2 Korenti 4
4
Yaa bonmoanla n ye ti tandi tiadi nni
1Nani U Tienu n gbadi ti ninñima, ki puogi ti li naa tuonli yeni, ti kan luo papaali. 2Ti yie yaala n pia i fe ki tiendi ŋasiili nni kuli. Tii tiendi liba leni nunfanbiadibu. Tii lu ki lebidi U Tienu Maama baa waamu. Ama ti doagidi i moamoani, ki tendi ke bi niba kuli pala siedi dua ti po U Tienu nintuali. 3Tin wangi yaa Laabaaliŋamo yaa baa ki duagi, o duagi yaaba n bodi yaa po, 4bani yaaba n kaa daani po. Sutaani, yua n die ŋanduna na, juani bi yantiana, ke ban da le Kilisiti yua n tie U Tienu nannanli yaa Laabaaliŋamo kpiagidi yendima. 5Ti mawangima nni, tii wangi ti yula ka, ama ti wangi Jesu Kilisiti o Diedo, ki yi ti yula yi naacenba, kelima wani Jesu yaa po. 6U Tienu yua n den yedi: «Mi yenma n yendi li biigili nni,» teni ke mi yenma yendi ti pala nni, ki puni ti U Tienu kpiagidi yaa bandima, yaadi n yendi Kilisiti nunga nni. #Cil 1.3.
7Laa bonmoanla, ti kubi la ti tandi tiadi nni, ke lan doagidi ke laa paacianmoanu tie U Tienu yaa paalu yo, ke laa tie ti yaa yu ka. 8Falabuoli kuli mabindi ti, ama yii paadi ti. Ti yama yagini, ama ti jigi naa cie. 9Bi yen wangi ti fala, ama U Tienu ki ŋaa ti. Bi yen guliti ti, ama baa bolindi ti. 10Yogunu kuli ti tugi Jesu kuuma ti gbanandi nni, ke wani Jesu miali mo n yaa doagidi ti gbanandi nni. 11Tinba yaaba n da fo, ti ye mi kuuma nni yogunu kuli, kelima Jesu po, ke wani Jesu miali n yaa doagidi ti gbanandi yaadi n baa kpe yaa niinni.
12Lanwani, mi kuuma tuuni ti niinni, ama li miali n tuuni yi yaa niinni. 13Ti pia yantiayenli ti dandanli nni nani lan diani maama: «N daani, lani yaa po yo ke n maadi.» Timoko ti daani, lani yaa po yo ke ti maadi. #Ps 116.10. 14Ti bani ke wani yua n den fiini o Diedo Jesu bi tinkpiba siiga, baa fiini timo leni Jesu, ki teni ke tinba leni yinba kuli n taani ki sedi o nintuali. 15Tin laa yaa yema kuli tie yi yaa po yo, ke U Tienu ŋanbili n yaa pugidi niba boncianla po, ki teni ban yaa tuondi ki pugidi boncianla o kpiagidi po.
Ki yaa ye kelima li dandanli po
16Lani yaa po, tii luo papaali. Ba ke ti gbanandi kpeligidi ti niinni, ti pandi daali kuli. 17Tin laadi yaa fala u naa yogunu po, naa tie puu leni wan bogindi ti yaa kpiagidi po. Laa kpiagidi yabi ki kan pendi hali abada. 18Tii diidi bi niba n baa fidi ki le yaala ka, ama ti diidi ban kan fidi ki le yaala. Bi niba n baa fidi ki le yaala pia mi pendima, ama ban kan fidi ki le yaala naa pia pendima.
Currently Selected:
2 Korenti 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
