Bɛn Sɩɩra 6
6
1ɛ́ ta lɩɛbɩ a fʋ bá dɔ̃ sob ɛ,
bʋ̃ʋ n'ʋ vɛ̃, a yo-faa waar'ɩ nɩ vĩ
nɩ yelu bɛ na yere fʋ a.
À ŋá n'a a mɩ́ ŋmɛ̃ a yel-bier sob
na tɛr zɛl-ɓɛra a zie.
2Ta bɛr a fʋ pʋ-tɩɛr-faar só b ɛ,
alɛ bɛ ɩ lɛ a, a fʋ fãw na ur'a baarɩ.
3Fʋ na 'wɔb'ɩ a fʋ váar,
fʋ na sãw nɩ a fʋ wɔmɛ bɛr,
fʋ na lɩɛb'ɩ tɩ-kõw.
4Suur fʋ na kʋ̃ tʋ̃ɔ́ nyɔw a
waar'ɩ nɩ a fʋ loba,
ʋ mɩ́ ɩ na a fʋ dɔ̃ dem ɩrɛ fʋ laar.
A báalʋ yele
(Nyɛ̃ 12:8-18, 37:1-6, Zʋkp 17:17)
5Ƴɛ̀r-nʋʋr waar'ɩ nɩ bárɩ yaga,
ɛ́ nɔ̃wfʋ ƴɛ̀rʋ ɩrɛ a ƴɛ̀r-sɔw-taa nʋmɛ.
6A nɩbɛ na puore fʋ a yãanɩ a, bɛ yãwmɛ,
ɛcɛ a fʋ yã-wule a, ʋ ɩ been nɩbɛ túr pʋɔ.
7Fʋ̃ʋ wa bɔbr bá a, fʋ̃ʋ ɩ ʋ kaa baarɩ,
ta ƴãw a fʋ tɩɛrʋ a ʋ ƴãw fɔ̃w zuo ɩ.
8Kãw n'ɩ ŋan ɩ a fʋ bá, a na maalɛ ʋ a,
ɛcɛ ʋ kʋ̃ cãà ɩ ʋ a fʋ kpɩɛrʋ bibir ɛ.
9A bá na mɩ́ lɩɛbɩ a fʋ dɔ̃ sob a be n be,
ʋ mɩ́ manɩ nɩ a nyɩ zɛb-taa ƴãw fʋ vĩ.
10A bá na mɩ́ wa lãw nɩ fʋ dɩ a be n be.
Ɛcɛ a fʋ kpɩɛrʋ bibir a, ʋ bɛ àrɛ ɩ.
11A fʋ yele wa cere vla a,
ʋ mɩ́ ɩ na mɛ̃ a fʋ̃ʋ mɩŋa a,
ʋ mɩ́ ɓãá nɩ ƴãw dɩrɛ nɩ-kpɛ̃ɛnʋ
a fʋ tõ-tõ-biir zu.
12Ɛcɛ kpɩɛrʋ wa ta b a,
ʋ kʋ̃ cãà tu b ɛ, fʋ kʋ̃ lɛb nyɛ̃ ʋ ɛ.
13Zãá nɩ a fʋ dɔ̃ dem,
ɛ́ gùre fʋ tʋɔra a fʋ bárɩ ƴãw.
14Bá na kʋ̃ lɛb pùor a
ɩ n tɩɛrɛ na kpɛmɛ a,
nɩr na nyɛ̃ ʋ a nyɛ̃ nɩ na-bom.
15Bá na kʋ̃ lɛb pùor a
bɛ tɛr dàarʋ bɛ na dà ɩ,
bʋ̃-sɩza a dàarʋ na bɛ tɛr manʋ a n'ʋ.
16Bá na kʋ̃ lɛb pùor a ɩ n nyɔ-vʋʋrʋ tɩ̃ɩ,
bɛlɩ dem na zɔrɛ a Sore a na nyɛ̃ ʋ na.
17Sob nɛ na zɔrɛ a Sore a
mɩ́ bãw nɩ a ʋ bárɩ kaa-íru.
Bʋ̃ʋ n'ʋ vɛ̃, a lɛ ʋ na ŋmɛ̃ a,
a lɛ n'a a ʋ tɔ mɩ̀ na ŋmɛ̃.
A yã-bãwfʋ zanʋ
18Ɩ̃ bie e, dier a wulu,
fʋ na dɛ cãà ɩ a pɔlbile a,
lɛ n'a fʋ na nyɛ̃ a yã-bãwfʋ
tɩ ta n a fʋ zukɔbr-pɛlɛ daar.
