Bɛn Sɩɩra 7
7
Yã-bʋʋrɛ bʋʋrɛ na wul a
1Taa ɩrɛ faa ɩ,
ɛ́ faa za bɛ páwr fʋ ɛ.
2Zãá nɩ a yel na bɛ tu a mɩnʋ a,
ʋʋ na zãá nɩ fʋ na.
3Ta bʋ̀rɛ a yel na bɛ tu a mɩnʋ a gàrɩ́ zu ɛ,
alɛ bɛ ɩ lɛ, fʋ na cɛ̀ ʋ na gb'a ayopõi dɔwlɩ.
4Ta zɛlɩ a nɩ-kpɛ̃ɛnʋ a Sore zie ɩ,
mɩ̀ ta zɛlɩ tõ-nʋɔr na ɩ kpɛ̃ɛ a a nãà zie ɩ.
5Ta wul a Sore niŋé kɛ́ fʋ ɩ n nɩ-mɩŋa ɩ,
mɩ̀ ta wul a nãà niŋé kɛ́ fʋ ɩ n yã-bãwnɛ ɩ.
6Ta bɔbr kɛ́ fʋ wa ɩ ƴɛ̀r-dɩrɛ
fʋ̃ʋ wa kʋ̃ tʋ̃ɔ́ ír a yel na bɛ tu mɩnʋ a bɛr a ɩ.
Alɛ bɛ ɩ lɛ, fʋ na bɛr'a nɩr na ɩ kpɛ̃ɛ a ɩb tʋ̃ɔ́ fʋ,
fʋ bɛ cãà ɩ a nɩ-dẽdẽ fʋ na ɩ a ɩ.
7Ta ɩ sãw a fʋ tẽw lãw nɩbɛ ɩ,
alɛ bɛ ɩ lɛ, a fʋ yúor
na sãw nɩ a bɛ za zie.
8Ta sãw a sãwna been nɛ gb'a ayi ɛ,
a gb'a been ɩ na fʋ ɩ a sãwna sob baarɩ.
9Ta yere kɛ́:
«A Naaŋmɩn-na-do-saa-bɛ-pɩɛl-a
na jɩ́r'ɩ a ɩ̃ de-kʋ̀b-bʋ̃-yaga kaa,
mãa wa dier a kʋ̀rɛ ʋ,
ʋ na sàw na de a» ɩ.
10Ta tɛr dɛ̃bɩ̃ɛ a puoru pʋɔ ɩ,
ɛ́ taa yiire a nan dem sõwfʋ ɛ.
11Ta ɩrɛ nɩr na wone tuo a laar ɛ,
bʋ̃ʋ n'ʋ vɛ̃, a Naaŋmɩn
na mɩ́ siwri ɛ́ zɛw a, be n be.
12Ta yel kɛ́ fʋ ŋmãa ziri ƴãw a fʋ yɛb ɛ,
mɩ̀ ta ɩ a lɛ a fʋ bá ƴãw ɛ.
13Gùre fʋ tʋɔra ziri za ƴãw,
a zir-ŋma bɛ waar'ɩ vla kãw za ɩ.
14Fʋ̃ʋ wa be a nɩ-kore lãw pʋɔ a,
fʋ̃ʋ ta bʋ̀nɛ ƴɛ̀rɛ ɩ,
ɛ́ ta puule a ƴɛ̀rʋ a fʋ puoru pʋɔ ɩ.
15Ta jewre ton na tɛr tuo a nɩ a póru ton
a Naaŋmɩn-na-do-saa-bɛ-pɩɛl-a na ír a ɩ.
16Ta pʋɔ a yel-bebe dem pʋɔ ɩ,
bãwnɩ a a Sore suur na bɛ zãá a.
17Síwre fʋ tʋɔra yaga za,
bʋ̃ʋ n'ʋ vɛ̃, vũu nɩ zãzule n'ɩ a nɩ-faa dɔwrʋ.
A bárɩ nɩ a yir dem
18Ta de bá tɛw nɩ tɔnɛ kãw za ɩ,
mɩ́ ta de yɛb-sɩza tɛw nɩ
a salm-zɩɛ mɩŋa mɩŋa ɩ.
19Ta bɛr pɔw-yã-bãwnɛ
na ɩ pɔw-vla a kulu ɛ,
bʋ̃ʋ n'ʋ vɛ̃, a ʋ vɩɛlʋ sa n a salm-zɩɛ.
