MALAKI 2
2
1Li Miali Diedo, U Paaciamu Kuli Daano yedi:
«Moala, yaa ñoabonli n tie na bili yinba bi kopadicianba po:
2Yin teni ke yi bontienkaala n yaa tie npo ti kpiagidi.
Yi yaa cengi min yedi yaala,
Yi yaa kuani la yi pala nni,
N baa soli yi bonbaakaala.
Baa moala n soli la,
Kelima yii kuani n ñoabonli yi pala nni.
3N baa waani yi puoliŋuani fala.
N baa taa yin padi yaa yandi mi *jaanma yogunu pobindi,
Ki madi yi nunmu nni.
Bi baa taani ki tugi yinba leni tini kuli.
4Lani, yi baa bandi ke n bili yipo laa ñoabonli,
Ki bua ke min den kuani yaa *ŋantaado leni Lefi buolu n yaa ye.
Li Miali Diedo, U Paaciamu Kuli Daano n yedi yeni.#Coa 3.11-13
5N den puni ba li miali leni mi yanduanma laa ŋantaado nni.
N den bangi ba li fangili.
Bi den fangi nni,
Ki digibi n nintuali.#Coa 25.12
6Bi den bangi yaa bangima n tiegi,
Faama ki den ye bi ñoana nni.
Bi den cuoni n nintuali leni mi yanduanma leni mi*teginma,
Ki pegidi ki ñandi niba boncianla mi biadima sanu nni.
7O kopadiciamo tuonli n tie ki bangi bi niba.
Bi niba baa buali wane li bali maama.
Kelima o kopadiciamo tie Li Miali Diedo
U Paaciamu Kuli Daano tondo yo.
8Ama yinba wani nan jadi ki ŋa u sanu.
Yi guli niba boncianla leni yi bangima.
Yi miidi min den kuani yaa ŋantaado leni Lefi buolu.
Li Miali Diedo, U Paaciamu Kuli Daano n yedi yeni.
9Lani n teni ke n baa cedi Isalele yaaba kuli
N yie yi ki fali yi,
Kelima yii tuo ki ŋua n sani,
Ki go pia u nigagidu mo, yin tiendi n *balimaama yaa yogunu.»
Bonla lie nne ke Isalele yaaba tudi bi Tienu po
10Naani tikuli ki pia baayendo kaa?
Naani U Tienyendu yeni ka tagi tikuli?
Lanwani, be yaa po ke ti nan janbidi tiyaba,
Ki biidi U Tienu n kuani yaa ŋantaado leni ti yaajanba?
11Juda fidi ban den niani yaa ñoanianu,
Bi soani Jelusalema nni leni Isalele diema nni kuli yaa tuonli n gundi,
Kelima bi biidi U Tienu diegu, wan bua kuni yaagu bonŋanla yeni.
Bi taa bi puoba, yaa nibuoli n ŋua i *buli yeni siiga.
12Li Miali Diedo n ñani Jakobo puoliŋuani siiga,
Yaaba n tieni laa bonla,
Ki da go li tuo hali abada laa niba buolu n taani leni ti diema yaaba
Ki padi pada paabu Li Miali Diedo, U Paaciamu Kuli Daano po.
13Bontoala go ye ke yi tiendi la.
Yi mua ki ñiidi,
Hali ke yi ninsiidi milini U Tienu *padibinbinli,
Kelima waa go nua ki faadi yi pada,
Kelima waa go tuo ki gaani liba kuli yi nuu nni mo.
14Yi buali yi yula, yaala yaa po ke li tie yeni.
Li tie kelima Li Miali Diedo den tie siedi
Fini leni a jawaama yogunu pua,
Ŋan janbi yaa pua,
Baa ke o tie a yieninlielo,
Leni ŋan den niani yua u ñoanianu.
15Naani U Tienu ki den teni
Ke yi siiga yua kuli leni o pua
Tua gbananyendi leni yanyenma kaa?
Be yaa po ke o tieni lani?
Li tie ke o bua ke yi bila n yaa tie wani U Tienu niba moamoani.
Lanwani, yin fangi mani yi yula.
Oba kuli yi siiga n den janbi o jawaama nni pua.
16Li Miali Diedo, Isalele yaaba Tienu,
U Paaciamu Kuli Daano yedi:
«N nani li poñanli
Leni yi siiga yua n tieni
O pua laa tugumoangu buolu.
Lanwani yin fangi mani yi yula,
Ke oba kuli yi siiga n da janbi o pua.»
Li Miali Diedo baa soani o tondo
17Yi coagini Li Miali Diedo leni yi macianma,
Ki nan go tua:
«Ti coagini o leni be?»
Li tie ke yi ŋua ki tua ke yua n tiendi mi biadima
Tiegi Li Miali Diedo nintuali,
Ke Li Miali Diedo pali mani laa nibuolu yaa po yo.
Yi go tua: «Yaa Tienu n tiegi yeni nan ye le?»
Currently Selected:
MALAKI 2: GUX03
Highlight
Share
Compare
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
