Bɛn Sɩɩra 9
9
A pɔwbɛ
(Nyɛ̃ 25:21-26, Sɔr-n 5:12-15, Zʋkp 5:1-20, 6:24-35, 7:5-27)
1Ta kpɛ nyuur a fʋ pɔw
fʋ na nɔnɛ yaga za a ƴãw ɛ,
fʋ nãà mab'a wul ʋ ʋ ɩrɛ faa a fʋ zie.
2Ta de fʋ tʋɔra kʋ̀ pɔw tɩ ƴãw ʋ só b ɛ.
3Taa cere pɔw-yɛm zie ɩ,
a ʋ bɛrɩ nãà mab'a nyɔw fʋ.
4Ta zɩ̃ cɛlɩ pɔw-yiel-yiele zie ɩ,
ʋ nãà mab'a ɩ a ʋ kalibawli nyɔw nɩ fʋ.
5Ta jɩ́r pɔwsɩrale gbẽgbẽ ɩ,
a nãà mab'a wõ fʋ yaga.
6Ta de fʋ tʋɔra kʋ̀ pɔw-yɛmɛ ɩ,
fʋ nãà mab'a sãw a fʋ bʋ̃-tɛrɩ za bɛr.
7Ta jɩ́rɛ ziir za a tẽw sɛ́ɛ pʋɔ ɩ,
ɛ́ ta nɩɩnɛ a ziir al nɩr za na bɛ ka be a ɩ.
8Lɩɛbɩ a mimie bɛr zi-yoru,
ta jɩ́r pɔw na pɔ̀l a ɩ,
vɩɛlʋ fʋ na bɛ só a, ta jɩ́r ʋ gbẽgbẽ ɩ.
A pɔw vɩɛlʋ bɔr'ɩ nɩ-yaga,
ʋ mɩ́ ɩ na a nɔ̃wfʋ ìr dɩrɛ mɛ̃ vũu a.
9Taa zɩnɛ towtow kɔwr pɔw na tɛr sɩr a ɩ,
taa lãwnɛ nɩ ʋ maalɛ cuw nyúur'ɩ divɛ̃ ɩ,
fʋ nãà mab'a nɔnɛ ʋ,
ɛ́ fʋ na zɩnɛ guur a,
fʋ nãà tʋ̃ɔ́ na faa lo, a ɩ a fʋ bɔrʋ.
A nɩsaalbɛ lãw-kpɛb ɩ-ɩrɩ
10Taa zawrɛ bá-kʋra bɛrɛ ɩ,
bʋ̃ʋ n'ʋ vɛ̃, bá-paala bɛ ta ʋ ɛ.
A bá-paala ɩ na mɛ̃ divɛ̃-paala a:
ʋlɛ wa kor a n'a fʋ na bãw a ʋ nʋ̃ɔ̀.
11A yele na ɩ vla a yel-bier sob zie a,
ta nyuur'ɩ ʋ ɛ:
fʋ bɛ bãw a lɛ a ʋ nyɔ-vʋʋrʋ na na baarɩ a ɩ.
12Ta de a yele na ɩ vla
a bɛlɩ dem na bɛ ƴãwnɛ a Sore a zie ɩ.
Bãwnɩ a kɛ́ bɛ kʋ̃ be be tɩ kpi,
ɛ́ bɛ nyɛ̃ dɔwrʋ ɛ.
13Àr zãá nɩ nɩ-kʋrɛ,
ɛ́ fʋ kʋ̃ zɔrɛ a kũu dɛ̃bɩ̃ɛ ɩ.
Ɛ́ fʋ̃ʋ wa tàw pɩɛl'ʋ a,
fʋ̃ʋ taa tule ɩ,
ʋ nãà mab'a ír a fʋ nyɔ-vʋʋrʋ.
Bãwnɩ a kɛ́ bɛrɩ sɔgɔ n'a fʋ cere,
kɛ́ a dacine na piw a tẽw a zu n'a fʋ dɛnɛ.
14Mɛ̃ a lɛ a na na tʋ̃ɔ́ a,
lãwnɛ nɩ a fʋ tɔ sob,
ɛ́ dier a yã-bãwnbɛ wulu.
15Lãw ƴɛ̀rɛ nɩ nɩbɛ na tɛr yã a,
ɛ́ a fʋ ƴɛ̀rʋ za mɩ́ càarɩ
a Naaŋmɩn-na-do-saa-bɛ-pɩɛl-a wulu.
16A bɛlɩ dem nɩ a fʋ̃ʋ na lãw dɩrɛ a,
bɛ mɩ́ ɩ a nɩ-mɩn.
Mɩ́ ɩ a Sore zɔba ɩ a fʋ nyʋ̀ʋ́r bom.
A nɩbɛ nɩ-bɛrɛ
17A ʋlɩ bom nɛ bɛ na nɔnɛ
a bʋ̃-maalbɛ zie a,
ʋlɛ n'ɩ a bɛ nuru bʋ̃-maala,
ɛcɛ a nɩbɛ nɩ-kpɛ̃ɛ zie a,
a ʋ yã-bãwfʋ ƴɛ̀rʋ n'a.
18Bɛ mɩ́ zɔrɛ nɩ a ƴɛ̀r-yaga sob
a ʋ tẽ-kpɛ̃ɛ pʋɔ,
bɛ bɛ mɩ́ nɔnɛ a nɩr na ƴɛ̀rɛ zuo a ɩ.
La Bible en Dagara © Alliance Biblique du Burkina Faso, 2013.