1 Timote 4
4
Poli n tundi Timote yaa tundi o tuonli po
4—6
Yaaba n bangi mi bangifaama
1 U Tienu Fuoma maadi bonŋanla ki yedi, ke mi juodima yogunu yaa nagini, bi nitianba baa ŋaa li dandanli Kilisiti nni, ki tuo ki ŋoadi i bilisinba yaa boandi leni mu cicibiadimu yaa bangima. 2Bi baa yaa ŋua bi bangi-faadanba yaa palieda, bani yaaba yaa pala siedi n kpe, nani ban juu yaala leni yaa kudi n tongi ki moandi yeni. 3Bi bangi ke joa n da taa pua, ki go bangi ke ban da di jetianma U Tienu n tagi yaama, ke yaaba n tie bi nidugikaaba ki go bani i moamoani, n yaa di ki tuondi U Tienu. 4U Tienu tagima kuli ŋani, laa pundi o nilo n fali jiemiba kuli, wan je ki tuondi U Tienu mi po, 5kelima U Tienu Maama leni i jaandi gagidi ki ŋanbi likuli.
Jesu Kilisiti naacenŋamo
6A yaa tundi ti kpiiba laa tundi kuli, a baa yaa tie Jesu Kilisiti naacenŋamo, yua n dindi o yuli leni li dandanli maama leni mi bangiŋanma, ŋan ŋoadi yaama cain yeni. 7Ama ŋan yie yaa togida n tie fanma fanma, ki nia li dandanli. Ŋan moandi ki yaa se ke li pa U Tienu sanŋoadima nni. 8Ti gbanandi tuonli pia mayuli waamu bebe, die ki bua ki yaa suagi liiga U Tienu sanŋoadima nni, lani n pia mayuli li bonla kuli po. Li niani u ñoanianu yaa miali n tie ne po leni yaa miali n baa cua moko yaa po. 9Laa maama tie mi madugikaama, ki pundi bi niba kuli n gaa ma. 10Ti tuuni ki moa kelima ti bili ti suginma U Tienu yua n fo kani, wani yua n tie bi niba kuli Candaano. Ama o tie yaaba n daani o po yo ki cie.
11Ŋan tundi ba, ki bangi ba laa bonla. 12Ŋan da tuo niloba kuli n fali a kelima a tie nipaano. Ama ŋan tua li bontogidikaala bi nidugikaaba po a maama nni, a tagu nni, a buama nni, a dandanli nni leni a yantugupiengu kuli nni.
13Hali min baa cua, ŋan tieni ania ki yaa cogi U Tienu maama, ki yaa tundi ba ki go bangi ba. 14Ŋan da fali ŋan den baa yaa paabu, U Tienu n den teni ke bi pua saawali ki puni a yaabu, Kilisiti Nitaanli nikpela n den maani a po bi nii yaa yogunu. 15Ŋan pa a yuli cain laa bonla kuli po, ki kuani a yama lienni bonŋanla, ki teni bi niba kuli n le ŋan suagi liiga maama. 16Ŋan kubi a yuli, ki go kubi a bangima, ki yaa se ke li pa likuli nni. A yaa tiendi yeni, a baa faabi a yuli, ki go faabi yaaba n cengi a bangima kuli.
Currently Selected:
1 Timote 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
