Sɛb-sõw yielu 75
75
Sɛb-sõw yielu 75 (74) sob
Naaŋmɩn n'ɩ a ƴɛ̀r-dɩrɛ
1Yiel-yielbɛ nɩ-kpɛ̃ɛ sɛbɛ pʋɔ yielu. «Ta sãw bɛr» yielu kɔkɔr'ʋ. Sɛb-sõw yielu Asafʋ na maalɩ a. Yielu.
2Tɩ danɛ fʋ na, Naaŋmɩn i, tɩ danɛ fʋ na,
tɩ bʋɔlɛ nɩ a fʋ yúor, fʋ na pɩɛlɩ tɩ a ƴãw,
tɩ manɛ nɩ a fʋ nɔ-ɓãa-yele.
3A Naaŋmɩn yere na: «A daar ʋl ɩ̃ na na ƴãw a,
ɩ̃ na dɩ n a ƴɛ̀rʋ nɩ mɩnʋ.
4A tẽsɔw na tʋ̃ɔ́ na damnɛ,
lãwnɩ a bɛlɩ dem za na be a ʋ zu a,
ɛcɛ mãa n'ʋ ɩ ʋ kpɛmɛ àr.» Tɛw-àrʋ
5Ɩ̃ yel'ɩ a bɛlɩ dem na mɩ́ pɔrɛ a: «Nyɩ ta pɔrɛ a lɛ ɩ!»
Ɛ́ yel a nɩ-faar: «Nyɩ ta garɛ baw ɛ!
6Nyɩ ta maal garɛ baw a lɛ ɩ,
nyɩ bɛr a nyɩ pɔ̀l-ƴɛ̀rʋ.
7Bʋ̃ʋ n'ʋ vɛ̃, saa-pɛrɩ́ nɩ mʋ̃tɔ̃w-kpɛb-lowr
nɩ wɛja-kpalɛ pʋɔ bɛ n'a a zɛwfʋ yire waar ɛ,
8Naaŋmɩn n'ʋ dɩrɛ a ƴɛ̀rʋ: ʋ mɩ́ siwr'ɩ ŋa, ɛ́ zɛw ŋa.»
9A Sore tɛr'ɩ koli-nyúura a ʋ nũú,
ʋ paalɩ divɛ̃ na kpɛmɛ kpɛmɛ ɛ́ bɩ a.
Ʋ pʋrɛ na kʋ̀rɛ a tẽw zu nɩ-faar za.
A fɛr'a kɛ́ bɛ za nyũ,
ɛ́ baarɩ a kole tɩ lãwnɩ a pɛ-kpɩɩrɛ.
10Ɛ́ mãa a, ɩ̃ na yiele nɩ a Zakɔb Naaŋmɩn ƴãw kʋralɛ,
ɩ̃ na yere nɩ à à ŋá ʋ na yel a:
11«Ɩ̃ na ɩ na a nɩ-faar pɔ̀lʋ za baarɩ,
ɛ́ a nɩ-mɩn mɩ̀ nɩ̃ɛ nyɛrɛ zɛwfʋ.»
La Bible en Dagara © Alliance Biblique du Burkina Faso, 2013.