Sɛb-sõw yielu 92
92
Sɛb-sõw yielu 92 (91) sob
Nyɛ̃ a Sore danʋ na tɛr nʋ̃ɔ̀ a
1Sɛb-sõw yielu. Yielu a pɩ̃ɛnʋ-bibir ƴãw.
2Sore e, nyɛ̃ a fʋ danʋ na tɛr nʋ̃ɔ̀ a,
nɩ bɛ na na yiele íre nɩ a fʋ yúor a,
fʋ̃ʋ Naaŋmɩn-na-do-saa-bɛ-pɩɛl-a!
3Nyɛ̃ a fʋ nɔ̃wfʋ manʋ a biɓaara,
nɩ a fʋ na ŋmɛ̃ fʋ ŋmɛ̃a a manʋ a tɩ̃ɩsɔw na tɛr nʋ̃ɔ̀ a,
4bɛ na na mɩ́ ŋmɩɛr a korijom, a pɛ̀nɛ́,
nɩ a kãkaara manɛ nɩ a!
5Sore e, a fʋ tome ɩrɛ mɛ̃ nɩ nʋ̃ɔ̀,
ɩ̃ mɩ́ nyɛ̃ nɩ a fʋ nuru tome ŋmɩɛr nʋ̃ɔ̀ cɛlsɩ.
6Sore e, a fʋ tome sɩrɩ na ɩ tõ-bɛrɛ,
ɛ́ a fʋ tɩɛrʋ zulme!
7A dãbol sob bɛ bãw bom za a pʋɔ ɩ,
a gẽgemi sob bɛ bãw a pɛr towtow ɛ.
8A nɩ-faar mɩ́ búle na mɛ̃ a mʋ̃ɔ a,
a yel-fa-maalbɛ mɩ́ ɩ n nɩbɛ,
ɛcɛ wɛb'a bɛ nãà wɛ a baarɩ.
9Ɛcɛ fʋ̃ʋ a, Sore e, fʋ ɩ n kpɛ̃ɛ kʋralɛ.
10A fʋ dɔ̃ dem ƴãw a, Sore e,
a fʋ dɔ̃ dem na wɛ na,
ɛ́ a yel-fa-maalbɛ zɔ yaarɩ kpele!
11Fʋ kʋ̀ m'ɩ wɛ-náab fãw,
fʋ cir'ɩ kãa-nyũu ƴãw mɛ̃.
12Ɩ̃ nyɛ̃ nɩ a ɩ̃ dɔ̃ dem bɛ na zɛb tʋ̃ɔ́ a,
ɩ̃ wone nɩ a nɩ-faar na ìr'ɩ mɛ̃ a zɛbr a.
13A nɩ-mɩŋa kɛrɛ na mɛ̃ kpãkparmɛ tɩɛ a,
ʋ ìre na dúor mɛ̃ Libã tẽw sɛɛdɩr tɩɛ a.
14Bɛ sɛl ʋ na mɛ̃ tɩɛ a,
a Sore Ŋmɩn-yir-kpɛ̃ɛ pʋɔ,
ʋ kɛrɛ nɩ a tɩ Naaŋmɩn davʋrɩ pʋɔ.
15Ʋ tɛr'a tɩ kor, ɛ́ cãà wɔnɛ,
ʋ cãà na ɩ ɓaarɓaar, ɛ́ a váar ɩ va-sɛbl,
16k'ʋʋ wul k'aa Sore ɩ n nɩ-dẽdẽ,
ʋ ɩ n a ɩ̃ pì-kpɛ̃w, ziri za bɛ ka a ʋ zie ɩ.
La Bible en Dagara © Alliance Biblique du Burkina Faso, 2013.