EBILUNBA 4
4
1Lanwani hali ke U Tienu n den niani yaa ñoanianu o fuodima nni kuama po da baa ye, tin fangi mani ti yula ke yi siiga baa niyendo n da ti sua ke li pendi. 2Kelima bi den waani ti U Tienu maama nani bani yeni. Ama ban den gbadi yaa maama yeni naa den todi ba liba, kelima baa den ga ma leni *dandanli. 3Tinba yaaba n daani yaa po, ti kua laa fuodima nni, wan yedi yaama yaa po:
«N poli n pabienli nni ki yedi:
‹Bi kan kua
N fuodima nni hali abada.› »#Pis 95.11
O den yedi yeni baa ke o tuona kuli den soani ki gbeni hali ŋanduna tagima yogunu. 4Kaanuba o maadi li daleleeli daali maama ki yedi: «U Tienu den fuodi leni o tuona kuli li daleleeli daali.»#Cil 2.2 5Lanwani ki go yedi: «Bi kan kua n fuodima nni hali abada.»#Pis 95.11 6Yaaba n den kpa gbadi U Tienu maama yeni ki den kua mi niinni kelima bi dandanluoma po. Ama u sanu da ye nitianba po ban kua laa fuodima nni. 7Lani yaa po U Tienu go bili datoali, ki yi li: «Dinla.» Li waagi ke o den ti maadi li maama Dafidi ñoabu nni, nani lan kpa yedi maama:#4.7 Diidi 3.15.
«Dinla, yi yaa gbadi o nialu,
Yin da juagi mani yi pala.»#Pis 95.7-8
8Li yaa tie ke Josue den puni ba mi fuodima, U Tienu kan go den yuandi ki maadi datoali maama.#Tia 31.7; Jos 22.4 9Lanwani *U Tienu fuodima daali yaa fuodima baa bili U Tienu niba po. 10Kelima yua n kua U Tienu yaa fuodima nni, fuodi leni o tuona nani U Tienu n den fuodi leni o ya maama.#Cil 2.2 11Lanwani tin moandi mani hali bonŋanla ki kua laa fuodima nni, ke ti siiga niloba kuli n da pia mi yiema ki gbali mi kuama nani bani yeni.
12Kelima U Tienu maama fo ki tuuni leni u paalu. Mi mani ki cie jugisieñoaliedi, ki muu ki paadi o naano leni li yantiali, ki go paadi a tuga leni o londo. Mi bigidi o nilo yanmaalima leni o yanjaga. 13Tagimaba kuli ki wuo U Tienu nuni po, likuli ye mubima ki doagidi cain o nuni po, tin baa togidi wani yua ti tuona kuli.
Jesu cie bi kopadicianba badiba
14Lanwani, kelima ti pia yaa kopadicianba bado, yua n den kua tanpoli po, lani n tie Jesu U Tienu Bijua. Lani yaa po tin yaa se bonŋanla tin tiendi siedi yaa dandanli po nni. 15Kelima tii pia yaa kopadicianba bado n kan fidi ki gbadi tipo mi niñima ti tadingu nni. Bi den tulini o li bonla kuli nni nani tinba, ama waa den tieni *tuonbiadi. 16Lanwani tin yaa nagidi leni li papaali U Tienu bali kalikaanu, li *ŋanbili n ye naankani. Lankani ti baa baa mi niñingbadima leni li ŋanbili leni mi todima lan bua yaa yogunu.
Currently Selected:
EBILUNBA 4: GUX03
Highlight
Copy
Compare
Share
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
