EBILUNBA 3
3
1Lani yaa po n kpiiba, bi *nigagidiŋanba, yinba U Tienu n yini yaaba yin kpaagi mani Jesu po, wani yua n tie o Tondo leni tin tiendi siedi yaa*dandanli po yaa kopadicianba bado. 2O den tie nidugika yua n den puogi o laa tuonli po, nani Musa n den tie maama U Tienu diegu nni kuli po.#Coa 12.7 3Nani yua n maa li dieli n pia ti kpiagidi ki cie wan maa yaa dieli maama, yeni bi sua ke li pundi Jesu n yaa pia ti kpiagidi ki cie Musa. 4Dieli kuli pia li maado, ama yua n maa li bonla kuli tie U Tienu. 5Musa den tie nidugika U Tienu diegu nni kuli, ki tiendi siedi U Tienu n den baa yuandi ki yedi yaala yaa po. 6Ama Kilisiti wani n tie nidugika kelima o tie Bijua ki die U Tienu diegu. Tinba n tie o diegu li yaa tie ke ti kubi leni li papaali hali mi juodima tin kpiagidi ti yula yaa suginma yaa po.
U Tienu n bili yaa fuodima o niba po
7Lanwani, nani U Tienu Fuoma Yua n yedi maama:
«Dinla, yi yaa gbadi o nialu,#Pis 95.7-11
8Yin da juagi mani yi pala
Nani yin den fiini mi yiema
Ki biigi o mi fanpienma nni yaa yogunu.»
9U Tienu yedi:
«Yi yaajanba den biigi nni lankani
Ki bua ki le nni,
Baa ke bi den laa
N tuona hali bina piinaa.
10Lani yaa po n pali den beni
Leni laa nifiima ke n yedi:
‹Yogunu kuli bi yama bodi
Baa bani n sani.›
11Li tie lani yaa po ke n den poli
N pabienli nni ki yedi:
‹Bi kan kua n fuodima nni.› »
12N kpiiba, yin fangi mani yi yula ke yi siiga niloba n da pia yaa pali n bia ki luo li dandanli hali yaala ke o baa lebidi ki ŋa U Tienu yua n fo. 13Ama hali tin da ye i Diani n yini yaa yogunu: «Dinla» yeni, tin yaa paagidi tiyaba pala, ki da tuo ti *tuonbiadi boandi n juagi ti pala. 14Kelima ti taa leni Kilisiti ki tie yenma leni o li yaa tie ke ti kubi tin den kpa pia yaa dugidi hali mi juodima. 15Nani lan yedi moala na maama:
«Dinla, yi yaa gbadi o nialu,
Yin da juagi mani yi pala
Nani yi yiema yogunu yeni.»#Pis 95.7-8
16Ŋmenba n den gbadi U Tienu nialu ki fiini mi yiema yeni, laa tie Musa n den gobidi ki ñani yaaba Ejipiti diema nni kuli kaa?#Coa 14.1-35 17O pali den be leni ŋmenbe hali bina piinaa? Laa tie yaaba n den tiendi ti tuonbiadi ki kpe ke bi kpiema baa ki yayadi mi fanpienma nni kaa? 18U Tienu den poli leni ŋmenba mo ki yedi ke bi kan kua o fuodima nni? Laa tie yaaba n den yie ki naa ŋua o kaa? 19Lanwani, ti laa ke baa den fidi ki kua o fuodima nni kelima bi dandanluoma po.
Currently Selected:
EBILUNBA 3: GUX03
Highlight
Copy
Compare
Share
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
