Bɛn Sɩɩra 8
8
A maal-ɩrɛ
1Ta zɛbr'ɩ nɩr na dɩ nɩ-kpɛ̃ɛnʋ a ɩ,
fʋ nãà mab'a lo a ʋ nuru pʋɔ.
2Ta tɛr ƴɛ̀rʋ nɩ nɩr na kpɛ naalʋ a ɩ,
fʋ nãà mab'a bɛ tɛr bir a ʋ zie ɩ.
Bʋ̃ʋ n'ʋ vɛ̃, a salm-zɩɛ ɩ na nɩbɛ yaga bɔr,
ʋ mɔ̃ mɩ̀ sãw nɩ na-mɩnɛ bɛ mɩnɛ socie.
3Ta zɛbr'ɩ ƴɛ̀r-yaga sob ɛ,
ta suur dàar ƴãwn a ʋ vũumí ɛ.
4Ta dɩ̃ɛnɛ nɩ nɩr bɛ na bɛ wul vla a ɩ,
ʋ nãà mab'a tʋ a fʋ sãàkʋm-kore.
5Ta yere nɩr na sàw a ʋ sãwna a ɩ.
Bãwnɩ a tɩ za na ɩ sãwnɩ dem a.
6Ta jewre nɩr, ʋ na kor a ƴãw ɛ,
bʋ̃ʋ n'ʋ vɛ̃, bɛ mɩnɛ mɩ̀ kòre nɩ a tɩ pʋɔ.
7Ta cɩlɛ nɩr na kpi a ƴãw ɛ,
bãwnɩ a tɩ za na na kpi a.
8Ta jewre a yã-bãwnbɛ wulu ɛ,
tɛr a bɛ zʋkpaɩ zanɛ.
Bʋ̃ʋ n'ʋ vɛ̃, bɛl zie n'a tɩ páwr a wulu,
ɛ́ zanɛ a nɩ-bɛrɛ tome tob.
9Taa zawrɛ a dɛb-nyamɛ wulu ɛ,
a bɛl mɩ̀ a, a bɛ sãà mɩnɛ zie n'a bɛ pàw ʋ.
A bɛ zie n'a fʋ na zanɩ a bome bãwfʋ,
ɛ́ mɩ́ tɛr sɔwfʋ gù n a daar.
10Taa damnɛ a nɩsaal-faa ɩ,
fʋ nãà mab'a gbɔw vũu na na tʋ̃ɔ́ dɩ b a.
11Ta bà gbɛ́r nɩr na bɛ ƴãwnɛ nɩbɛ a niŋé ɩ,
ʋ nãà mab'a ƴãw fʋ ƴɛ̀r dãbol-ƴɛ̀rʋ.
12Ta pɛ̃w libir nɩr na kpɛmɛ zuo fʋ a ɩ,
ɛ́ fʋ̃ʋ wa pɛ̃w ʋ a, sàw k'aa libir ŋa wɛ na.
13Ta yel kɛ́ fʋ na lɩɛrɩ na ya san
na gãw a fʋ fãw a ɩ,
ɛ́ fʋ̃ʋ wa ɩ a lɛ a, fʋ̃ʋ gù a yab.
14Ta tɛr ƴɛ̀rʋ nɩ ƴɛ̀r-dɩrɛ ɩ,
bʋ̃ʋ n'ʋ vɛ̃, a ƴɛ̀rʋ na dɩ na kpɛ ʋ,
a ʋ tõ-nʋɔr zũú.
15Ta lãw lo n pʋra-sob sɔ́r ɛ,
ʋ nãà mab'a ƴãw fʋ kpɩɛrʋ yaga.
Bʋ̃ʋ n'ʋ vɛ̃, ʋ na ɩrɛ nɩ lɛ za ʋ na bɔbr a,
ɛ́ a ʋ yãya-ɩb ɩ fʋ lãwnɩ ʋ kpi.
16Ta zɛbr'ɩ po-to-fãw nɩr ɛ,
ta páw ʋ cen zie nɩr za na bɛ ka be a ɩ.
Bʋ̃ʋ n'ʋ vɛ̃, ʋl zie a, nɩr kʋb bɛ ɩ bom ɛ.
Ʋ na tɩ lo n a fʋ zu,
a be fʋ na kʋ̃ tʋ̃ɔ́ kõ bʋɔlɩ nɩr a.
17Ta ɩ fʋ̃ʋ nɩ gẽgemi sob
wõ taa bom ƴãw ɛ,
bʋ̃ʋ n'ʋ vɛ̃, ʋ kʋ̃ tʋ̃ɔ́ sɔwlɩ a nyɩ ƴɛ̀rʋ ɛ.
18Ta maalɩ yel-sɔwla kãw za sãan niŋé ɩ,
bʋ̃ʋ n'ʋ vɛ̃, fʋ bɛ bãw a lɛ ʋ na na ɩ a ɩ.
19Ta dɛ mɩ́ wul nɩr za a fʋ pʋɔ ɩ,
nɩr bɛ puore fʋ yãanɩ a al ƴãw ɛ.
La Bible en Dagara © Alliance Biblique du Burkina Faso, 2013.