1 Pieri 2
2
Yaaba n daani n tie U Tienu buolu
1Lani yaa po, yin ŋaa mi biadima, i boandi buoli kuli, palalie yantiali, li nunponbiadili leni ti sugidi buoli kuli. 2Nani a canpanda n bua mi biima maama, yimo n yaa bua yaa naaŋanma n tie U Tienu maama yeni. Laa maama ŋani cain, ki baa teni yin kpedi mi tindima nni, kelima mi yaa po, 3li yaa tie ke, «moala yi leni ki laa o Diedo n mani maama.» #Ps 34.9.
4Yaa kpendi mani o Diedo kani, wani, yaa tanli n fo kani. Bi nisaaliba n den yie ki luni yaali, U Tienu den gandi line, ke li pia mayuli boncianla. 5Yinba yaaba mo n tie nani yaa tana n fo, teni mani ban maa yi yin tua U Tienu diegu, o Fuoma n ye naankani. Lani, yi baa tua yaa kopadicianba n gagidi U Tienu po, ki padi o po yaa pada n gagidi, ki go mani o po, kelima Jesu Kilisiti yaa po. 6I Diani nni li yedi:
«Diidi, n bili Siyon dogu nni li tanpuukaali,
Min gandi yaali ke li tie tanmoanli.
Yua n dugi li tanli yeni po kuli, kan fiagi.» #Esa 28.16.
7Laa tanli tie jigidi yinba yaaba n daani po. Ama yaaba n kaa daani po wani, li tie:
«Bi tanmaaba n den yie yaa tanli,
Lini n tua li tanpuukaali.» #Esa 8.14.
8Li go yedi:
«Li tie li tantuudikaali,
Leni li tingbali tancianli.»
Bi tuudi kelima baa tuo ki daani U Tienu maama nani lan den bili bi po maama. #Esa 8.14-15. 9Ama yinba wani, yi tie ban den gandi yaa buolu, o Bado kopadicianba, yaa buolu n gagidi ki ŋani, wan baa yaa buolu o yuceli po. O yini yi ke yin ña li biigili nni, ki kua o yenma yaama n ŋani cain nni, ke yin yaa wangi o tuona yaa n ŋani boncianla. #Ñam 19.5-6; Esa 43.20-21; Tia 4.20; 7.6; 14.2; Tit 2.14; Esa 9.1. 10Yii den kpa tie o buolu, ama moala yi tua o buolu. Yii den kpa baa ke o gbadi yi po ninñima, ama moala o gbadi yi po mi ninñima. #Ose 2.23.
Li dandanli mi biigima nni
2.11—4.19
Yin yaa ye U Tienu naacenba yema
11N buakaaba, n mia ki go tundi yi, yinba yaaba n tie canba leni sancenba ŋanduna nni, ke yin yaa yiedi ki da tiendi yi gbanandi bonbuakaala, yaala n tiendi bu toabu leni yi yantiana. 12Yin yaa pia u tagiŋamu bi nilanba siiga. Lanwani, ba bi yaa kuli yi ke yi tiendi yaala n bia, ban le yi tuonŋama, ki kpiagi U Tienu, o cuama daali.
13Lanwani, yin yaa miindi yi yula kelima o Diedo po, bi nisaaliba n dini yaa bali danba kuli kani, lan tie mi diema badiciamo yua n tugi li yuli, 14bi guveneerinba kani, wan soani yaaba ban yaa pa i tagili danba bi biadima panpaani, ki yaa pagi yaaba n tiendi yaala n tiegi mo. 15Lanwani, U Tienu bua ke yin yaa tiendi yaala n ŋani yeni, ki fidi ki mubini bi yanboandanba leni bi yanpiidanba ñoana. 16Yi tie yaaba n faabi, yaa tie mani yaaba n faabi n baa yaa tie maama. Yin da teni yin die yi yula maama po n pa yi u sanu yin wuoni yi biadima. Ama yin yaa tie nani U Tienu naacenba n dagidi ki yaa tiendi maama. 17Yin jigini bi nisaaliba kuli, ki bua yi kpiiba. Yaa fangi mani U Tienu, ki jigindi o badiciamo.
Kilisiti fala tie ti po bontogidikaala
18Yinba bi naacenba, yin yaa fangi yi canbaanba, ki miindi yi yula bi kani, laa tie yaaba n ŋani ki go dingi bebe kani ka, ba yaaba yaa yama n pa moko yaa kani. 19Bi yaa faligidi o nilo ke waa pia tagili, ke o tuo ki gaa kelima o fangi U Tienu, li tie yaa bonla n ŋani. 20Bi yaa faligidi yi kelima yi tieni ti tuonbiadi ke yi juuni, li baa cuani yi po be yaa pagidi? Ama yi yaa tieni yaala n ŋani ke bi faligi yi, ke yi juuni, li tie yaa bonla ŋani U Tienu nintuali. 21U Tienu den yini yi lani yaa po, kelima Kilisiti wani o ba moko den laa fala yinba yaa po, ki ŋaa yi po li bontogidikaala, ke yin yaa ŋua o yaa fuuli.
22Wani, waa den tieni tuonbiadiba kuli,
Baa den gbadi boandiba kuli o ñoabu nni. #Esa 53.9.
23Ban den sugidi o yaa yogunu, waa den guani liba.
Ban den faligidi o yaa yogunu, waa den funi leni ba.
Ama o den tendi o yuli, Yua n ja ti buudi leni mi teginma. #Esa 53.7.
24Wani yua n den tugi ti tuonbiadi
O gbanandi nni ku daagu po,
Ke tinba yaaba n kpe ti tuonbiadi po yeni,
N yaa ji ye ki fo, ki tiendi mi teginma.
Li tie o poagilima yaa po yo, ke yi paagi. #Esa 53.5.
25Yi den tie nani yaa pe n yaadi yeni,
Ama moala, yi guani yi yankpaaŋamo kani,
Wani yi guudika yaa kani. #Esa 53.6.
Currently Selected:
1 Pieri 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
