Bɛn Sɩɩra 5
5
A tɛra sob nɩ a yel-bier sob na bɛ̀lɛ bɛ tʋɔra a
1Ta ƴãw a fʋ tɩɛrʋ a fʋ na-bome ƴãw ɛ,
ɛ́ ta yere kɛ́: «Al tɛwr man mɛ̃ na» ɩ.
2Ta sàw a vʋla nɩ a ʋ fãw
ƴãw fʋ fʋ tuur a fʋ pʋ-tɩɛr-faar ɛ.
3Ta yere kɛ́: «Ãa n'ʋ so m» ɛ?
Bʋ̃ʋ n'ʋ vɛ̃, a bɛ tɛr à ŋá ɩ,
a Sore na dɔwrɩ fʋ na.
4Ta yere kɛ́:
«Ɩ̃ maal'ɩ yel-bier ɛ́ bom za bɛ ɩ m ɛ!»
Yel-mɩŋa n'a,
a Sore mɩ́ nyɔw nɩ a ʋ suur cɛlɩ.
5Ta maal bãwnɩ a suur
bɛ na na dɩ kʋ̀ b a,
ɛ́ sãwnɛ a sãwna dɔwlɛ taa ɩ.
6Ta yere kɛ́:
«A ʋ su-ɓaarʋ ɩ n kpɛ̃ɛ,
ʋ na dɩ n a ɩ̃ yel-bier-yaga yaga suur kʋ̀ m» ɛ.
Bʋ̃ʋ n'ʋ vɛ̃, ʋ tɛr'ɩ a nɩbaal-zɔba nɩ a suur
ɛ́ a ʋ su-yãyaar na ìr'ɩ a sãwnɩ dem ƴãw.
7Lɛb wa a Sore zie fɔ̃wlɛ,
ɛ́ ta lɩɛbɛ ƴãwn bibi-yũo kʋralɛ ɩ.
Bʋ̃ʋ n'ʋ vɛ̃, a Sore suur na ur'a ìr,
ɛ́ a dɔwrʋ bibir a, a fʋ yele na baar'a.
8Ta ƴãw a fʋ tɩɛrʋ nyãnyu-na-bome ƴãw ɛ,
a kʋ̃ tɛr yel-ɩra za a fʋ zie a kpɩɛrʋ bibir ɛ.
A yã-bãwnɛ ƴɛ̀rʋ
9Ta yɛ́lɛ a fʋ bʋ̃-bie
sɛsɛb za na dɛ fure a ɩ,
ɛ́ ta lo sɔr-sãsaralɛ
mɛ̃ a yel-bier sob na tɛr zɛl-ɓɛra a ɩ.
10Tɛr a lɛ fʋ na bãw a ɩ a sɩza a,
ɛ́ ta lɩɛbɛ a fʋ ƴɛ̀rʋ ɛ.
11Mɩ́ bɛr wõ fɔ̃w,
ɛcɛ ta mɩ́ pawr a sɔwfʋ ƴãw ɛ.
12Fʋ̃ʋ wa nyɛ̃ a lɛ fʋ na na yel a,
fʋ̃ʋ sɔw a fʋ tɔ sob,
alɛ bɛ ɩ lɛ a, fʋ̃ʋ pàw a fʋ nʋɔr.
13A ƴɛ̀rʋ na tʋ̃ɔ́ na wa n ƴãwfʋ bɩɩ vĩ,
ɛ́ a nɩsaal nʋɔr na tʋ̃ɔ́ na só a ʋ yele sãwfʋ.
14Ta ɩ a nɩbɛ bãwnɩ a
fʋ na manɛ a fʋ taabɛ yel-faar a ɩ,
ɛ́ ta bɛ̀lɛ a nɩbɛ a fʋ ƴɛ̀rʋ pʋɔ ɩ.
Bʋ̃ʋ n'ʋ vɛ̃, a nyãnyuge wa só vĩ a,
ƴɛ̀rʋ-dɩb na kpɛmɛ a
gùre nɩ a zɛl-ɓɛra sob.
15Gùre fʋ tʋɔra a sãwnɩ bili ƴãw
mɛ̃ a sãwnɩ bɛrɛ ƴãw a,
La Bible en Dagara © Alliance Biblique du Burkina Faso, 2013.