2 Korenti 3
3
O Ŋantaadipaano tuonsoanba
1Naani ti didi go baa cili ki yaa tiendi ti yula po siedi? Bi ti baa bua yi kani, yaa tila n baa tieni ti po siedi, nani nitianba n tiendi maama? Bi ti baa mia yinba n diani ti po laa tila? 2Yinba yi ba n tie ti po laa tili, yaali n diani ti pala nni, bi niba kuli n bandi ki go cogi yaali. 3Li doagidi bi niba kuli po, ke yi tie Kilisiti tili, tin soani yaali. Laa tili naa den diani leni tidianñima ka, ama leni U Tienu yua n fo yaa Fuoma. Lii den diani a tana yaa walimu po ka, ama ti gbanandi yaa walimu po, lani n tie yi pala nni. #Ñam 24.12; Jer 31.33; Esk 11.19; 36.26.
4Lani n tie tin pia yaa dugidi U Tienu po kelima Kilisiti yaa po. 5Laa tie ke ti tama ke ti fidi ki tieni liba kuli ti yucela po. Ama tin fidi yaala kuli ñani U Tienu kane. 6Wani n teni ke ti dagidi ki tua o Ŋantaadipaano tuonsoanba ke laa ŋua leni ban den diani yaa bali maama, ama ke li ŋua leni U Tienu Fuoma. Ban den diani yaa bali maama kpendinni mi kuuma, ama mi Fuoma puuni li miali.#Jer 31.31.
7Lanwani, li yaa tie ke ban den diani yaa bali maama mu tanpabimu po, mani yaama n kpendinni mi kuuma yaa den pia ti kpiagidi, hali yaala ke Isidayeli yaaba kan den fidi ki diidi Musa nunga, kelima laa kpiagidi yaadi n baa pendi yeni, n ñuliti maama po, #Ñam 34.29. 8laa pia kuli tama ke U Tienu Fuoma n soani yaa tuonli baa yaa pia ti kpiagidi ki cie. 9Li yaa tie ke ti buudi cuonu tuona den pia laa kpiagidi, laa pia kuli tama ke li moamoansaali yaa tuonli baa yaa pia ti kpiagidi hali boncianla ki cie. 10Lani yaa po, yaala n den kpa pia ti kpiagidi naa tie puu, a yaa biigi ti leni ti naa kpiagidi, yaadi n cie boncianla yeni po. 11Yaala n den tie bonpendikaala yaa den pia ti kpiagidi yeni, yaala n ye ki kan pendi abada baa yaa pia ti kpiagidi boncianla ki cie.
12Li tie ke ti pia laa suginma po yo, ke ti ye leni ti dugidi. 13Tii tiendi nani Musa ka, wani yua n den fingi o nunga li cabili, ke Isidayeli yaaba n da noanli laa kpiagipendikaadi juodima. #Ñam 34.33. 14Ama bi yama den pii. Hali dinla, bi yaa cogi o Ŋantaadikpelo Diani, laa cabili baa ki ye. Li kan pigidi, li yàá tie Kilisiti nni bebe yaa ka. 15Hali dinla, bi yaa cogi Musa tila, li cabili pii bi pala. 16Ama, bi yaa lebidi bi pala ki diidi o Diedo yaa yogunu, li cabili yen pigidi. #Ñam 34.34. 17Nekanba lan yedi o Diedo yeni, li bagi mi Fuome. O Diedo Fuoma n ye naani mo, mi faabima mo ye lankane. 18Tinba yaaba yaa nunmu n pigidi, ke bi nua ti niinni o Diedo kpiagidi n ñuliti maama, U Tienu lebidi ti ke ti naani leni wani o Diedo yeni, ki baadi ti kpiagidi ki pugidi pugidi. O Diedo yua n tie mi Fuoma n tiendi lani kuli.
Currently Selected:
2 Korenti 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
