AJE 2
2
1Daliyusa bali binlieli binli, cilele piilie n dayenli daali, Li Miali Diedo didi go den maadi leni o sawalipualo Aje ki soani o. 2O den soani o ke wan yedi Salitieli bijua, Solobabeli leni Yehotisadaka bijua, bi kopadicianba bado Josue leni yaa niba n sieni kuli yaa maama n tie na:
3«Naani yi siiga pia yua n go tiani
Hali kpiama ku naa diegu n den ŋani maama?
Moala yi nua ke li tie lede?
Yii nua li nani ke lii pia kuli fuomaba ka te?#Esd 3.12
4Li tie lani yaa po ke mini, U Tienu yedi Solobabeli leni Yehotisadaka bijua bi kopadicianba bado Josue leni yaa niba n sieni kuli ke ban paagi bi pala. Li Miali Diedo n yedi:
‹Fii mani ki cili ki yaa tuuni,
Kelima n baa yaa ye leni yi,
Li Miali Diedo U Paaciamu Kuli Daano n yedi yeni.
5Yin den ñani Ejipiti,
N den niani yi ke n baa yaa ye leni yi yogunu kuli.
Lanwani, n ye yi siiga, yin da jie liba kuli.#Ñam 29.45-46
6Li Miali Diedo U Paaciamu Kuli Daano yedi mine:
Yenma goga
N baa teni tanpoli leni ki tinga n digibi,
N baa teni ke mi ñincianma leni ki tinkuonga n digibi.#Ebl 12.26
7N baa guli i nilanbuoli,
Ki teni ban tugi bi piama kuli ki cuani ne,
Ke n Diegu n gbie leni ŋalimani.
Li Miali Diedo U Paaciamu Kuli Daano n yedi yeni.
8Mini n die ŋanduna ŋanjilifa leni o wula,
Li Miali Diedo U Paaciamu Kuli Daano n yedi yeni.
9Li dieyuanli na yaa ŋamu baa cie li bonkpiali yaa yu.
Mini, Li Miali Diedo U Paaciamu Kuli Daano n yedi.
N baa pa yi laa kaanu nni mi yanduanma.
Li Miali Diedo U Paaciamu Kuli Daano n yedi yeni.› »
Isalele yaaba joagini U Tienu po
10Daliyusa bali binlieli binli, ciyia piilie n danaali daali, Li Miali Diedo didi go den maadi leni o sawalipualo Aje. 11Li Miali Diedo den yedi o: «Buali bi kopadicianba yaa bualu n tie na, ban guani apo: 12‹O nilo yaa gbiabi o tiayiekaagu nni yaa nangu n ñani ban padi yaadi U Tienu po kani, o tiayiekaagu yeni yaa sii dupen, bi kpintiidi, bi duven, bi kpama, yaaka jiemaba, naani laa jiema baa tua yaama n gagidi U Tienu po?› » Bi kopadicianba den guani Aje bualu ki yedi: «A-a!»
13Aje go den buali ba: «Li yaa tie ke nilo sii kpiemo ki *joagini o yuli, li yaa puoli, ki sii jiemaba, naani laa jiema baa yaa joagini?» Bi kopadicianba den goa ki yedi: «Mi jiema yeni baa yaa joagini.»#Coa 19.11-22
14Lanwani Aje den guani ki yedi:
«Li Miali Diedo yedi ke mi naa diema niba
Leni ban tuuni ki baadi yaala kuli tie npo yene.
Ban padi npo yaa pada joagini.»
U Tienu niani o sela
15Li Miali Diedo go yedi:
«Moala, yin yaa kpaagi,
Yaala n baa tieni dinla leni dinla liiga.
Hali yin daa den cili n dieli maama.
16Nilo yaa den gedi ki baa n ñani o buabuali nni
*Ŋalikama baabuodi piilie,
O yen sua ke baabuodi piiga bebe n ye.
Nilo yaa den gedi duven datuodikaanu po,
Ki baa n ñani tadidi piimuu,
O yen sua taditi piilie bebe n ye.
17N den teni ke yi kuani faani,
A baayuana den kua i,
A tatana moko den baa ki biidi yi bonluonkaala.
Ama leni lani kuli,
Yii lebidi yi yama ki guani n kani.
Li Miali Diedo n yedi yeni.
18Dinla tie ciyia piilie n danaali daali,
Yin puu n dieli tanpuuli yaa daali.
Yin kpaagi yaala n baa tieni dinla leni dinla liiga.
Kpaagi mani lipo ki le.
19Naani ŋalikama go sieni a buabuana nni?
Baa duven tiidi, i kankandi, *gelenadie tiidi
Leni *olifie tiidi ki luoni liba kuli.
Ama, ki cili dinla ki ŋoadi dinla liiga,
N baa seligi yi.»
U Tienu n niani Solobabeli yaa ñoaniani
20Ciyia piilie n danaali daali yeni, Li Miali Diedo go den maadi leni Aje mi liema. 21O den yedi o ke wan yedi Juda gufeneeli, Solobabeli:
«N baa teni tanpoli leni ki tinga n digibi.
22N baa guli bi batieba, ki bolini i nilanbuoli diema paalu.
N baa tudi ki lu ti toateliti leni yaaba n jagi tipo,
I taami baa kpe,
Bi tanjagiba baa kpa biyaba leni mu jugisiemu.
23Laa daali, n baa taa fini Salitieli bijua, Solobabeli, n naacemo,
Ki teni ŋan tua n maalima,
Kelima fini n tie min gandi yua.
Li Miali Diedo U Paaciamu Kuli Daano n maadi.»
Currently Selected:
AJE 2: GUX03
Highlight
Share
Compare
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