20Ta dɔwrɛ gbãgbaa na tone vla ɩ,
mɩ̀ ta dɔwrɛ tõ-tõ-bie
na tone nɩ ʋ pʋɔ za a ɩ.
21Fʋ̃ʋ wa tɛr gbãgbaa na tɛr yã a,
fʋ̃ʋ nɔnɛ ʋ mɛ̃ a fʋ̃ʋ mɩŋa a,
ɛ́ ta zawrɩ na bɛr ʋ, ʋ só ʋ tʋɔra ɩ.
22Fʋ̃ʋ wa tɛr dʋn a, fʋ̃ʋ kaarɛ a zie.
Fʋ̃ʋ wa nyɛrɛ dɔwlɛ a pʋɔ a, fʋ̃ʋ tɛr a.
23Fʋ̃ʋ wa tɛr bibiir a, fʋ̃ʋ wule bɛ,
dine bɛ, bɛ na cãà ɩ a pʋrpʋr a.
24Fʋ̃ʋ wa tɛr pɔwyaar a,
fʋ̃ʋ gùre bɛ a dɛbr ƴãw,
ɛ́ ta tɛr mimi-ɓaar a bɛ zie ɩ.
25Tɩr a fʋ pɔwyaa bɛ kul,
ʋʋ na ɩ n yel-kpɛ̃ɛ fʋ maalɩ ír bɛr!
Ɛcɛ kʋ̀ ʋ dɛb na tɛr yã a ʋ kul.
26Fʋ̃ʋ wa kul a fʋ yã-nɔn pɔw a,
taa íre ʋ ɛ.
Ɛcɛ ta ƴãw a fʋ tɩɛrʋ pɔw
fʋ na bɛ nɔnɛ a ƴãw ɛ.
27Ƴãwnɛ a fʋ sãà nɩ a fʋ pʋɔ za,
ɛ́ taa yiire a tuo a fʋ mã na wõ a bɛrɛ ɩ.
28Bãwnɩ a bɛlɛ na nɛbɛ dɔw fʋ a.
Ŋmɩŋmɩn n'a fʋ na tʋ̃ɔ́ ya a alɩ bome nɛ
bɛ na ɩ a fʋ ƴãw a san?
A bàwr-maalbɛ
29Tone a Sore tome nɩ a fʋ pʋɔ za,
ɛ́ ƴãwnɛ a ʋ bàwr-maalbɛ.
30Nɔnɛ a fʋ Íre nɩ a fʋ fãw za,
ɛ́ taa zawrɛ a ʋ tõ-tõ-biir bɛrɛ ɩ.
31Zɔrɛ a Sore, ɛ́ ƴãwnɛ a bàwr-maalɛ,
mɩ́ kʋ̀ ʋ a ʋ dem
mɛ̃ a lɛ a Naaŋmɩn na yel a:
a kɔb bʋ̃-dan, a lɛb-kpɛ-taa bàwr,
a dʋn bɛ na maal'ɩ a bàwr a bágɛ,
a de-kʋ̀b bom na cɛ a,
nɩ a bʋ̃-vɩɛlɩ vɩɛlɩ zie a Sore na só a#7:31: Nyɛ̃ Sɔr-n 18.8-13, Wl-ayi 18.3, Lev 2.1-16..
A ɩ-ɩrɩ a nan dem zie
32Mɩ́ tùr a nũú a nan dem,
a Naaŋmɩn tʋ̃ɔ́ maalɩ fʋ yaga za.
33Ɩ a maalʋ a fʋ bʋ̃-kʋ̀rɩ
na waar'ɩ a ta a nɩ-vʋʋrɩ za,
ɛcɛ taa sɩbr a fʋ maalʋ
a bɛlɩ dem na kpi a ɩ.
34Ta dɛrɛ a bɛlɩ dem na kone a ɩ,
mɩ́ lãw nɩ a kpɩɛrʋ dem a bɛ kpɩɛrʋ pʋɔ.
35Ta bʋ́nɛ nɩ a bàalbɛ cen-tɩ-nyɛb ɛ,
a ɩ-ɩrɩ á ŋá taabɛ ƴãw n'a a nɩbɛ na nɔnɛ fʋ.
36Bom za fʋ na ɩrɛ a, bãwnɩ a fʋ baarʋ,
ɛ́ fʋ bɛ be za na maalɩ yel-bier ɛ.
La Bible en Dagara © Alliance Biblique du Burkina Faso, 2013.