19Taw pɩɛl'ʋ, ɛ́ gù a ʋ wɔ̃-vɩɛlɩ vɩɛlɩ,
mɛ̃ a kʋ́ɔra nɩ a bʋ̀r-bʋ̀rɛ a.
Sɩza n'a, fʋ na kɔ ʋ na a kpɛ b blã,
ɛcɛ fʋ kʋ̃ yaa kɛ́ dɩ a ʋ wɔmɛ ɩ.
20A yã-bãwfʋ kpɛmɛ nɩ yaga
a bɛlɩ dem na bɛ bãw bom za a zie,
ɛ́ nɩr a yã na bɛ ta a bɛ bere a ʋ zie ɩ.
21A ʋ zie a, a yã-bãwfʋ ɩ na mɛ̃ kʋsɩɛr
ʋ na na ɓáw ìr'ɩ wul a ʋ fãw a,
ɛcɛ ʋ bɛ mɩ́ yaa kɛ́ tɩ̀ɛ ʋ bɛr ɛ.
22Bʋ̃ʋ n'ʋ vɛ̃, a yã-bãwfʋ
sɩrɩ na sɛwnɩ a ʋ yúor,
nɩbɛ blãlɛ nɛbɛ mɩ́ nyɛ̃ ʋ.
23Ɩ̃ bie e, bɛr wõ ɛ́ sàw a lɛ ɩ̃ na yel a,
ta zawrɩ a yã ɩ̃ na wule fʋ a bɛr ɛ.
24Ƴãw a fʋ gbɛ́ɛ a yã-bãwfʋ bamɛ pʋɔ,
ɛ́ cɔw a fʋ nyũu ʋ ƴãw a ʋ miwr.
25Gʋ̀r a fʋ zɩwr de nɩ a ʋ tuor,
ta míine a ʋ bʋ̃-'leni na 'le b a cɛr-bɛrʋ ƴãw ɛ.
26Taw pɩɛl'ʋ nɩ a fʋ pʋɔ za,
ɛ́ tuur a ʋ sɔ́r nɩ a fʋ fãw za.
27Bɩ́ɛrɛ a ʋ gbɛ́ɛ, bɔbr ʋ,
ʋ na ɩ na fʋ bãw ʋ.
Fʋ̃ʋ wa nyɔw ʋ a, taa lɛb bɛrɛ ʋ ɛ.
28A baarʋ daar a,
fʋ na nyɛ̃ nɩ pɩ̃ɛnʋ a ʋ zie,
a fʋ bàlʋ na lɩɛb'ɩ nʋ̃ɔ̀.
29Lɛ n'a a ʋ bamɛ na ɩ gub,
ʋ na gù b kpɛ̃w kpɛ̃w a,
ɛ́ a ʋ miwr ɩ ƴãwfʋ bom.
30A ʋ tuor na ɩ n salm-zɩɛ dɛpaal-bom,
a ʋ bʋ̃-'leni na ɩ n pɛn-zɩɩr bàalɩ bàalɩ.
31Fʋ na mɩ́ su a na mɛ̃ kpar-yúor a,
ɛ́ vɔblɩ a mɛ̃ nãà-kpawɔ-yúor a.
32Ɩ̃ bie e, fʋ̃ʋ wa bɔbr a,
fʋ na ɩ n nɩr na bãw a,
fʋ̃ʋ wa ƴãw fãw a, fʋ nãà wa cɩ na.
33Fʋ̃ʋ wa nɔnɛ bɛr-wob a, fʋ na zanɩ na,
fʋ̃ʋ wa cɛlɛ be a, fʋ na ɩ n yã-bãwnɛ.
34Zɩnɛ a dɛb-nyamɛ lãw pʋɔ,
tu a bɛ yã-bãwfʋ pùor.
35Nɔnɛ a Naaŋmɩn ƴɛ̀rʋ bɛr-wob,
ɛ́ taa bɛrɛ yã-bãwfʋ zʋkpar za ʋ tɔlɛ ɩ.
36Fʋ̃ʋ wa nyɛ̃ nɩr na tɛr yã a,
fʋ̃ʋ mɩ́ cɔ̃w ìr cen a ʋ zie.
A fʋ gbɛ́ɛ, a sal a ʋ dɩ̃dɔ-mimir.
37Tɛr a lɛ a Sore na yel a tɩɛrɛ,
cɛlɛ a ʋ nɛ-ƴãwnɩ zie kʋralɛ.
Ʋl mɩŋa na ɩ n a fʋ socir ʋ kpɛmɛ,
ʋʋ kʋ̀ b a yã-bãwfʋ fʋ na bɔbr a.
La Bible en Dagara © Alliance Biblique du Burkina Faso, 2013.