Sɛb-sõw yielu 90
90
SƐBR ANAAR SOB
90—106
Sɛb-sõw yielu 90 (89) sob
Nɩsaal bɛ tɛr tʋ́ɔr ɛ
1A Naaŋmɩn nɩr Moyiir puoru.
Sore e, yome yome za,
fʋ̃ʋ n'ʋ tɩ ɩ a tɩ sɔwlʋ zie.
2A tan na bɛ tɩ yi sɛr a,
a tẽsɔw nɩ a zie na bɛ tɩ be sɛr a,
fʋ tɩ ɩ n a Naaŋmɩn dɩta-pɛ-yome za, ɛ́ na ɩ ʋ kʋralɛ.
3Fʋ mɩ́ ɩ na a nɩsaalbɛ lɛb lɩɛbɩ tanɛ,
ɛ́ fʋ yel bɛ: «Nyɩ lɛb cen a be nyɩ na yi wa a.»
4Yome túr a fʋ zie ɩ na mɛ̃ zãa bibir na tɔl a,
bɩɩ mɛ̃ tɩ̃ɩsɔw tɛm ɓile blã a.
5Fʋ mɩ́ de nɩ a nɩsaalbɛ nyɔ-vʋʋrʋ tɔl'ɩ,
ʋ mɩ́ cɛlɩ na mɛ̃ gʋ̃ɔ fʋ na gúr ŋmãa ŋmãalɛ a.
Ʋ ŋmɛ̃ na taa nɩ a mʋ̃ɔ na bule a.
6A biɓaara a, ʋ mɩ́ pure na, ʋ mɩ́ kɛrɛ na.
A zaanʋɔra, ʋ vàrɛ, ʋ kò na!
7A fʋ suur baarɩ tɩ na,
a fʋ su-yãyaar ƴãw tɩ nɩ pʋl-vʋ̃ɔ.
8Fʋ bin nɩ a tɩ sãwna a fʋ niŋé,
ɛ́ a fʋ cãà caalɛ a tɩ yel-sɔwlɩ.
9A fʋ suur zũú n'a a tɩ bibie báarɛ.
A tɩ yome mɩ́ baar'a
mɛ̃ vʋʋrʋ fʋ na vʋʋrɩ daƴen a!
10A tɩ yome nʋɔr mɩ́ ɩ n lɩz'a ata nɩ pie,
lɩz'a anaar, nɩr yawra wa vɩɛl a,
ɛcɛ a yaga zie mɩ́ ɩ n kpɩɛrʋ nɩ bàlʋ zawla,
a mɩ́ zɔ na tɔl fɔ̃w, ɛ́ tɩ tɔl.
11Ãa n'ʋ bãw a lɛ a fʋ suur na sɛw a?
Ʋ ɩ n kpɛ̃ɛ sɛw a lɛ tɩ na ƴãwnɛ fʋ a.
12Wul tɩ tɩ bãw a tɩ bibie sɔ́rʋ,
lɛ n'a tɩ na tɛr yã-bãwnɛ tɩɛrʋ.
13Sore e, debor'a fʋ na nyɛ̃ a suur tɩ ta?
Lɛb wa, zɔ a fʋ tõ-tõ-biir nɩbaalʋ.
14A zie mɩ́ wa vɩɛrɛ wa báarɛ a,
fʋ̃ʋ mɩ́ paalɩ tɩ nɩ a fʋ nɔ̃wfʋ,
ɛ́ tɩ na mɩ́ yiele na ŋmɩɛr'ɩ nʋ̃ɔ̀ cɛlsɩ
a tɩ nyɔ-vʋʋrʋ daar za.
15Ɩ nʋ̃ɔ̀ kpɛ tɩ man a bibie nʋɔr fʋ na ɩ tɩ nyɛ̃ vĩ a,
a yome nʋɔr tɩ na nyɛ̃ a kpɩɛrʋ a.
16A fʋ tome, a sãá tɩ nyɛ̃,
ɛ́ a tɩ bibiir nyɛ̃ a fʋ vɩɛlʋ!
17A Sore tɩ Naaŋmɩn, ʋ tɛr su-nʋ̃ɔ̀ a tɩ ƴãw,
ɛ́ ɩ kɛ̀ maalʋ yi a tɩ nuru tome pʋɔ a tɩ ƴãw,
ɩ kɛ̀ maalʋ yi a tɩ nuru tome pʋɔ.
La Bible en Dagara © Alliance Biblique du Burkina Faso, 2013.