1 Korenti 11
11
1Yin yaa ŋua n fuuli nani min ŋua Kilisiti fuuli maama.#1Kor 4.16; Flp 3.17.
Bi puoba yucaba yilima maama
2N pagi yi kelima yi tiani n po li bonla kuli nni, ki go ŋua min den bangi yi yaa bangima mo.
3Ba yeni, n bua yin bandi ke Kilisiti tie joa kuli yudaano, o joa mo tie o pua yudaano, U Tienu mo tie Kilisiti yudaano. 4Yaa joa n jaandi, bi ki wangi U Tienu maama ki ciibi kuli, o jigidi o yudaano. 5Ama yaa pua n jaandi, bi ki wangi U Tienu maama ki naa yili, o jigidi o yudaano. Likuli tie yenma leni wan kuo o yudi. 6O pua yaa kan yili yucabili, wan moagi o yudi. Ama o yudi kuoma bi ti moagima yaa pia i fe, wan yili li yucabili.#11.6 Korenti yaaba bogidili den tie ke yaa pua n kubi yaa tuonli n joagini n kuo o yudi. 7Laa ŋani o joa n yaa ciibi, kelima o tie U Tienu nannanli leni o kpiagidi. O pua mo n tie o joa yaa kpiagidi. #Cil 1.26-27. 8Moamoani, o joa naa den ñani o pua niinni, ama o pua n den ñani o joa niinni. #Cil 2.18-23. 9U Tienu naa den tagi o joa kelima o pua po ka, ama o den tagi o pua kelima o joa yaa po yo. 10Lani yaa po leni malekinba yaa po, li pundi o pua n yili li yucabili.#11.10 O naa vedise gbadima pa. Bi tianba tama ke o pua baa yili lan yaa tie maalima ke o calo tie o yudaano. Bi tianba mo tama ke li tie wan pia yaa bali yaa maalima. 11Lani yaa po, o Diedo nintuali, o pua kan fidi ki paadi leni o joa, o joa mo kan fidi ki paadi leni o pua. 12Nani o pua n den ñani o joa niinni maama, li tie yenma leni moala, joa kuli, pua n mali o, ama li bonla kuli ñani U Tienu kane. 13Yinba yi ba n biigi ki le li yaa ŋani ke o pua n jaandi U Tienu kaa yili yucabili. 14Naani mi tagima mani miba ki wangi ke o joa yaa pia ti yuciandi, ke li pia i fe? 15Ama o pua wani yaa pia ti yuciandi, li tie o po ti kpiagidi, kelima U Tienu puni o ti yuciandi, tin yaa tie o po nani li cabiyilikaali yeni. 16O nilo yaa bua ki nia laa maama, wan bandi ke tinba leni U Tienu Nitaana kuli, ki pia laa bogidili.#11.16 Laa vedise gbadima pa boncianla.
Ti Diedo jiema maama
(Mat 26.26-30; Mrk 14.22-26; Luk 22.14-20)
17Yaa maama n ŋua po, mii pagi yi ba, kelima yi taana naa ŋanbidi yi ka, li biidi yi bebe. 18Min da baa kpa maadi yi yaala tie, n gba ke yi yaa taani, mi paadima ye yi siiga. N daani la waamu, 19kelima li tie tiladi mi paadima n yaa ye yi siiga, ke yaaba n se i moamoani nni n doagidi. 20Yi yaa taani, li naa tie o Diedo jiema po ka ke yi taani. 21Yi yaa kali ki baa je, yuakuli yen cili ki yaa di wani o ba yaa jiema, kaa guudi o lieba. Lani, mi koma pia tianba, ke tianba mo ñuni hali ki gaadi. 22Yii pia yi denpo yin baa yaa di ki go ñu naani yo? Bi yi fali U Tienu Nitaanli, ki fiagi bi siiga yaaba n ki pia liba yo? Min yedi yi lede? Min pagi yi bi? N kan pagi yi lani yaa po.
23N den baa o Diedo kani min bangi yi yaala. Ban den janbi o yaa ñiagu, o den taa dupen 24ki tuondi U Tienu, ki cabidi ki yedi: «Line n tie n gbanandi, yaadi n cabidi yi po. Yaa tiendi mani yeni ki tiadi n po.» 25Ban den dini ki gbeni yaa yogunu, o den taa ki tadiñokaaga ki yedi: «Yaa tadiñokaaga n tie ne tie o Ŋantaadipaano yua n kua kelima n soama po. Yaa tiendi mani yeni ki tiadi n po, yin baa ño yaa yogunu kuli.» #Ñam 24.6-8; Jer 31.31-34. 26Lanwani, yaa yogunu kuli ke yi ŋmani dupen ki go ñuni ki tadiñokaaga nni na, yi wangi o Diedo kuuma, hali wan go baa cua.
27Lani yaa po, yua n ŋmani o Diedo dupen ki go ñuni o Diedo tadiñokaaga nni kaa dagidi, o pia i tagili o Diedo gbanandi leni o soama po. 28Lanwani, nilo kuli n kpa biigi o yuli, lani yaa puoli, wan ŋmani laa dupen ki go ño laa tadiñokaaga. 29Yua n ŋmani ki go ñuni ki naa laa ke o Diedo gbanandi ye lienni, ŋmani ki go ñuni o yuli po buudi leni cuonu. 30Lani n teni ke a yiama leni a tadima yabi yi siiga, ke niba boncianla mo kpe. 31Ti yaa biigi ti yula, U Tienu kan ti jia ti buudi. 32Ama o Diedo ja ti buudi leni fala ki tundi ti, kelima waa bua ki taani ki bu ki cuo ti leni ŋanduna.
33Lani yaa po n kpiiba, yi yaa taani ki baa je o Diedo jiema, yin guudi yiyaba. 34Mi koma yaa pia yua, wan kpa je o denpo ki nan cua, ke yin da taani ki cuani yi yula po ti buudi leni u cuonu.
N yaa ti cua yaa yogunu, n baa ŋanbi yaa maama n sieni kuli.
Currently Selected:
1 Korenti 11: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
