Sɛb-sõw yielu 91
91
Sɛb-sõw yielu 91 (90) sob
Faa za bɛ páwr fʋ a Sore zie ɩ
1Ʋlɩ sob na zɔrɛ kpɩɛr
a Naaŋmɩn-na-do-saa-bɛ-pɩɛl-a naayir
ɛ́ pɩ̃ɛnɛ a Kpɛnʋ-za-sob ɓaarʋ́ a,
2ʋ mɩ́ yel'ɩ a Sore:
«Fʋ̃ʋ n'ɩ a ɩ̃ zɛbr-yir-kpɛ̃w, a ɩ̃ sɔwlʋ zie,
fʋ̃ʋ n'ɩ a ɩ̃ Naaŋmɩn, ɩ̃ ƴãw nɩ a ɩ̃ tɩ́ɛrʋ a fʋ ƴãw.»
3— A Naaŋmɩn n'ʋ mɩ́ sɩrɩ ír fʋ bɛr
a nabawlɛ bɛrɩ pʋɔ,
ʋ mɩ́ sanɩ nɩ a fʋ jɛ̀lmɛ̃ bàalʋ na kʋrɛ a.
4Ʋ mɩ́ yɛ́r'ɩ a ʋ pɩgɛ pàw fʋ,
ɛ́ fʋ nyɛ̃ sɔwlʋ zie a ʋ zie.
A ʋ yel-mɩŋa sɩrɩ na piw fʋ tɛr,
mɛ̃ zɛbr-kur-pãgala a.
5Fʋ kʋ̃ zɔrɛ bom za ɩ:
a tɩ̃ɩsɔw bʋ̃-faar na ɩrɛ dɛ̃bɩ̃ɛ a,
a pĩi bɛ na tɛ ʋ cere a mʋ̃tɔ̃w a,
6a jɛ̀lmɛ̃ bàalʋ na waar a lige pʋɔ a,
nɩ a tẽw na 'lere vũu a mʋ̃tɔ̃-tuo a.
7Nɩbɛ túr saa lo a fʋ lõbowrí,
ɛ́ tùr-pie lo a fʋ dʋrʋ lowr a, bom za bɛ ɩrɛ fʋ ɛ.
8Yuo a mimie tɛwr, ɛ́ fʋ na nyɛ̃ nɩ lɛ
a Naaŋmɩn na mɩ́ ya a nɩ-faar a.
9— Sore e, fʋ̃ʋ sɩrɩ n'ɩ a ɩ̃ sɔwlʋ zie! —
Fʋ ɩ na a Naaŋmɩn-na-do-saa-bɛ-pɩɛl-a
ʋ ɩ a fʋ kpɛb zie.
10Yel-faa za bɛ páwr fʋ ɛ,
bʋ̃-faa za bɛ pɩɛlɛ a fʋ yir ɛ.
11Bʋ̃ʋ n'ʋ vɛ̃, a Sore na yel'ɩ a ʋ malkɩ mɩnɛ
kɛ́ bɛ gùre fʋ a ziir za fʋ na cere a.
12Bɛ na mɩ́ ɓaabɩ fʋ nɩ a bɛ nuru pʋɔ
k'aa fʋ gbɛ́r taa ŋmɩɛr kʋsɩɛr ɛ.
13Fʋ na mɩ́ do na nɛ̃ a gbẽw nɩ a dɔpan,
fʋ na mɩ́ nɛ̃ nɩ a gbẽw-bile nɩ a wa-bɩɛ.
14A Naaŋmɩn yere na:
«Ʋ na tu m a, ɩ̃ na faa ʋ na.
Ɩ̃ na gùre ʋ na, ʋ na bãw a ɩ̃ yúor a ƴãw.
15Ʋlɛ wa bʋɔlɛ mɛ̃ a, ɩ̃ na sɔw na,
ɩ̃ na be n a ʋ zie a kpɩɛrʋ daar,
ɩ̃ na faa ʋ na, ɩ̃ na ɩ na k'ʋ nyɛ̃ ƴãwfʋ.
16Ɩ̃ na ɩ na ʋ kpɛ a tẽw zu ka tɩ sɛw,
ɩ̃ɩ na wul ʋ na k'ɩ̃ɩ ɩ n a ʋ faarɛ.»
La Bible en Dagara © Alliance Biblique du Burkina Faso, 2013.