbili n doagidi maama Kilisiti Nitaanli Maseduani diema nni siiga. #Lom 15.26. 2Ba ke bi den laa fala hali boncianla, kelima yaa biigima n den kpendi bi kani yaa po, bi pamankandikaali po bi den puni mi todima leni ti bulicindi, ba leni bi luobiadima. 3N tieni bi po siedi ke bi den puni mi todima nani ban fidi maama bi yama po, ba ki cie bi fidu banlu moko. 4Bi go den mia ti leni i tigini boncianla yaa ŋanbili n tie ke ban fidi ki taani leni nitoaba, ki todi U Tienu nigagidiŋanba. 5Bi den tieni ki cie tin den tama maama, kelima bi den kpa puni bi yula o Diedo, ki yuandi ki puni tinba mo bi yula, U Tienu yanbuama po. 6Lanwani, ti den mia Titi wan soani laa todima tuonli ki dudi, nani wan den cili li yi kani maama. 7Yi pia li bonla kuli ke li dagidi. Lani n tie li dandanli leni mi mawangima, mi bancianma leni mi buama ti po, yin doagidi ke yi pia li bonla kuli ke li dagidi mi naa todima nni moko.
8Mii bili yi po n ñoamabonbilikaali ka, n togidi nitoaba yaa yankuale, ki bua ki biigi ki le yi buama yaa tie buamoanma. 9Yi bani ti Diedo Jesu Kilisiti ŋanbili, wani yua n den tie piado den tua luodo kelima yi yaa po, ke o luoma yeni teni ke yimo n baa lan kandi.
10N waani yi min sua yaala laa todima po. Li ŋani yi po yin tieni ki dudi yin den cili yaala. Yinba yaaba n den kpa bua ki tieni laa todima, yi cili ki tieni ma hali jeli. 11Lanwani, moala yin soani ki dudi, ke nani yin den pia li yankuali ki cili maama, yin go yaa pia laa yankuali buolu ki tieni ki dudi yeni, nani yi fidu n dagidi maama. 12O nilo yaa pia li yankuali ki baa tieni mi todima, U Tienu baa gaa la ki nua o piama banlu, ki naa nua wan ki pia yaala.
13Laa tie ke n bua yin kua mi luoma nni nitoaba todima po ka, ama ke likuli n yaa da. 14Moala yin pia yaala ke li sieni baa todi ba ban baa ban luo yaala. Dayenli bani mo yaa pia ke li sieni ke yinba mo luo, ban todi yi, ke likuli n yaa da. 15Nani lan diani maama: «Yua n den wodi boncianla naa den pia ke li sieni, yua n den wodi waamu mo, laa den poadi o.»#Ñam 16.18.
Titi leni o yegininlieba maama
16U Tienu n baa i tuondi leni wan teni ke Titi pia laa yankuali nani timo n pia yi po maama. 17O den tuo ti miabu ke o baa gedi yi kani, wani o ba yama den ye lienni, hali maama ke o fii ki caa leni li yankuali. 18Ti soani o leni ti kpiilo yua yaa pagidi n yadi Kilisiti Nitaana siiga, kelima o tuonli o Laabaaliŋamo po. 19Kilisiti Nitaana gandi o ke wan yaa tie ti yegininlielo mi naa todima tuonli nni. Ti kubi laa tuonli o Diedo kpiagidi po, ki bua ki doagidi ke timoko yama ye lienni. 20Ti tieni yeni, kelima tii bua ban jaligi ti leni ban piani ti tin cuani yaa todicianma. 21Tii lingi yaala n ŋani o Diedo nintuali bebe ka, ti lingi la bi nisaaliba moko yaa nuni po.#Kpa 3.4.
22Ti go soani nitoa leni ba. Omoko tie ti kpiilo, tin biigi yua i yogini boncianla, ki sua ke o pia li yankuali. Moala o yankuali go yabidi, kelima wan pia yi po yaa dugiciandi yaa po. 23Yaala n tie Titi yaa po, o tie n yegininlielo leni n tuonsoanlielo yi kani. Ti kpiiba yeni mo tie Kilisiti Nitaana, ya n tie o kpiagidi yeni yaa tondiba. 24Lanwani, yin doagidi mani Kilisiti Nitaana kuli po yi buama, ki go teni ban bandi ke ti pia moamoani leni tin jigini ti yula yi po bi nintuali yeni.
Currently Selected:
2 Korenti 8: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
