MALAKI 3
3
1U Paaciamu Kuli Daano n guani yi yaala tie line:
«N baa soani n tondo,
Ke wan kua liiga ki ŋanbi npo u sanu.
Laa yogunu, yin lingi o Diedo yua yeni
Baa ludi ki cua o diegu nni.
Yin guu yaa tondo yeni baa yaa wangi
Min den kuani leni yi yaa *ŋantaado,
Diidi mani, o kpendi na.»#Mat 11.10; Mak 1.2; Luk 1.76; 7.27
2Ŋme n baa fidi ki yaa ye o cuama daali?
Ŋme n baa fidi ki sedi o yaa doagidi yaa yogunu?
Kelima o baa tie nani ban duadi ti kudi leni yaa fantama yeni.
O baa yaa tie nani a tiaŋuuda ciebu yeni.#Jl 2.11; Doa 6.17
3O baa kali nani yua duadi ŋanjilifa u maafanu nni,
Ki ñandi ti joagindi yeni.
O baa ŋanbi Lefi puoliŋuani,
Ki ñani bipo bi *joagindi,
Nani ban ñandi wula leni ŋanjilifa joagindi maama.
Yeni, bi go baa fidi ki padi
Yaa pada n tiegi Li Miali Diedo po.
4Lanwani, Juda yaaba leni Jelusalema yaaba
N baa yaa kpendinni Li Miali Diedo po yaa pada baa yaa mani opo,
Nani lan den kpa tie maama hali yogu, puoli po bina nni.
5Li Miali Diedo, U Paaciamu Kuli Daano yedi:
«N baa cua yi siiga li bujiali po,
N baa jaligi ki taa a lingida leni mi *conconma danba tagili,
Ki taani leni yaaba n polini ki pua mi faama,
Leni yaaba n mabindi bi tuonsoanba kaa pa ba bi ligi,
Leni yaaba n faligidi a kpepuona leni a kpienbila,
Leni yaaba n tiendi bi canba yaala n bia kaa fangi nni.»
Guani mani o Diedo kani
6U Paaciamu Kuli Daano go yedi:
«N tie Li Miali Diedo,
N kan lebidi,
Lani n teni ke yinba, Jakobo puoliŋuani daa bodi.
7Hali yi yaajanba yogunu,
Yi yaadi ki ŋa n ñoabona,
Kaa tiendi ŋan bili yaala.
Lebidi mani ki guani n kani!
Nmo baa lebidi ki guani yi kani.
Li Miali Diedo, U Paaciamu Kuli Daano n yedi yeni.
Ama yi tua: ‹Ti ŋa a lede yo,
Ki baa lebidi ki guani a kani?›
8Nmo buali yi line:
‹Naani o nisaalo baa fidi ki janbi U Tienu?
Ama yi janbidi nni,›
Ki nan go tua:
‹Ti tieni be ki janbi a?›
Yi janbidi nni yi *dim leni yi paabu kane.
9Ti solindi ŋua yi,
Kelima yi janbidi nni,
Yinba, Isalele nibuoli kuli.
10Lanwani, yaa kpendinni mani yi dim kuli n ŋalimani diegu nni,
Ke mi jiema n yaa ye n diegu nni.
Tieni mani yeni ki biigi nni yogunu kuli,
Ki le n yaa kan luodi yipo tanpoli bona,
Ki teni a sela n jiidi yipo hali ki yabidi ki kandi.
Li Miali Diedo, U Paaciamu Kuli Daano n yedi yeni.#Lef 27.30; Coa 18.21-24; Tia 12.6; 14.22-29; Neh 13.12
11N kan tuo a bonfuoda n bolini yi bonbulikaala.
Yi duven tiidi baa luoni boncianla,
Li Miali Diedo, U Paaciamu Kuli Daano n yedi yeni.
12I nilanbuoli kuli baa yaa tua ke yi ye leni li pamanli,
Kelima yi diema baa yaa tie yaa kaanu n ŋani boncianla.
Li Miali Diedo, U Paaciamu Kuli Daano n yedi yeni.»
U Tienu yaa doagidi o teginma yaa daali
13Li Miali Diedo yedi:
«Yi maadi npo mi mapaama,
Ki nan tua:
‹Ti maadi apo be?›
14Yi yedi:
‹Ki yaa tuuni U Tienu po tie duolikuomi bebe,
Ti den kubi o ñoabona,
Ki go biidi ti pala ti bontienkaala po,
Wani Li Miali Diedo, U Paaciamu Kuli Daano nintuali,
Ama ti baa be lani kuli nni?
15Moala, ti kpaagi ki sua ke
Bi japaadanba n ye leni mi yemanma,
Ke li bonla kuli cuoni ti tuonbiadi danba po,
Baa bi yaa biigi U Tienu leni bi tuonbiada,
Liba kuli ki yen tieni ba.› »
16Lanwani yaaba n fangi Li Miali Diedo den maadi leni biyaba,
Ke Li Miali Diedo cengi ki gbadi ban yedi yaala.
Bani yaaba n fangi o ki kpiagidi o yeni kuli,
O den teni ke bi diani yaaba n fangi o
Ki tuo o bali yela li tili nni.
17Li Miali Diedo, U Paaciamu Kuli Daano yedi:
«Min baa doagidi n paalu yaa daali,
Laa niba kuli baa tua n yaa niba,
Bi baa yaa tie mini nba cele yaa niba.
N baa gbadi bipo mi niñima,
Nani o nilo n gba mi niñima maama
O bijua yua n tuuni opo yeni.
18Lani, yi go baa le yaa paadima n ye
Bi niteginkaaba leni bi nibiadiba siiga.
Yi baa le yaa paadima n ye yaaba n tuuni U Tienu po
Leni yaaba n ki tuuni opo yaa siiga.»
U Tienu pabienli daali kpendi
19Li Miali Diedo, U Paaciamu Kuli Daano yedi:
«N pabienli daali kpendi,
Ki naani leni yaa buaga n tongi hali ki moandi.
Bi japaadanba leni bi nibiadiba
Baa buodi nani mi moayoma yeni.
Laa daali, bi baa buodi cain,
Puu kuli kan sieni.
20Ama yinba yaaba n fangi nni wani yaa po,
Mi *teginma yienu baa pudi ki cuani mi paagima.
Yi baa ña ki yaa yugi ki ciini,
Nani a naabiwubida yeni.
21Min baa doagidi n paalu yaa daali yeni,
Yi baa ŋma ki midi bi nibiadiba.
Bi baa yaa tie nani mi fantanpienma yeni yi taana tiipo.
Li Miali Diedo, U Paaciamu Kuli Daano n yedi yeni.
Elia goacuama
22Yin tiadi mani n naacemo
Musa *bali maama po,
Min den teni o n ñoabona leni n mabilikaama yaama
Yinba Isalele yaaba kuli po, Holebi juali kani.
23Hali ke Li Miali Diedo daali,
Li dacianli yaali n pia i jeje yeni daa cua,
N baa soani n sawalipualo Elia yikani.#Mat 11.14; 17.10-13; Mak 9.11-13; Luk 1.17; Jan 1.21
24O baa teni bibaanba leni bi bila
N go yaa pia yanyenma.
Yeni, n kan ti cua ki bolini yi diema.»
Currently Selected:
MALAKI 3: GUX03
Highlight
Share
Compare
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
