Sɛb-sõw yielu 86
86
Sɛb-sõw yielu 86 (85) sob
A ɩ̃ kpɩɛrʋ pʋɔ a, ɩ̃ kone na bʋɔlɛ fʋ
1Daviir puoru.
Sore e, cɩɩl tobr cɔw mɛ̃,
sɔw mɛ̃, ɩ̃ na ɩ bãbàal nɩ nã́w sob a ƴãw.
2Gùre mɛ̃, ɩ̃ na tu b a ƴãw.
Ɩ̃ ɩ n a fʋ tõ-tõ-bie, ɩ̃ tɩɛrɛ fʋ na,
faa mɛ̃, fʋ̃ʋ na ɩ a ɩ̃ Naaŋmɩn a.
3Zɔ ɩ̃ nɩbaalʋ, Sore e,
bibir za, fʋ̃ʋ n'ʋ ɩ̃ mɩ́ bʋɔlɛ.
4Sore e, a mãa na ɩ a fʋ tõ-tõ-bie a,
ɩ̃ lɩɛbɛ nɩ a niwn cɔwr fʋ, ɩ k'ɩ̃ nyɛ̃ nʋ̃ɔ̀.
5Fʋ̃ʋ a, Sore e, fʋ ɩ n nɩ-vla, ɛ́ dɩrɛ suur,
a fʋ nɔ̃wfʋ bɛ dɩ vuo a bɛlɩ dem na bʋɔlɛ fʋ a ƴãw ɛ.
6Sore e, bɛr wõ a ɩ̃ puoru vla,
cɛlɛ be wõ a ɩ̃ yãayãa zɛlʋ.
7Mãa wa be a kpɩɛrʋ pʋɔ a,
ɩ̃ mɩ́ bʋɔlɛ fʋ na, ɛ́ fʋ mɩ́ sɔw mɛ̃ na.
8A naaŋmɩmɛ pʋɔ a, kãw za bɛ be be
ŋmɛ̃ mɛ̃ a fʋ̃ʋ a ɩ, Sore e,
ton mɩ̀ bɛ be be ŋmɛ̃ taa nɩ a fʋ tome ɩ.
9A nɩ-bʋʋrɛ za fʋ na ír a na wa na
wa gbĩ dume a fʋ niŋé, Sore e,
bɛ na íre nɩ a fʋ yúor.
10Bʋ̃ʋ n'ʋ vɛ̃, fʋ ɩ n kpɛ̃ɛ ɛ́ maalɛ nɔ-ɓãa-yele,
fʋ̃ʋ yõ tẽtẽ n'ʋ ɩ Naaŋmɩn.
11Sore e, wul mɛ̃ a fʋ pʋ-tɩɛrʋ sɔ́r,
a ɩ̃ cenu tʋ̃ɔ́ tuur a fʋ yel-mɩŋa.
Lãw a ɩ̃ tɩɛrʋ taa, ɩ̃ tɛr ƴãwfʋ a fʋ yúor ƴãw.
12Sore ɩ̃ Naaŋmɩn i, ɩ̃ na danɛ fʋ na nɩ ɩ̃ pʋɔ za,
ɩ̃ na íre nɩ a fʋ yúor kʋralɛ.
13Fʋ sɩrɩ na nɔnɛ mɛ̃ bɛ dɩ vuo ɩ,
fʋ ír mɛ̃ nɩ a kpɩmɛ tẽw bɔw-zulu pʋɔ.
14Naaŋmɩn i, pɔ̀lʋ dem ìr'a àr a ɩ̃ ƴãw,
po-to-nɩbɛ lãw nɩ taa bɔbr a ɩ̃ kʋb.
Bɛ bɛ ŋmɛlɛ kaar fʋ ɛ.
15Ɛcɛ fʋ̃ʋ a, Sore e, fʋ ɩ n Naaŋmɩn
na ɩ su-ɓaarʋ sob ɛ́ zɔrɛ nɩbaalʋ a,
a fʋ suur bɛ pawr ɛ, ɛ́ fʋ ɩ nɔ̃wfʋ
nɩ pùor-bɛ-lɛbrʋ tɛwr.
16Lɩɛb kaa mɛ̃ ɛ́ zɔ ɩ̃ nɩbaalʋ.
Ɩ̃ ɩ n a fʋ tõ-tõ-bie, kʋ̀ m a fʋ fãw,
faa mɛ̃, mãa fʋ tõ-tõ-bi-pɔw bie.
17Wul mɛ̃ a fʋ nɔ̃wfʋ bãwfʋ kãw.
Lɛ n'a a ɩ̃ bɛ-nɔnbɛ na nyɛ̃ vĩ.
Bɛ na nyɛ̃ na k'aa fʋ̃ʋ a, Sore e,
fʋ sõwne mɛ̃ na ɛ́ mɔwlɛ mɛ̃.
La Bible en Dagara © Alliance Biblique du Burkina Faso, 2013.