Sɛb-sõw yielu 76
76
Sɛb-sõw yielu 76 (75) sob
Sɛb-sõw yielu a Naaŋmɩn na bɛ tɛr dɩ̃ɛnʋ a ƴãw
1Yiel-yielbɛ nɩ-kpɛ̃ɛ sɛbɛ pʋɔ yielu. Fomie bʋ̃-ŋmɩɛrɩ n'a bɛ mɩ́ ŋmɩɛr'ɩ ƴãwn. Sɛb-sõw yielu Asafʋ na maalɩ a. Yielu.
2A Naaŋmɩn ɩ na bɛ bãw ʋ vla a Zuda tẽw,
a ʋ yúor yi n a Ɩsɩrayɛl tẽw pʋɔ.
3Zerizalɛm'a ʋ maalɩ a ʋ pɛn-sɛw,
Sɩyɔ̃ n'a a ʋ yir be.
4Be n'a ʋ kár a zɛbr bome bɛr:
a pime, a zɛbr-kur-pãgalɩ nɩ a kafine. Tɛw-àrʋ
5Fʋ nyɩwrɛ na, Naaŋmɩn i,
fʋ dɩrɛ nɩ dɛpaalʋ zuo a tã-bɛrɛ na be kʋralɛ a.
6Bɛ fa n a soja-gãdaar bome za,
bɛ gúr'ɩ a kũu gʋ̃ɔ.
A zɛbr-nɩbɛ bɛ ŋa bɛ tʋ̃ɔ́ ɩ ɩb kãw za ɩ.
7Zakɔb Naaŋmɩn i, fʋ na wa tanɩ a,
a wi-zɔmnbɛ nɩ a wie gbini na àr.
8A fʋ̃ʋ a, fʋ bɛ tɛr dɩ̃ɛnʋ ɛ.
Fʋ̃ʋ wa nyɛ̃ suur a, ãa n'ʋ na tʋ̃ɔ́ àr a fʋ niŋé?
9Fʋ mɩ́ be n a salom zu
ɛ́ yel a lɛ fʋ na dɩ a ƴɛ̀rʋ bin a,
a tẽ-daa zɔrɛ dɛ̃bɩ̃ɛ, ɛ́ ɩ gbili,
10a lɛn daar fʋ na mɩ́ ìr a ƴɛ̀rʋ-dɩb ƴãw a,
fʋ na mɩ́ ìr kɛ́ fʋ faa a tẽw bãbàalbɛ za a. Tɛw-àrʋ
11A nɩsaalbɛ suur tɛɛ za na ɩ na a fʋ yúor yi,
ɛ́ a bɛlɩ dem a fʋ suur nãà wa jɩɩrɩ bɛr a,
na su n kuor bome.
12Nyɩ kõ nɛ́ɛ kʋ̀ a Sore nyɩ Naaŋmɩn, ɛ́ ír a.
Nyɩɩm za na viiri koli ʋ a,
nyɩ wa n bome wa kʋ̀ a Naaŋmɩn na bɛ tɛr dɩ̃ɛnʋ a.
13A ten na-mɩnɛ pɔ̀lʋ mɩ́ baar'ɩ a ʋ niŋé,
a tẽw zu na-mɩnɛ za zɔrɛ ʋ na.
La Bible en Dagara © Alliance Biblique du Burkina Faso, 2013.