Bɛn Sɩɩra 3
3
A bibiir tõ-fɛrɩ a bɛ dɔwrbɛ zie
1Ɩ̃ bibiir i, nyɩ bɛrɛ wone a nyɩ sãà wulu,
nyɩ tuur a, nyɩ na mɩ́ yi na zaa fɛrʋ za pʋɔ.
2Bʋ̃ʋ n'ʋ vɛ̃, a Sore kʋ̀ n nɩ-kpɛ̃ɛnʋ a sãà
a ʋ bibiir zu,
ʋ ƴãw nɩ a lɛ a mã na tɛr sɔ́r
na ɩrɛ a ʋ bidɛbr zie a.
3Sob nɛ na ƴãwnɛ a ʋ sãà a,
ʋ mɩ́ ya n a ʋl mɩŋa yel-bebe san.
4Sob nɛ na ɩrɛ a ʋ mã tɛr yúor a,
ʋ bɔbr'ɩ na-bome gbone taa.
5Sob nɛ na ƴãwnɛ a ʋ sãà a,
a ʋ bibiir tɛɛ za na ƴãw ʋ nɩ nʋ̃ɔ̀.
Ʋlɛ wa puore a ʋlɩ bibir a,
a Sore na de nɩ a ʋ puoru.
6Sob nɛ na ɩrɛ a ʋ sãà tɛr yúor a,
ʋ na vʋʋr'a cɛlɩ.
Sob nɛ na sàwr a Sore nʋɔr a,
ʋ mɩ́ ɩrɛ na nʋ̃ɔ̀ kpɩɛr a ʋ mã,
7ʋ mɩ́ tone nɩ a ʋ dɔwrbɛ
mɛ̃ a ʋ zuru dem nɛbɛ a.
8Ƴãwnɛ a fʋ sãà a fʋ ɩ-ɩrɩ
nɩ a fʋ ƴɛ̀rʋ pʋɔ,
a ʋ nɔ-vla tʋ̃ɔ́ tuur fʋ.
9Bʋ̃ʋ n'ʋ vɛ̃, sãà nɔ-vla
mɩ́ ɩ n a bibiir yir ʋ kpɛmɛ,
ɛ́ a mã ŋmɛ-ƴãw dam a yir pɛr.
10Ta zɛwr fʋ tʋɔra nɩ a fʋ sãà yo-sãwna ɩ,
a fʋ sãà yo-sãwna kʋ̃ tʋ̃ɔ́ ɩ a fʋ yo-vla ɩ.
11Bʋ̃ʋ n'ʋ vɛ̃, a fʋ sãà wa nyɛrɛ ƴãwfʋ a,
a fʋ ƴãwfʋ mɩ̀ n'a.
Mã na bɛ nyɛrɛ ƴãwfʋ a,
a mɩ́ ɩ n a ʋ bibiir vĩ.
12Ɩ̃ bie e, kaarɛ a fʋ sãà zie a ʋ koru pʋɔ,
ta ɩ k'ʋ tɛr pʋ-sãwna a ʋ cãafʋ daar ɛ.
13A ʋ yã saa wa yi a,
fʋ̃ʋ mɩ́ cãà nyɔw fʋ tʋɔra a ʋ ƴãw.
Taa jewre ʋ ɛ,
fʋ̃ʋ na cãà kpɛmɛ kpɛmɛ a.
14Naaŋmɩn kʋ̃ yiiri
a fʋ sãà fʋ na maalɩ a bɛr ɛ,
a maalʋ á ŋá na ír'ɩ
a fʋ sãwna yaga bɛr fʋ.
15Fʋ̃ʋ wa be kpɩɛrʋ pʋɔ a,
a Sore na tɩɛr'ɩ a fʋ yele.
A fʋ sãwna na bɔr'a mɛ̃ sa-pupure
na nyɩl mʋ̃tɔ̃w pʋɔ a.
16Ɛcɛ sob nɛ na jɛ a ʋ sãà bɛr a
ɩ na mɛ̃ nɩr na tʋʋr Naaŋmɩn zʋmɛ a.
Sob nɛ na ƴãwnɛ a ʋ mã pʋ-sãwna a,
a Sore na ŋmɛ na ƴãw ʋ.
A tʋɔra-siwru
17Ɩ̃ bie e, bom za fʋ na ɩrɛ a,
ɩrɛ bàalʋ bàalʋ,
ɛ́ a nɩbɛ na nɔnɛ fʋ na zuo nɩr na tɩrɛ a.
18A lɛ fʋ na ɩ a kpɛ̃ɛ sɛw a,
a lɛ n'a a fɛr kɛ́ fʋ síwre fʋ tʋɔra,
lɛ n'a a Sore pʋɔ na pɛlɩ a fʋ ƴãw.
20Bʋ̃ʋ n'ʋ vɛ̃, a Sore kpɛnʋ bɛrmɛ na,
ɛcɛ a su-siwri dem nɛbɛ
ɩrɛ k'ʋ nyɛrɛ a yúor-vɩɛlʋ-danʋ.
21Bom na kpɛmɛ zuo fʋ a, ta bɔbr ʋ ɛ,
bom na gãw a fʋ fãw a, ta ŋmɛlɛ kaar ʋ ɛ.
22Tɩ́ɛrɛ a nɛ-ƴãwnɩ bɛ na ƴãw kʋ̀ b a,
ta kaarɛ a yel-sɔwlɩ zie ɩ.
23Ta yel kɛ́ fʋ tõ tome
na kpɛmɛ zuo fʋ a ɩ:
a alɩ yele fʋ na nyɛ̃ baarɩ a,
a gãw nɩ a al a nɩsaal
na na tʋ̃ɔ́ bãw a pɛr a.
24Nɩbɛ yaga tuli na,
bɛ na bɔbr kɛ́ bɛ tɩɛrɩ bãw bom za a,
a bɛ tɩɛr-zawlɛ mɩ́ ɩ na a bɛ tɩɛrʋ bɛ tori ɛ.
A pɔ̀lʋ
26A zu-kpɛ̃w sob baarʋ kʋ̃ ɩ ʋ vla ɩ.
Sob nɛ na nɔnɛ a faa a na lo n a faa pʋɔ.
27Kpɩɛrʋ n'a na dĩ a zu-kpɛ̃w sob.
Ʋ bɛ ɩrɛ vla ɩ,
ɛ́ sãwnɛ a sãwna dɔwlɛ taa.
28A pɔ̀lʋ sob faa bɛ tɛr tɩ̃ɩ ɛ,
bʋ̃ʋ n'ʋ vɛ̃, a faalʋ mʋ̃ɔ tɛ n nyɩgɛ a ʋ pʋɔ.
29Nɩr na tɛr yã a mɩ́ tɛr'ɩ
a yã-bãwnbɛ zʋkpaɩ tɩɛrɛ.
Tobr na cɛlɛ be a,
à ŋá n'a a yã-bãwnɛ bɔbr.
A taabɛ sõwfʋ
30Mɛ̃ a lɛ a kʋ̃ɔ
na mɩ́ kpiiri vũu na dɩrɛ a,
lɛ n'a a nã́w sob sõwfʋ
íre a sãwna bɛrɛ.
31Sob nɛ na ɩrɛ vla a cɔbrɛ nɩ a nɩdaar,
ʋlɛ wa lore a lɛn daar a,
ʋ na nyɛ̃ nɩ tɩɛfʋ zie tɩɛ.
La Bible en Dagara © Alliance Biblique du Burkina Faso, 2013.