SAKALI 1
1
U Tienu yini o niba ke ban guani o kani
1O bado Daliyusa bali binlieli yaa ciniilo, Li Miali Diedo den maadi leni Ido yaabili, Belekia bijua Sakali, ki yedi o ke wan waani Isalele yaaba yaa maama n tie na:#Esd 4.24—5.1; 6.14
2«Li Miali Diedo, U Paaciamu Kuli Daano pali den beni yi yaajanba po boncianla. 3Ama, moala, yin lebidi ki guani mani n kani, n moko baa guani yikani. 4Yin da tua mani nani yi yaajanba yeni. Hali yogu, n sawalipuaba den wangi ba ke n yedi ban lebidi ki ŋa bi sanbiadi leni bi bontienkabiadila. Ama bi den yie kaa cengi nni, baa den tuo ki ŋoadi min den yedi ba yaala. 5Yi yaajanba, bi ye le? Bi sawalipuaba mo te, naani bani wani den baa ye ki kan kpe? 6Ama min den teni n naacenba, bi sawalipuaba yaa ñoabona leni yaa mabilikaama kuli den cuo yi yaajanba pala. Bi den lebidi bi tagi ki yedi: ‹Li Miali Diedo, U Paaciamu Kuli Daano soani ti nani ti tagi leni ti tuona n den teni ke o jagi ke o baa soani ti maama.› »
Sakali bonlekakpiala: i taami
7Daliyusa bali binlieli binli, piiga cilo piilie n danaali daali, lani n tie Sebati ŋmaalo, Li Miali Diedo den maadi leni Belekia bijua, Ido yaabili o sawalipualo Sakali yaa maama n tie na:
8Laa ñiagu n den laa li bonlekaala. N den laa o tanjagilo ke o jagi tanmoano ki se joaloangu nni, militi tiidi yaa siiga. Tantoe den se o puoli po, ke bine moani, bine mo moani ki bua ki yaa boani, bine mo pieni.#Doa 6.2-8 9N den buali: «I naa taami mo tie be, n Diedo?» Lane maleki yua n den maadi leni nni den goa ki yedi nni: «N baa bundi apo ban tie yaala.» 10Wani yua n den se militi siiga den pugini ki yedi: «Bi tie Li Miali Diedo n soani yaaba ban goandi mi tinfanma.»
11Bi den maadi leni Li Miali Diedo Maleki yua n se militi tiidi siiga yeni ki yedi: «Ti goandi mi tinfanma ki sua ke mi yanduanma bebe n ye lienni.»
12Lanwani Li Miali Diedo Maleki yeni den maadi ki yedi: «Li Miali Diedo, U Paaciamu Kuli Daano, dinla n tie bina piilele leni a pali n beni Jelusalema yaaba po leni Juda dogi yaaba po. Moala gbadi bipo mi niñima.» 13Li Miali Diedo den guani Maleki yeni yaa maama n pia li papaali leni i baagi.
14Lani Li Miali Diedo Maleki yeni den yedi min kpaani ki waani ke Li Miali Diedo, U Paaciamu Kuli Daano yedi yaa maama n tie na: «N pia Jelusalema yaaba po leni Siyono juali po yaa buama n yaba boncianla. 15Ama n pali be boncianla yaa nilanbuoli n jigini bi yula po, kelima n pali n da den be Isalele yaaba po waamu waamu yaa yogunu, i nilanbuoli yeni den taani ki cuani bi tingbali. 16Li tie lani yaa po ke Li Miali Diedo, U Paaciamu Kuli Daano yedi yaa maama n tie na: ‹N go baa lebidi ki cua Jelusalema leni mi niñingbadima. N diegu go baa goa ki maa, u dogu moko go baa goa ki maa.› » 17Maleki go den yedi nni ke min waani yaa maama n tie na: «Li Miali Diedo, U Paaciamu Kuli Daano yedi ke o dogi go baa gbie leni mi piama. O go baa baagi Siyono yaaba. O go baa guani ki gandi Jelusalema.»
Li bonlekaliela: a yina leni bi maaba
Currently Selected:
SAKALI 1: GUX03
Highlight
Share
Compare
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
