EBILUNBA 5
5
1Kopadicianba bado kuli tie ban gandi yua bi niba siiga, ki dini o ke o tuuni U Tienu tuonli bi niba po, ki padi U Tienu po yaa pada n tie bu paabu leni ya n tie ti *tuonbiadi po. 2O fidi ki juuni leni bi yanboandanba leni bi niyaadikaaba, kelima wani oba yen pia ku tadingu yogunu kuli. 3Li tie o tadingu yeni yaa po ke li tie tiladi wan yaa padi a pada wani oba tuonbiadi po nani wan padi bi niba kuli po maama.#Lef 9.7
4Oba kuli kan ga o yuli po laa jigidi, kali U Tienu n yini yua nani wan den yini Alono maama.#Ñam 28.1 5Yeni, Kilisiti moko ki den ga o yuli po kpiagidi leni wan tua bi kopadicianba bado yeni. Ama li tie yua n den yedi o:
«A tie n Bijua,
Mini n mali a dinla.»#Pis 2.7
6O go yedi kaanto:
«A tie kopadiciamo hali yaa yogunu kuli,
Nani *Melikisedeki yeni.»#Pis 110.4
7Wani, wan den tie nisaalo ki ye o gbanandi nni yaa yogunu, o den miadi U Tienu leni i tantani leni ti ninsiidi, wani yua n baa fidi ki faabi o leni mi kuuma. U Tienu den gbadi o miabu kelima o den fangi wani U Tienu.#Mat 26.36-46; Mak 14.32-42; Luk 22.39-46 8Baa ke o tie *Bijua, o den bandi mi tuoma U Tienu po kelima wan laa yaa fala yaa po. 9Wan den teni ke o ŋani ki dagidi cain yeni, o den tua yua n cuani yaa *tindima n kaa pia gbenma yaaba n tuo ki ŋua o kuli po. 10U Tienu dini wani ke o tie bi kopadicianba bado nani Melikisedeki yeni.
Fangi mani yi yula ki da ti ŋa li dandanli
11Ti pia mi maama boncianla ki bua ki maadi laa bonla po, li bundima pa kelima yi tie yaaba n kaa gaani maama tontoni. 12Moala li bi pundi ke yinba n yaa tie bangikaaba, ama yi go baa bua ban yaa bangi yi mi bangicilikaama U Tienu maama bangima siiga. Kelima yi tua nani yaaba n da baa ñu mi naaŋanma bebe, ki kan fidi ki ga yaa jiema n juagi.#1Kol 3.2 13Yua n da ñu mi naaŋanma bebe daa bandi ki gagidi yaala n tiegi leni yaala n ki tiegi, kelima o da tie canpandiga. 14Ama yaa jiema n juagi tie yaaba n kpedi ki dagidi yaa po, bani yaaba n pia yaa yantiali n maani ki bigidi ki gagidi yaala n ŋani leni yaala n bia.
Currently Selected:
EBILUNBA 5: GUX03
Highlight
Copy
Compare
Share
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
