Bɛn Sɩɩra 4
4
1Ɩ̃ bie e, ta sɩb a nã́w sob a ʋ nʋɔr-dɩb ɛ,
ta ɩ a nɩ-kɔmɛ gùre a fʋ sõwfʋ ɛ.
2Ta bɛr a kɔ̃ sob ʋ wone tuo ɩ,
ta ɩ a wʋ̀ʋr nɩr ʋ nyɛ̃ suur ɛ.
3Ta ɩ a bɛ kpɩɛrʋ a dɔwlɩ ɛ,
bɛ tɛr'ɩ bom kãw yel-ɩra,
kʋ̀ bɛ, ɛ́ ta bɛr bɛ cɛlɛ ɩ.
4Ta zawrɩ a zɛ̀lɛ̀
na be kpɩɛrʋ pʋɔ a sõwfʋ ɛ,
ta lɩɛbɩ kpaar cɔw a nã́w sob ɛ.
5Ta lɩɛbɩ kpaar cɔw nɩr
na bɛ tɛr bom za a ɩ,
ta ɩ ʋ wa ŋmɩɛr ƴãwn fʋ ɛ.
6Bʋ̃ʋ n'ʋ vɛ̃, ʋlɛ wa ŋmɛ ƴãw fʋ
a kpɩɛrʋ pʋɔ a,
a ʋ Íre na wõ n a ʋ puoru.
7Ɩ a lãw nɩbɛ nɔnɛ a fʋ yele,
mɩ́ su a zu a nɩ-kpɛ̃ɛ niŋé.
8Bɛr wõ a nã́w sob ƴɛ̀rʋ,
sɔw ʋ bàalʋ bàalʋ nɩ ƴã-ɓaarʋ ƴɛ̀r-bie.
9Faa a sob nɛ bɛ na dɔwrɛ a,
a dɔwr-dɔwrɛ nuru pʋɔ.
Ta kpɛ dɛ̃bɩ̃ɛ a ƴɛ̀rʋ-dɩb pʋɔ ɩ.
10Ɩ mɛ̃ sãà a, a bi-kpebe zie,
ɛ́ ɩ mɛ̃ sɩr a, a bɛ mã zie.
A lɛn daar a, fʋ na ɩ na mɛ̃
a Naaŋmɩn-na-do-saa-bɛ-pɩɛl-a bidɛb a,
ʋʋ na nɔ̃w fʋ na zuo a fʋ mã na nɔnɛ fʋ a.
A yã-bãwfʋ na ɩ wul-wule a
11A Yã-bãwfʋ mɩ́ zɛw nɩ a ʋ bibiir,
ɛ́ kaarɛ a bɛlɩ dem na bɔbr ʋ a zie.
12Nɩr na nɔnɛ a yã-bãwfʋ a
nɔnɛ nɩ a nyɔ-vʋʋrʋ,
nʋ̃ɔ̀ na paal'ɩ sob nɛ na cɔ̃w ìr bɔbr ʋ a.
13Sob nɛ na tɛr ʋ a yúor na yi na.
A Sore na maalɛ ʋ nɩ zie nɛ za ʋ na cere a.
14Bɛlɩ dem na tone a yã-bãwfʋ tome a,
puore nɩ a Naaŋmɩn na ɩ sõw a.
A Sore nɔnɛ nɩ a bɛlɩ dem
na nɔnɛ a yã-bãwfʋ a.
15Sob nɛ na bɛrɛ wone
a yã-bãwfʋ a na ɩ n ƴɛ̀r-dɩrɛ
na tuur a mɩnʋ a,
ɛ́ sob nɛ na tu ʋ a,
kʋ̃ bãw damnʋ ɛ.
16Ʋlɛ wa ƴãw a ʋ tɩɛrʋ a ʋ ƴãw a,
ʋ na só nɩ a ʋ bome,
a ʋ bibiir mɩ̀ lɛb wa só a a pùorí.
17A yã-bãwfʋ na tĩ na
bɩɛlɛ ʋ sɛ́ɛ na gõgoli a zu,
ʋ na ƴãwnɛ ʋ nɩ dɛ̃bɩ̃ɛ nɩ pʋl-vʋ̃ɔ.
Ʋ na kpãanɛ ʋ na nɩ a ʋ wulu,
ɛ́ gù ʋ wa tɩ tʋ̃ɔ́ bɛr tɩɛrʋ a ʋ ƴãw.
Ʋ na ɩ ʋ na kaa nɩ a ʋ yel-fɛrɩ.
18Al pùorí, ʋ na de nɩ sɔ́r na ɩ daadaa a,
lɛb wa a ʋ zie.
Ʋ na ɩ na nʋ̃ɔ̀ kpɛ ʋ,
ʋʋ wul ʋ a ʋ yel-sɔwlɩ.
19Ɛcɛ ʋlɛ wa bɛr a yã-bãwfʋ sɔ́r a,
a yã-bãwfʋ na jɛ ʋ na bɛr, ɛ́ bɛr ʋ ʋ bɔr.
A vĩ zɔba yele
20Jɩ́rɛ a lɛ a yele na ɩ a,
gù fʋ tʋɔra a yel-faa ƴãw,
ɛ́ ta zɔrɛ a fʋ mɩŋa vĩ ɛ.
21Vĩ kãw be n be wɩɛr'ɩ fʋ a yel-bier pʋɔ,
ɛ́ kãw be be waar'ɩ yúor nɩ maalʋ.
22Ta sãw niwn ƴãw fʋ tʋɔra ɩ,
ta zɔ a vĩ nɩ̃ɛ tɩ lo ɩ.
23Ta bʋ́nɛ nɩ a ƴɛ̀rʋ ɛ,
alɛ wa fɛr kɛ́ fʋ ƴɛ̀r a.
24A fʋ yã-bãwfʋ na sãá nɩ a fʋ ƴɛ̀rʋ pʋɔ
ɛ́ a fʋ bãwfʋ sãá a lɛ fʋ na yere a pʋɔ.
25Ta ŋmɛ a yel-mɩŋa lɔb ɛ,
ɛcɛ a fʋ zɔnʋ, a ɩrɛ fʋ vĩ.
26Bɛ kʋ̃ tʋ̃ɔ́ piw man kʋ̃ɔ tɛr a ta zɔrɛ ɩ,
a lɛ pʋɔ a, ta zɔrɛ vĩ a fʋ yel-bebe yelu ƴãw ɛ.
27Ta bɛr dãbol sob nɛb fʋ ɛ,
ta sàw kpɛnʋ sob só fʋ ɛ.
28Zɛb a yel-mɩŋa ƴãw tɩ kpi n,
ɛ́ a Sore Naaŋmɩn na zɛb'ɩ a fʋ ƴãw.
29Ta kpɛ socir a fʋ ƴɛ̀rʋ pʋɔ,
ɛ́ a fʋ ɩ-ɩrɩ ƴãw fʋ kpɛ ƴã-tuo, ɛ́ kpɛ salala ɩ.
30Ta ɩ gbẽw a fʋ yir dem zie,
ɛ́ a fʋ tõ-tõ-biir zie a fʋ pɛr bɛ tone mur ɛ.
31Ta mɩ́ yuo a nũu de a bom,
ɛ́ a lɛb-tɩrʋ daar fʋ pàw tɛr ɛ.
La Bible en Dagara © Alliance Biblique du Burkina Faso, 2013.