1 Pieri 1
1
U Tienu faabi ti Jesu Kilisiti nni
1.1—2.10
I fuondi
1Mini Pieli, Jesu Kilisiti tondo, n diani li tili yinba U Tienu n gandi yaaba ke yi yadi yadi ki ye ku cangu Ponti, Galati, Kapadosi, Asi leni Bitini#1.1 Yaa diema yela n tie ne kuli den tie yaa diema n wa wa. Moala bi taani ki ye dieyenma nni ke bi yi ma Turiki. diema nni kuli. 2U Tienu yua n tie Baa den gandi yi, nani wan den tuodi ki bani ki jagi maama, ki teni ke o Fuoma gagidi ki ŋanbi yi, ke yin yaa tuodi ki tiendi Jesu Kilisiti n yedi yaala, o soama mo n mii ki ŋanbi yi.
Li ŋanbili leni mi yanduanma n yaa pugidi yi po boncianla.
Yaa suginma n fo
3U Tienu ti Diedo Jesu Kilisiti yaa Baa n baa ti pagidi! O ninñingbadicianma po teni ke ti pia li miapanli leni yaa suginma n fo kelima Jesu Kilisiti fiima bi tinkpiba siiga yaa po. 4Ti guu U Tienu n bili ti po yaa ŋalimano tanpoli po, yua n kan bodi, ki kan joagini, ke o ŋamu mo kan yindi. 5O bili la yinba yaa po, wani U Tienu paalu n kubi yaaba kelima li dandanli po, yaa tindima n baa yuandi ki doagidi mi juodima yogunu.
6Lanwani, mangi mani yi pala boncianla, ba li yaa tie tiladi, ke biigima buoli boncianla teni ke yi ye leni li pabiidili u yogunu waamu po moala. 7Laa bonla cua ki baa doagidi yi dandanli n moani maama. Wula, ba ke o tie bonmoanla, baa fidi ki biidi. Ama bi yen biigi o leni u mu. Li tie yenma leni yi dandanli, yaala n tie bonmoanla ki cie wula, ban baa biigi yaali ki bandi lin moani maama. Lani n tie yin baa ti pagidi, ti kpiagidi leni ti jigidi Jesu Kilisiti n baa doagidi yaa yogunu. 8Ba ke yi daa laa o, yi bua o. Ba ke moala yii nua o, yi daani o, ki pia yaa pamancianli n pia ti kpiagidi, ki pendi bu ñoabu yedima, 9kelima yi baa yi dandanli panpaani, lani n tie yi tindima.
10Bi saawalipuaba yaaba n den pua saawali, U Tienu n bili yi po yaa ŋanbili po, den lingi ki buali, ki bua ki bandi laa tindima maama fuuli. 11Kilisiti Fuoma yaama n den ye bi niinni den tuodi ki waani ba Kilisiti n baa le yaa fala leni wan baa yuandi ki baa yaa kpiagidi. Bi den moandi ki bua ki bandi lani kuli n baa tieni yaa yogunu leni li yogunu n baa yaa tie maama. 12U Tienu den doagidi ki waani ba ke ban soagindi yaa maama yeni, naa tie bani bi ba po ka, ama yinba yaa po. Moala yi gbadi laa bonla maama yaaba n wangi yi o Laabaaliŋamo kani. Bi den baa o U Tienu Fuoma Yua paalu, U Tienu n soani yua ke o ñani tanpoli po ki cua ŋanduna nni, ki wangi yi la. Ba malekinba bua hali boncianla ki diegi ki bandi laa bonla n tie yaala.
Tin yaa gagidi ti yula U Tienu po
13Lani yaa po yin bogini, yi yantiana mo n yaa se kaanyendu, ki bili yi suginma yin baa baa yaa ŋanbili nni, Jesu Kilisiti n baa doagidi yaa yogunu. 14Yin yaa tie yaa bila n tuodi ki tiendi U Tienu n yedi yaala, ki da go ŋua yin den kpa pia yaa bonbuaka-biadila, yi yama n den pii yaa yogunu. 15Ama, nani yua n yini yi n gagidi ki ŋani maama, yimo n gagidi ki yaa ŋani yeni, yi tagi kuli nni. 16Li diani ki yedi: «Yin gagidi ki yaa ŋani, kelima mini, n gagidi ki ŋani.» #Lev 11.44-45; 19.2.
17Yi yaa miadi U Tienu ki go yini o yi Baa, wani, waa tiendi gagidima bi niba siiga, ki ja yuakuli buudi nani o tuona n tie maama. Lani yaa po, yin yaa ye leni li fangili o nintuali yin ye ŋanduna nni ki tie canba yaa yogunu bianu kuli. 18Yi bani ke U Tienu ki den taa yaa bonla n baa bodi nani ŋanjilifa leni wula yeni ka, ki daa ki faabi yi leni yaa yema n tie fanma fanma, yin den baa yaama yi yaajanba kani. 19Ama, o den daa ki faabi yi leni Kilisiti yaa soama, yaama n pia mayuli hali boncianla, ki tie nani ban padi yaa pebiga n ki pia poadoba kuli yaama maama yeni. 20U Tienu den tuodi ki gandi wani Kilisiti lani kuli po, hali ke ŋanduna daa tagi, ki doagidi o ŋanduna juodima yogunu yinba yaa po. 21Li tie wani Kilisiti yaa po ke yi daani U Tienu wani yua n den fiini o bi tinkpiba siiga, ki puni o ti kpiagidi, ke yin yaa pia li dandanli leni ti dugidi wani U Tienu po.
22Moala yi ŋanbi yi yula leni yin ŋua i moamoani, ke yin fidi ki yaa pia yaa buama n ki pia tuonanma yi kpiiba po. Lanwani, yin yaa bua yiyaba hali boncianla leni yi pala kuli. 23Lani yaa po, yi pia li miapanli. Yii pia li ke li ŋua leni yaa bonbuoli n baa bedi ka. Ama li tie leni yaali n kan bede. Lani n tie U Tienu maama yaama n fo, ki baa yaa ye hali yaa yogunu kuli po. 24Li diani:
«Bi nisaaliba kuli tie nani ti muadi yeni,
Bi kpiagidi kuli mo tie nani ti muadi puuma yeni.
Ti muadi kuodi ke ti puuma mo suodi, #Esa 40.6-8.
25Ama o Diedo maama baa yaa ye hali yaa yogunu kuli.»
Laa maama tie ban den wangi yi yaa Laabaaliŋamo.
Currently Selected:
1 Pieri 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
