2 Korenti 5
5
1Ti bani ke ti gbanandi yaadi n tie nani li gbandieli, tin ye yaali yaa niinni li ŋandunli nni baa bodi. Li yaa bodi, ti pia li dieli tanpoli po, nisaalo n ki maa yaali. Li tie U Tienu n maa yaali, ke li baa yaa ye hali yaa yogunu kuli. 2Ti ye leni fala ki duni li naa gbandieli nni, kelima ti bua hali boncianla ki la tin pia yaa dieli tanpoli po, nani li liadili yeni. 3Lani, ti kan yaa ye mubima, ama ti baa yie ti tiadi. 4Ama, tin da ye li naa gbandieli nni, ti duni ki laadi fala ki go coagini. Laa tie ke ti bua ki landi ti naa gbanandi ka, ama ti bua ki la ti gbananpandi, ke li miali n nali yaala n baa kpe. 5U Tienu den tagi ti laa lebidima po, ki puni ti o Fuoma ke mi tie nani i kpaaligi yeni.
6Lani yaa po, ti jigi co yogunu kuli. Ti bani ke tin da ye ti gbanandi na niinni yaa yogunu, ti da foagi leni o Diedo. 7Ti cuoni leni li dandanli, tii cuoni leni tin nua yaala ka. 8Yeni de! Ti jigi co! Yaala n cie ti po tie tin ña, ki ŋaa ti diegu yaagu n tie ti gbanandi na, ki gedi ki ban yaa ye o Diedo kani. 9Lani yaa po, tin ye ti gbanandi nni leni tin ñani ti niinni kuli, ti moandi ki baa yaa mangidi o pali. 10Li tie tiladi ke tikuli n sedi Kilisiti bujiali kaanu kani, ke yuakuli n gaa wan den ye o gbanandi nni ki tiendi yaala yaa panpaani, lan tie yaala n ŋani bi yaala n bia. #Lom 14.10.
Ti mangi leni U Tienu kelima Kilisiti po
11Nani tin bani o Diedo fangili n tie yaala yeni, ti moandi ki maadi ki guli bi niba. U Tienu bani ti cain, n sugini ke hali yi pala tugidi nni yimoko bani ti cain.
12Tii didi tieni ti yula siedi yi kani ka. Ama ti puni yi u sanu, ke yin yaa mangidi yi pala kelima ti po. Lani n tie yin fidi ki guani bi nitianba yaaba n pagi bi yula leni ban nua o nilo maama po. Baa faami ki diidi yaala n ye o nisaalo pali nni. 13Ti yaa luo mi yama, li tie U Tienu po, ti yaa pia ma mo, li tie yinba yaa po yo. 14Kilisiti buama die ti ki tigini ti, kelima niyendo yaa den kpe bi niba kuli po, lanwani bi niba kuli kpe. 15O den kpe bikuli po, ke yaaba n fo n da go yaa ye bi yucela po ka, ama wani yua n den kpe ki go fii bi tinkpiba siiga yeni yaa po.
16Lanwani moala liiga, tii go nua oba kuli nani o nisaalo n nua bi niba maama. Ba ke ti den kpa nua Kilisiti nani o nisaalo n nua maama, moala tii go nua o yeni ka. 17O nilo yaa ye Kilisiti nni, o tie tagipanma, li bonkpelila pendi, li bonla kuli tua bonpanla. 18Lani kuli ñani U Tienu kani, wani yua n teni ke ti mangi leni o, kelima Kilisiti yaa po, ki puogi ti yaa tuonli n tie, ki teni bi niba n guani ki mangi leni o. 19U Tienu den ye Kilisiti nni, ki teni ke ŋanduna n guani ki mangi leni o, kaa coadi bi po bi tuonbiadi. O den puogi ti tin yaa wangi ke bi niba n guani ki mangi leni o.
20Lanwani, ti tie Kilisiti badibaanba. Li tie nani U Tienu oba n maadi ti ñoana nni ki tundi yi. Ti miadi yi Kilisiti yeli nni: «Guani ki mangi mani leni U Tienu.» 21Wani Kilisiti yua n ki den bani tuonbiadi, U Tienu den teni ke o tua ti tuonbiadi tinba po, ke timo n baa ki tua o yaa niinni U Tienu niteginkaaba.
Currently Selected:
2 Korenti 5: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
