1 Korenti 12
12
U Tienu Fuoma paabu
1N kpiiba, yaala n tie U Tienu Fuoma paabu yaa po, mii bua lan yaa boani yi. 2Yi bani ke yin kaa den daani yaa yogunu, yi den tuodi ke bi dia ki caani yi i buli yii n ki maadi po. 3Lanwani, n kadi ki waani yi ke U Tienu Fuoma Yua n gobidi yuakuli kan yedi: Jesu tie ti solindi yua, oba kuli mo kan yedi: «Jesu n tie o Diedo,» kali U Tienu Fuoma Yua n gobidi yua.
4Bu paabu buoli yabi, ama Fuoyenma n puuni likuli. #Lom 12.6-8. 5I todibuoli moko yabi, ama o Diedo yua n die likuli tie yendo. 6I tuonbuoli yabi, ama Tienyendu n tuuni laa tuona kuli bi niba kuli nni.
7Yuakuli baa U Tienu Fuoma doagidima li nitaanli kuli todima po. 8O Fuoma puni niyendo mi yanfuomaama. Mi Fuoyenma yeni go puni nitoa mi bancianma maama. 9Mi Fuoyenma yeni n puni niyendo li dandanli, ki go puni nitoa mo wan yaa paagidi a yiama. 10O puni niyendo ke o baa fidi ki yaa tiendi mi bancianma, ki go puni nitoa ke o baa fidi ki yaa wangi U Tienu maama, ki puni nitoa goga U Tienu Fuoma leni mu cicibiadimu gagidima paabu. O puni mi malanma paabu ki go puni nitoa mi malanma soaginma paabu. 11Laa Fuoyenma n tuuni laa tuonbuoli kuli, ki puuni nilo kuli oba, nani wani o ba n bua maama.
Gbananyendi leni ti buoli
12Nani ti gbanandi n tie yenma ki nan pia yaa gbananbuoli n yabi, tikuli taani ki tie gbananyendi, ba ke ti buoli yabi. Li tie yene leni Kilisiti. #Lom 12.4-5. 13Bi den batisi tikuli mi Fuoyenma yeni yaa niinni, ke tin tua gbananyendi. Tin tie Jufinba, nilanba, yonbi, bi yaaba n die bi yula, U Tienu puni tikuli ke ti baa ki ñuni Fuoyenma yaa kani.
14Lani yaa po, ti gbanandi naa tie gbanan-buoyendu bebe ka, ama gbananbuoli boncianla. 15Li yaa tie ke li taali yedi: «Min ki tie nuu yeni, mii taa ti gbanandi nni.» Lani kan teni ke li kaa taa ti gbanandi nni. 16Li yaa tie ke li tubili mo yedi: «Min ki tie nunbu yeni, mii taa ti gbanandi nni.» Lani kan teni ke li kaa taa ti gbanandi nni. 17Li yaa tie ke ti gbanandi kuli bi tie nunbu bebe, mi gbadima bi baa yaa ye le? Bi tikuli yaa bi tie tubili bebe, ti baa yaa gba u nuulu lede? 18Moamoani U Tienu bili gbananbuolu kuli uba uba ti gbanandi nni, nani wan bua maama. 19I gbananbuoli yeni kuli yaa bi tie gbanan-buoyendu bebe, ti gbanandi bi baa yaa ye le? 20Ba ke i gbananbuoli yabi, ti gbanandi tie gbananyendi.
21Lanwani, bu nunbu naa pia sanu ki yedi u nuu: «Mii pia leni a ŋantaadi.» Li yuli mo naa pia sanu ki yedi a taana: «Mii pia leni yi ŋantaadi.» 22Ama yaa gbananbuoli n naani ke i tadi ki cie moko tie tiladi. 23Yaa gbananbuoli n ki pia jigidi ti gbanandi nni, ti jigindi ti boncianla. Yaa gbananbuoli n ki pia jawaama, ti tiani i po ki kubi yi leni li fangili. 24Yaa gbananbuoli n pia mi jawaama mo, yii bua puginma. U Tienu den tagi ti gbanandi ki taani ti buoli, ki teni ke yaa gbananbuoli n ki pia jigidi n baa ti jigidi ki pugini. 25O den tieni yeni ke mi paadima n da ye ti gbanandi nni, ama gbananbuoli kuli n yaa bua ki todi iyii yenma. 26Gbanan-buoyendu yaa laadi fala, i gbananbuoli kuli taani leni u laa fala nni. Gbanan-buoyendu yaa baa ti jigidi, i gbananbuoli kuli mangi i pala leni u.
27Yikuli taani ki tie Kilisiti gbanandi, yi siiga yuakuli tie o gbananbuoli. 28U Tienu kpa bili Kilisiti Nitaanli siiga bi tondiba, miliema bi saawalipuaba, mitaama bi bangikaaba. Li yaa puoli, li pia yaaba n baa mi bancianma paabu, tianba baa a yiama paagima paabu, tianba mi todima paabu, tianba mi gobidima paabu, tianba malanma maama paabu. #Efe 4.11. 29Bikuli tie tondiba bi? Bikuli tie saawalipuaba bi? Bikuli tie bangikaaba bi? Bikuli tiendi mi bancianma bi? 30Bikuli baa a yiama paagima paabu yo? Bi ki maadi mi malanma yo? Bi ki fidi ki soagini mi malanma yo? Yeni ka.
31Lanwani, yin yaa bua mani yaa paabu n ŋani ki cie. N baa waani yi yaa sanu n ŋani ki cie likuli.
Currently Selected:
1 Korenti 12: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
