2 Korenti 6
6
1Lanwani, nani tin taa ki tuuni leni U Tienu yeni, ti tundi yi ke yin da fali yin den baa U Tienu ŋanbili paabu yaabu. 2O yedi:
«Li ŋanbili yogunu, n den guani a miabu,
Mi faabima daali n den faabi a.»
Diidi mani, moala n tie li ŋanbili yogunu moamoani, moala n tie mi tindima daali. #Esa 49.8.
3Tii teni oba n tudi liba kuli nni, ke ti tuonli n da tua ban baa fidi ki sugi yaali. 4Ama li bonla kuli nni, ti moandi ki pia yaa siedi n ŋani bi niba kani nani U Tienu yaa naacenba yeni, kelima tin pia yaa juunli o falaciamo nni po, mi luoma nni leni li paboanli nni kuli yaa po. 5Ti juuni leni ti puadi, a kpaadidiena nni, mi janjanma siiga, ku coagingu nni, mi duanoalima nni leni mi ñoalolima kuli nni. #JTT 16.23. 6Ti moandi ki pia laa siediŋamo, kelima ti yantugupiendi po, mi bancianma po, li juunli po, li ŋanbili po, U Tienu Fuoma Yua po leni mi buamoanma po. 7Ti moandi ki pia laa siediŋamo, kelima i moamoani maama po, U Tienu paalu po, mi teginma toatiadi, tin moa leni yaadi leni tin gaani ti yula leni yaadi kuli po. 8Ti go moandi ki pia laa siediŋamo, ban kpiagidi ti leni ban fiagidi ti yaa yogunu kuli, ban pagi ti leni ban yuandi ti kuli. Bi nua ke ti tie boandi danba, ba ke ti tie moamoandanba. 9Bi go nua ti nani bi canba yeni, ba ke bi bani ti bonŋanla, bi nua ti nani yaaba n baa kpe, ama ti fo. Bi wangi ti fala nani i tagili danba yeni, ama baa kpa ti. 10Bi nua ti nani li pabiidili danba, ama ti pia li pamanli yogunu kuli. Bi nua ti nani a luoda, ama ti teni ke niba boncianla tua piada. Bi nua ti nani tii pia puu, ama ti pia li bonla kuli.
11Yinba Korenti yaaba, tin maadi leni yi yeni, tii wuoni yi liba kuli. Ti luodi ki yaani yi po ti pala. 12Tii luoni yi po ti pala, ama yinba wani luoni ti po yi pala. 13N baa maadi leni yi nani n bila yeni, yimoko n luodi ti po yi pala.
Tin fangi ti yula leni i buli danba
14Yin da loli yi yula leni yaaba n kaa daani, lan yaa tie yi po nani ku naakpakpaadi-daagu yeni. Mi teginma leni mi biadima pia be ŋantaadi yo bi siiga? Mi yenma leni li biigili mo taani ki pia be bi siiga? 15Kilisiti leni Beliali#6.15 Beliali: Yeli bua ki yedi o nibiado. Laa yeli go tie Sutaani yaa yeli. baa dagidi leni biyaba lede? Yua n daani baa taani ki boagidi be leni yua n kaa daani? 16U Tienu diegu pia be yaa ŋantaadi leni i buli? Tinba mo n tie U Tienu yua n fo dieli, nani U Tienu wani o ba n yedi maama:
«N baa yaa ye leni ba ki cuoni bi siiga ki tie bi Tienu,
Bimo baa yaa tie n niba. #Lev 26.12; Esk 37.27; 2Kor 3.16.
17Lani yaa po, o Diedo go yedi:
‹Yin ña mani bi siiga
Ki paadi leni ba,
Ki da sii yaala n joagini kuli,
Lani, n baa gaa yi.› #Esa 52.11.
18N baa yaa tie yi po yi Baa,
Yinba mo baa yaa tie n bonjala leni n bonpola.
O Diedo U Paaciamu Kuli Daano n yedi yeni.» #2Sam 7.14; 1Baj 17.13; Esa 43.6; Jer 31.9.
Currently Selected:
2 Korenti 6: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
