1 Timote 5
5
Timote n baa yaa ye leni Kilisiti Nitaanli maama
1Ŋan da tundi o nikpelo leni ku fuugu. Ama ŋan tundi o nani o tie a baa yeni. Ŋan tundi bi jawaaba nani bi tie a waamu, 2a puociana nani bi tie a naanba, bi jafanba mo nani bi tie a naataanpola yeni. Ŋan yaa tiendi la leni ku yantugupiengu cain.
3Ŋan yaa jigindi yaa kpepuona n kaa go pia kubikaaba. 4Li kpepuoli yaa pia a bila, yaa ka a yaabila, li pundi ban bandi ki yaa tiendi yaala n pundi yua n ŋua U Tienu n baa yaa tiendi yaala o danba po, ki guani ba bi ŋanma. Lani n tie yaala n mani U Tienu po. 5Yaa kpepuoli n ye obebe kaa pia kubika, bili o suginma U Tienu kani, ki miadi o u yensiinu leni ku ñiagu kuli, ke wan yaa todi o. 6Yaa kpepuoli n puni o yuli ŋanduna jeligu po kpe, ba ke o da fo. 7Ŋan yaa wangi ba lani kuli, ki tundi ba ke ban da pia ban baa fidi ki kuli ba leni yaala. 8O nilo yàá kubi o niba, yaala n tugi li yuli tie o dieceli niba, o nia li dandanli. O bia ki cie ba yua n kaa daani.
9Ŋan da diani kpepuoli yeli a kpepuona tili nni, kali o pundi bina piiluoba, ki den pia jayendo, 10ki tie bi niba n pagi yua o tuonŋama po, ki go tie yua n den wubi a bila, ki gaani bi canba cangu leni mi buama, ki nigidi bi nigagidiŋanba taana, ki todi yaaba n ye leni fala, ki tieni a tuonŋama buoli kuli. 11Ŋan da tuo ki diani yaa kpepuoli n da paani, kelima o gbanandi yaa paadi o ke o bua ki kuni o joa, o baa lebidi ki ŋaa Kilisiti, 12ki baa i tagili nni, ki ŋaa wan den kpa niani yaa ñoanianu.#5.12 Ban baa diani yaa kpepuoli yeli a kpepuona tili nni baa niani ke o kan go kuni joa. 13Bi go tua bi kpadijedanba yaaba n goadi ki tuadi ti diedi. Laa tie lani bebe, bi go tua bi lanpaadanba leni a tingbangbaaba, ki maadi lan kaa pundi ban maadi yaa maama. 14Lani yaa po, n bua ke yaa kpepuona n da paani n kuni bi jaba, ki maa a bila, ki kubi bi diegu ŋantaadi, ki da pa yibali u sanu ban sugi ba. 15Ba moala a kpepuotiama lebidi ki ŋua Sutaani. 16Yaa pua bi yaa joa n daani yaa pia o danba ke bi tie kpepuona, wan yaa todi ba, ki da tuni Kilisiti Nitaanli laa tugili, ke bi baa fidi ki todi yaa kpepuona n ki pia kubikaaba.
17Li dagidi ke Kilisiti Nitaanli nikpela yaaba n gobidi bonŋanla n baa ti jigidi ki cie.#5.17 Li yedi ki baa ti jigidi taalimilie. Bi nua ke li tie ki baa i panpaani taalimilie. Lan pundi yaaba n ba yeni ki cie, tie yaaba n kuandi bi yama U Tienu maama wangima nni leni U Tienu maama bangima nni. 18Li diani i Diani nni ki yedi: «Ŋan da yilini o nua ñoabu taakunkumi#5.18 Taakunkumi: Diidi Mi Tiadima 25.4 leni tiipo maama., wan ŋmaadi ki suodi ti siandi yaa yogunu.» Li go diani ki yedi: «Li pundi o tuonsoanlo n baa o panpaani.» #Tia 25.4; Mat 10.10; Luk 10.7. 19Ŋan da gaa makuligiba kuli Kilisiti Nitaanli nikpelo po, li yàá tie siedinbilie, yaa ka siedinbitaa yaa ñoana nni. #Tia 17.6; 19.15. 20Ŋan fu leni yaaba n tieni ti tuonbiadi bi niba kuli nintuali, ke yaaba n sieni n jie.
21N teni a yaa ñoamabonli n tie ne U Tienu nintuali, Jesu Kilisiti nintuali leni bi malekinba yaaba n gagidi ki ŋani nintuali, ke ŋan yaa ŋua laa maama kuli ki da gagidi bi niba leni biyaba, ŋan tieni bikuli po yenma. 22Ŋan da jaligi ki maani a nii niloba po, ki da taani leni nitoa o tuonbiadi nni. Fini a ba mo n kubi a yuli, ki yaa ŋani.
23Ŋan da go ñu mi ñima bebe, ŋan yaa ñu duven waamu waamu, yaala n baa todi a a tugukoanu po leni yaa yiani n lindi ki co ŋa po.
24Bi nitianba tuonbiadi doagidi bi niba kuli po, ba ke bi daa biigi ba. Ama nitianba tuonbiadi kan doagidi, kali bi biigi ba. 25Li go tie yeni leni a tuonŋama, ya n doagidi bonŋanla bi niba kuli po ye, ya n duagi mo kan yaa wuo hali yaa yogunu kuli.
Currently Selected:
1 Timote 5: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
