Bɛn Sɩɩra 2
2
A kanyir a kpɩɛrʋ daar
1Ɩ̃ bie e, fʋ̃ʋ wa yel kɛ́
fʋ na tone nɩ a Sore tome a,
fʋ̃ʋ cɔbrɩ fʋ tʋɔra gù n a kpɩɛrʋ.
2Tɛr soci-kpɛ̃w ɛ́ ƴãw fãw,
a fʋ tɩɛrʋ ta damnɛ fʋ a kpɩɛrʋ daar ɛ.
3Tu a Sore, taa tawr yire a ʋ pùor ɛ.
Vla tɛwr'a a na ɩ b
a fʋ nyɔ-vʋʋrʋ baarʋ daar.
4Bom za na tarɛ fʋ a, sàw ɛ́ tɛr kanyir
a yele na síwre fʋ a pʋɔ.
5Bʋ̃ʋ n'ʋ vɛ̃, vũu n'a bɛ mɩ́ ɩ n
a salm-zɩɛ kaa bãw a ʋ vɩɛlʋ.
Vĩ nyɛ́b kpɩɛrʋ pʋɔ n'a
bɛ mɩ̀ mɩ́ ɩ a bɛlɩ dem
na pɛlɩ a Naaŋmɩn pʋɔ a kaa.
6Ƴãw a fʋ tɩɛrʋ a Naaŋmɩn ƴãw,
ʋʋ na sõw fʋ na.
Tuur sɔ́r na ɩ dẽdẽ a,
ɛ́ ƴãw a fʋ tɩɛrʋ a Naaŋmɩn ƴãw.
7Nyɩɩm na zɔrɛ a Sore a,
nyɩ ƴãw a nyɩ tɩɛrʋ a ʋ su-ɓaarʋ ƴãw.
Nyɩ taa tawr yire kɛ́ bɛrɛ ʋ ɛ,
alɛ bɛ ɩ lɛ, nyɩ na lo na.
8Nyɩɩm na zɔrɛ a Sore a,
nyɩ ƴãw a nyɩ tɩɛrʋ a ʋ ƴãw,
nyɩ kʋ̃ gúu a nyɩ sã-ya ɩ.
9Nyɩɩm na zɔrɛ a Sore a,
nyɩ ƴãw a nyɩ tɩɛrʋ a ʋ maalʋ ƴãw,
nʋ̃ɔ̀ na bɛ báarɛ a ƴãw,
nɩ a ʋ su-ɓaarʋ ƴãw.
10Nyɩ bɛ́l a nɩbɛ
na dɔw lɩɛrɩ taa tɔl a nyɛ̃:
ãa n'ʋ ƴãw a ʋ tɩɛrʋ a Sore ƴãw ɛ́ wa nyɛ̃ vĩ?
Ãa n'ʋ tu a Sore zɔba pùor,
ʋʋ wa zawr'ʋ bɛr?
Ãa n'ʋ bʋɔlɩ ʋ, ʋʋ bɛ ŋmɛlɩ kaa ʋ?
11Bʋ̃ʋ n'ʋ vɛ̃, a Sore zɔrɛ nɩ nɩbaalʋ
ɛ́ tɛr su-ɓaarʋ,
ʋ mɩ́ dɩ n a yel-bebe suur,
ɛ́ faa a kpɩɛrʋ daar.
12Baw-bio dem'ɩ a dɛ̃bɩ̃ɛ dem
nɩ a nɩ-salala mɩnɛ,
a yel-bebe dem na cere sɛ́ɛ ayi zu a.
13Baw-bio sob'ɩ ʋlɩ sob na bɛ kpɛ socir,
na bɛ ƴãw a ʋ tɩɛrʋ a Sore ƴãw a.
A lɛ pʋɔ a, a Sore kʋ̃ gù ʋ ɛ.
14Baw-bio dem'ɩ nyɩ,
nyɩɩm na bɛ ƴãw fãw tɩ ta a baarʋ daar a!
Bʋ̃ʋ n'ʋ nyɩ na ɩ,
a Sore wa jɛlɛ a nyɩ yele a?
15Bɛlɩ dem na zɔrɛ a Sore a,
bɛ bɛ zawrɛ a ʋ ƴɛ̀rʋ towtow ɛ,
bɛlɩ dem na nɔnɛ ʋ a,
bɛ mɩ́ tuur'ɩ a ʋ sɛ́ɛ.
16Bɛlɩ dem na zɔrɛ a Sore a,
bɛ mɩ́ bɔbr'a kɛ́ bɛ ɩrɛ a pɛlɩ a ʋ pʋɔ.
Bɛlɩ dem na nɔnɛ ʋ a,
bɛ mɩ́ guole nɩ bɛ tʋɔra nɩ a ʋ Wulu.
17Bɛlɩ dem na zɔrɛ a Sore a,
bɛ mɩ́ gɔ na gù a ʋ tome tob.
Bɛ mɩ́ síwre nɩ bɛ tʋɔra
a ʋ niŋé, yere nɩ:
18«A Sore nuru pʋɔ loba sa
a nɩsaalbɛ nuru pʋɔ loba.
Bʋ̃ʋ n'ʋ vɛ̃, a lɛ ʋ na ɩ kpɛ̃ɛ sɛw a,
lɛ n'a ʋ mɩ̀ tɛr a su-ɓaarʋ.»
La Bible en Dagara © Alliance Biblique du Burkina Faso, 2013.