Sɛb-sõw yielu 96
96
Sɛb-sõw yielu 96 (95) sob
Yiel-paala a Sore na waar a ƴãw
(Nyɛ̃ 1Bi-yel 16:23-33)
1Nyɩ yieli yiel-paala danɩ nɩ a Sore,
tẽ-daa nɩbɛ za a, nyɩ yiele danɛ nɩ a Sore.
2Nyɩ yiele danɛ nɩ a Sore, nyɩ íre a ʋ yúor.
Nyɩ hiere yere a ʋ faafʋ bibir za na vɩɛrɛ a.
3Nyɩ manɛ a ʋ yúor-vɩɛlʋ-danʋ
a nɩ-bʋʋr-yoru sɔgɔ, nyɩ manɛ
a ʋ nɔ-ɓã-yel-maalɩ a nɩ-bʋʋrɛ za sɔgɔ.
4A Sore sɩrɩ na ɩ kpɛ̃ɛ ɛ́ sɛwnɩ kɛ́ bɛ danɛ ʋ,
bɛ́ zɔrɛ ʋ, ʋ na gãw a ŋmɩmɛ za a.
5A nɩ-bʋʋr-yoru ŋmɩmɛ ɩ n bʋ̃-zawlɛ,
ɛcɛ a Sore n'ʋ maalɩ a salom.
6Vɩɛlʋ nɩ cãà n'a be a ʋ niŋé,
kpɛnʋ nɩ dɛpaalʋ n'a be a ʋ yir pʋɔ.
7Tẽw zu nɩ-bʋʋrɛ ɛ, nyɩ bãwnɩ
a Sore yúor-vɩɛlʋ-danʋ nɩ a ʋ kpɛnʋ,
8nyɩ íre a ʋ yúor-vɩɛlʋ-danʋ,
nyɩ wa n a nyɩ de-kʋ̀b bome,
nyɩ kpɛ a ʋ yir davʋrɩ pʋɔ.
9Nyɩ mɩ́ gbĩ dume gũu tɩ tɔ a tẽw a Sore niŋé,
a lɛn daar ʋ na mɩ́ wul a ʋ sonu a,
tẽ-daa za nɩbɛ ɛ, nyɩ màwr a ʋ niŋé.
10Nyɩ yel kʋ̀ a nɩ-bʋʋrɛ za:
«A Sore ɩ n nãà, a na ɩ lɛ a,
a tẽ-daa kpɛmɛ na àr, ʋ bɛ dam damnʋ ɛ.
A Sore mɩ́ dɩ n a ƴɛ̀rʋ nɩ mɩnʋ kʋ̀ a nɩ-bʋʋrɛ.»
11A salom, ʋ cɩlɛ, ɛ́ a tẽw cɩlɛ ƴawr'ɩ,
a kʋ̃ɔ-kpɛ̃ɛ, ʋ damnɛ, nɩ a bome al za na paalɩ ʋ a.
12A wɩ̀ɛ, ʋ cɩlɛ, lãwnɩ a bome za
na be a pʋɔ a.
A tuwr tɩɩr za, a cáarɛ nʋ̃ɔ̀ cáarʋ
13a Sore niŋé, ʋ na waar a ƴãw,
ʋ waar'a, k'ʋʋ wa dɩ n a tẽw ƴɛ̀rʋ,
ʋ na dɩ n nɩ a tẽ-daa a ƴɛ̀rʋ nɩ mɩnʋ,
ɛ́ dɩ n a nɩ-bʋʋrɛ a ƴɛ̀rʋ a tu yel-mɩŋa.
La Bible en Dagara © Alliance Biblique du Burkina Faso, 2013.